(Unicode Version)
တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဗီယက်နမ်ပြည်သူ့ တပ်မတော် စစ်ဦးစီးအရာရှိချုပ် Senior Lieutenant General Phan Van Giang အား ဂုဏ်ပြုကြိုဆို၊ တပ်မတော်နှစ်ရပ်ချစ်ကြည်ရင်းနှီးမှုဆိုင်ရာ ကိစ္စရပ်များဆွေးနွေး
နေပြည်တော်၊ စက်တင်ဘာ ၂၅
တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ဗီယက်နမ်ပြည်သူ့ တပ်မတော် စစ်ဦးစီးအရာရှိချုပ် Senior Lieutenant General Phan Van Giang အား ယနေ့နံနက်ပိုင်းတွင် နေပြည်တော်ရှိဇေယျာသီရိဗိမာန်ရှေ့၌ ဂုဏ်ပြုတပ်ဖွဲ့ဖြင့် ကြိုဆိုသည်။
ဦးစွာ တပ်မတော်ကာကွယ်ရေးဦးစီးချုပ်နှင့် ဗီယက်နမ်ပြည်သူ့တပ်မတော် စစ်ဦးစီးအရာရှိချုပ်တို့ သည် ဂုဏ်ပြုတပ်ဖွဲ့၏အလေးပြုခြင်းကိုခံယူကြပြီး ဂုဏ်ပြုတပ်ဖွဲ့ကို လိုက်လံ ကြည့်ရှုစစ်ဆေးသည်။ ယင်းနောက် ဂုဏ်ပြုတပ်ဖွဲ့၏ ချီတက်အလေးပြုခြင်းကို ခံယူကြပြီး အခမ်းအနားတက်ရောက် လာကြသော နှစ်နိုင်ငံတပ်မတော်အရာရှိကြီးများနှင့် အပြန်အလှန် မိတ်ဆက်ပေးကြသည်။
အဆိုပါဂုဏ်ပြုကြိုဆိုပွဲသို့ တပ်မတော်ကာကွယ်ရေးဦးစီးချုပ်နှင့်အတူ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်း၊ ညှိနှိုင်း ကွပ်ကဲရေးမှူး(ကြည်း၊ရေ၊လေ) ဗိုလ်ချုပ်ကြီး မြထွန်းဦး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး မောင်မောင်ကျော်၊ ကာကွယ်ရေး ဦးစီးချုပ်ရုံး(ကြည်း)မှ တပ်မတော်အရာရှိကြီးများနှင့် ဗီယက်နမ်နိုင်ငံဆိုင်ရာ မြန်မာစစ်သံ(ကြည်း၊ရေ၊ လေ) ဗိုလ်မှူးချုပ် အောင်ဇေယျတို့ တက်ရောက်ကြပြီး ဗီယက်နမ် ပြည်သူ့တပ်မတော် စစ်ဦးစီးအရာရှိချုပ်နှင့်အတူ မြန်မာနိုင်ငံဆိုင်ရာ ဗီယက်နမ်နိုင်ငံ သံအမတ်ကြီး Mrs.Dr.Luan Thuy Duong၊ မြန်မာနိုင်ငံဆိုင်ရာ ဗီယက်နမ်နိုင်ငံစစ်သံမှူး Colonel Nguyen Due Giang နှင့် ဗီယက်နမ်ပြည်သူ့တပ်မတော်အရာရှိကြီးများ တက်ရောက်ကြသည်။
ဂုဏ်ပြုတပ်ဖွဲ့ဖြင့် ကြိုဆိုပြီးနောက် ဗီယက်နမ်ပြည်သူ့တပ်မတော် စစ်ဦးစီးအရာရှိချုပ်သည် ဇေယျာသီရိဗိမာန် ဧည့်သည်တော်မှတ်တမ်းစာအုပ်တွင် မှတ်တမ်းတင်လက်မှတ်ရေးထိုးသည်။ ထို့နောက် ဧည့်သည်တော် ဗီယက်နမ်ပြည်သူ့တပ်မတော် စစ်ဦးစီးအရာရှိချုပ်နှင့် တပ်မတော် ကာကွယ်ရေးဦးစီးချုပ်တို့သည် ဧည့်ခန်းမဆောင်၌ တွေ့ဆုံဆွေးနွေးမှုပြုလုပ် ကြသည်။
