မြန်မာ့တပ်မတော်ချစ်ကြည်ရေးကိုယ်စားလှယ်အဖွဲ့ အိန္ဒိယသမ္မတနိုင်ငံ၊ ဗာရာဏသီမြို့အနီး မိဂဒါဝုန် ဥယျာဉ်ရှိ အထင်ကရဗုဒ္ဓဝင်နေရာများအား သွားရောက်ဖူးမြော်ကြည်ညို၊ 39 Gorkha Training Centre သို့ သွားရောက် လေ့လာကြည့်ရှု 

မြန်မာ့တပ်မတော်ချစ်ကြည်ရေးကိုယ်စားလှယ်အဖွဲ့ အိန္ဒိယသမ္မတနိုင်ငံ၊ ဗာရာဏသီမြို့အနီး မိဂဒါဝုန် ဥယျာဉ်ရှိ အထင်ကရဗုဒ္ဓဝင်နေရာများအား သွားရောက်ဖူးမြော်ကြည်ညို၊ 39 Gorkha Training Centre သို့ သွားရောက် လေ့လာကြည့်ရှု

နေပြည်တော်၊ ဇူလှိုင် ၃၁

အိန္ဒိယသမ္မတနိုင်ငံသို့ ချစ်ကြည်ရေးခရီးရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ဇနီးဒေါ်ကြူကြူလှနှင့်အဖွဲ့ ဝင်များလိုက်ပါ၍ ယနေ့ နံနက်ပိုင်းတွင် ဗာရာဏသီမြို့အနီးရှိ မြတ်စွာဘုရားရှင်အား ပဉ္စဝဂ္ဂီ ၅ ဦးတို့မှ ခရီးဦးကြိုသည့် နေရာတွင် အထိမ်းအမှတ်အဖြစ် တည်ထားသည့် ချောက်ခဏ္ဍီ စေတီတော်ကြီးအား သွားရောက် ဖူးမြော်ကြည်ညိုကြသည်။

ထို့နောက် မိဂဒါဝုန်ဥယျာဉ်အတွင်းရှိ မြတ်စွာဘုရားရှင်မှ ပဉ္စဝဂ္ဂီ ၅ ဦးအား ဓမ္မစကြာတရားဦး ဟောကြားခဲ့သည့် ဓမ္မရာဇိကစေတီတော်ကြီးအား ပန်း၊ရေချမ်း ကပ်လှူ ပူဇော်၍ဖူးမြော်ကြည်ညိုသည်။ ဓမ္မရာဇိကစေတီနေရာသည် ဗုဒ္ဓဘုရားရှင်တော်မြတ်မှ ဓမ္မစကြာတရားတော်ကို ပဉ္စဝဂ္ဂီ ၅ ဦး အားစတင် ဟောကြားခဲ့သည့် နေရာဖြစ်၍ ဗုဒ္ဓ သာသနာစတင်ပေါ်ထွန်းရာဌာန ဖြစ်သကဲ့သို့ ဘုရား၊ တရား၊ သံဃာ ဆိုသည့် ရတနာ ၃ ပါးလည်း စတင်ပေါ်ထွန်းခဲ့ခြင်းကြောင့် ရတနာ ၃ ပါးအစ မိဂဒါဝုန်ကဟု ဆိုကြကြောင်းသိရှိရသည်။

ဆက်လက်ပြီး တပ်မတော်ကာကွယ်ရေးဦးစီးချုပ်နှင့်ဇနီး၊ အဖွဲ့ဝင်များသည် ဓမ္မရာဇိကစေတီ၏ အရှေ့ဘက် ကိုက် ၁၅၀ခန့်အကွာရှိ ဓမ္မေခ စေတီတော်ကြီးသို့ သွားရောက်ဖူးမြော်ကြည်ညိုပြီး ပန်း၊ ရေချမ်းနှင့် ရွှေသင်္ကန်းများ ကပ်လှူပူဇော်၍ စေတီတော်ကြီးအား လက်ယာရစ်ဖူးမြော်ကြည်ညိုကြ သည်။ အဆိုပါ ဓမ္မေခစေတီတော်ကြီးသည် အမြင့်၁၀၄ပေ၊ အောက်ခြေအချင်း ၉၃ ပေခန့်ရှိကာ မိဂဒါဝုန်ဥယျာဉ်တွင် ထုထည်ကြီးမားစွာဖြင့် တစ်ဆူတည်းကျန်ရှိသည့် စေတီတော်ကြီးဖြစ်ပြီး သာသနာ နှစ်ပေါင်း၂၅၀၀ ကျော် ဗုဒ္ဓသမိုင်းကို ထင်ထင်ရှားရှားထုတ်ဖော်ပြသနေသည့် စေတီကြီး တစ်ဆူဖြစ်သည်။

ထို့နောက် မိဂဒါဝုန်ဥယျာဉ်အနီး သီရိလင်္ကာနိုင်ငံမှ တည်ထားကိုးကွယ်သည့် ဓာတ်တော်တိုက်အား သွားရောက်ဖူးမြော်ကြည်ညိုသည်။ ဦးစွာ ဓာတ်တော်တိုက်အတွင်း ရှိ မြတ်စွာဘုရား ဓမ္မစကြာ တရားဦး ဟောကြားနေသည့် ဗုဒ္ဓရုပ်ပွားတော်မြတ်အား ဖူးမြော် ကြည်ညို၍ ပန်း၊ ရေချမ်း၊ ဆီမီးများ ကပ်လှူပူဇော်သည်။ ယင်းနောက် တပ်မတော်ကာကွယ်ရေးဦးစီးချုပ်နှင့်ဇနီးတို့က အလှူငွေများ ပေးအပ်လှူဒါန်းရာ ဓာတ်တော်တိုက်ဆရာတော်မှ ဓမ္မလက်ဆောင်များ ပြန်လည်ပေးအပ်သည်။ ထို့နောက် ဓာတ်တော်တိုက် ပရိဝုဏ်အတွင်းရှိ မြတ်စွာဘုရားမှ ပဉ္စဝဂ္ဂီ ၅ ဦးအား ဓမ္မစကြာတရားဦး ဟောကြားနေသည့် ရုပ်ပွားတော်များကို ဖူးမြော်ကြည်ညိုကြသည်။

ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် အဖွဲ့ဝင် များသည် ဗာရာဏသီမြို့အတွင်းရှိ ဆေးဝင်္ကပါ မြန်မာကျောင်းတိုက်သို့ သွားရောက်ကြသည်။ ဦးစွာ တပ်မတော်ကာကွယ်ရေးဦးစီးချုပ်က ဆေးဝင်္ကပါကျောင်းတိုက် ဆရာတော် ဒေါက်တာဘဒ္ဒန္တမဏ္ဍလ ထံသို့ သာသနာရေးဆိုင်ရာများနှင့် ဗာရာဏသီတွင် လာရောက်သတင်းသုံးကြသည့် သံဃာတော်များ ၏ သီတင်းသုံးနေထိုင်မှု အခြေအနေများနှင့် ပတ်သက်၍ လျှောက်ထားမေးမြန်းသည်။ ထို့နောက် တပ်မတော်ကာကွယ်ရေးဦးစီးချုပ်နှင့် အဖွဲ့ဝင်များသည် ဆရာတော်ထံမှ ငါးပါးသီလခံယူ ဆောက်တည်၍ သံဃာတော်များအား ဝါဆိုသင်္ကန်း၊ နဝကမ္မအလှူငွေနှင့် လှူဖွယ် ပစ္စည်းများအား လည်းကောင်း၊ ဗာရာဏသီမြို့ရှိ စာသင်သားသံဃာတော်များနှင့် သာသနာ့အနွယ်ဝင်သီလရှင်များ အား နဝကမ္မ အလှူငွေများအား လည်းကောင်း ဆက်ကပ်လှူဒါန်း၍ လှူဒါန်းမှုအစုစုအတွက် ရေစက်သွန်းချအမျှပေးဝေခဲ့ပြီး သံဃာတော်များအား နေ့ဆွမ်းဆက်ကပ်လှူဒါန်းခဲ့ကြသည်။ အဆိုပါ ဗာရာဏသီရှိ ဆေးဝင်္ကပါ ကျောင်းတိုက်တွင် မြန်မာသံဃာတော်များသည် လွန်ခဲ့သည့် နှစ်ပေါင်း (၆၀)ကျော်မှ စတင်၍ သီတင်းသုံးနေထိုင်ခဲ့ကြကြောင်း သိရှိရသည်။

ထို့နောက် တပ်မတော်ကာကွယ်ရေးဦးစီးချုပ်နှင့် အဖွဲ့ဝင်များသည် ဗာရာဏသီ မြို့ရှိ 39 Gorkha Training Centre(GTC)ကျောင်းသို့ ဆက်လက်ထွက်ခွာခဲ့ရာ ကျောင်းအုပ်ကြီး Brigadier Hukum Singh Bainsla, SM နှင့် ကျောင်းတာဝန်ရှိသူများက ကြိုဆိုပြီးနောက် ကျောင်းဌာနချုပ်ရုံးတွင် သင်တန်းကျောင်းသမိုင်းနှင့် အိန္ဒိယတပ်မတော် တပ်သားသစ်များအား လေ့ကျင့်ပေးမှုအခြေအနေ များအား PowerPoint ဖြင့် ရှင်းလင်းတင်ပြရာ တပ်မတော်ကာကွယ်ရေးဦးစီးချုပ်က သိရှိလိုသည်များ အား ပြန်လည်ဆွေးနွေးခဲ့ကြပြီး အမှတ်တရစုပေါင်းမှတ်တမ်းတင်ဓာတ်ပုံရိုက်ကူးခဲ့ကြသည်။

ဆက်လက်၍ သင်တန်းကျောင်းအတွင်း လှည့်လည်ကြည့်ရှုလေ့လာကြရာ မီတာ ၅၀၀ စက်ပစ်ကွင်းအတွင်း သင်တန်းသားများက လက်နက်ငယ်ပစ်ခတ်လေ့ကျင့်မှုများအား DRONACHARYA Fire Control Centre မှ ကြည့်ရှုလေ့လာကြပြီး သင်တန်းသားများက ဂေါ်ရခါးဓား ဖြင့် တိုက်ခိုက်ရေးစွမ်းရည် သရုပ်ပြပွဲအား ကြည့်ရှုအားပေးကြသည်။ ထို့နောက် တပ်မတော် ကာကွယ်ရေးဦးစီးချုပ်နှင့် အဖွဲ့ဝင်များအား Officer Mess တွင် ကြိုဆိုဧည့်ခံပြီး တပ်မတော် ကာကွယ်ရေးဦးစီးချုပ်နှင့် ကျောင်းအုပ်ကြီးတို့သည် အထိမ်းအမှတ်တံဆိပ်နှင့် အမှတ်တရ လက်ဆောင်များ အပြန်အလှန်ပေးအပ်ခဲ့ကြသည်။