တွေ့ဆုံဆွေးနွေးရာတွင် တပ်မတော်ကာကွယ်ရေးဦးစီးချုပ်က အဆွေတော်အနေဖြင့် ဗီယက်နမ် ပြည်သူ့တပ်မတော်စစ်ဦးစီးအရာရှိချုပ် စတင်တာဝန်ထမ်းဆောင်ပြီး မြန်မာနိုင်ငံသို့ ပထမဦးဆုံး လာရောက်သည့် ခရီးစဉ်ဖြစ်သည့်အတွက် ထူးခြားသည့်ခရီးစဉ် ဖြစ်ကြောင်း၊ မိမိတို့နှစ်နိုင်ငံသည် မိတ်ဆွေကောင်းနိုင်ငံများဖြစ်ပြီး သမိုင်းကြောင်းအရ ကောင်းမွန်သည့်ဆက်ဆံရေးများရှိကြောင်း၊ ရှိရင်းစွဲချစ်ကြည်ရင်းနှီးမှုကို ပိုမိုခိုင်မာအောင် တိုးမြှင့်ဆောင်ရွက်သွားမည်ဖြစ်ကြောင်းဖြင့် ဦးစွာ ပြောကြားသည်။
ယင်းနောက် ဧည့်သည်တော် ဗီယက်နမ်ပြည်သူ့တပ်မတော်စစ်ဦးစီးအရာရှိချုပ်က ယခုကဲ့သို့ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ ဖိတ်ကြားချက်အရ ချစ်ကြည်ရေးခရီးလာရောက်ရသည့်အတွက် ကျေးဇူးတင်ရှိပါကြောင်း၊ မိမိအနေဖြင့် မြန်မာနိုင်ငံသို့ ပထမဦးဆုံးအကြိမ်လာရောက်သည့် ချစ်ကြည်ရေးခရီးစဉ်ဖြစ်ပြီး မိမိတို့နှစ်နိုင်ငံသည် ခင်မင်ရင်းနှီး သည့် ဆက်ဆံရေးရှိသည့် မိတ်ဆွေကောင်းနိုင်ငံများ ဖြစ်ပါကြောင်း၊ နှစ်နိုင်ငံပူးပေါင်းဆောင်ရွက်မှုနှင့် ဆက်ဆံရေးသည် ရှေးယခင်ကပင် တည်မြဲခဲ့ပြီး ဆက်လက်တိုးမြှင့်ဆောင်ရွက်သွားကြရမည် ဖြစ်ပါကြောင်း၊ စီးပွားရေးဆိုင်ရာ ရင်းနှီးမြှုပ်နှံမှုများ၊ လေ့ကျင့်ရေးဆိုင်ရာများသာမက အခြားနယ်ပယ် များတွင်လည်း ပူးပေါင်းဆောင်ရွက်သွားကြရမည်ဖြစ်ပါကြောင်း၊ လာမည့် ၂၀၂၀ ပြည့်နှစ်တွင် ဗီယက်နမ်နိုင်ငံအနေဖြင့် အာဆီယံအလှည့်ကျဥက္ကဋ္ဌတာဝန် ထမ်းဆောင်ရမည်ဖြစ်၍ တာဝန်များ အောင်မြင်စွာ ထမ်းဆောင်နိုင်ရန် ကြိုးပမ်းဆောင်ရွက်သွားမည်ဖြစ်ကြောင်းဖြင့် ပြောကြားသည်။
ထို့နောက် ၂၀၂၀ ပြည့်နှစ်တွင် ဗီယက်နမ်နိုင်ငံက အာဆီယံအလှည့်ကျဥက္ကဋ္ဌ တာဝန်ယူ ဆောင်ရွက်ရာ၌ မြန်မာ့တပ်မတော်က အပြည့်အဝ ပူးပေါင်းကူညီဆောင်ရွက်ပေးသွားမည့် အခြေ အနေများ၊ ဗီယက်နမ်တပ်မတော်သည် ခေါင်းဆောင်ကြီး ဟိုချီမင်း လက်ထက်မှ ယခုအချိန်အထိ ပြည်သူများ၏အကျိုးစီးပွားအတွက် နိုင်ငံကာကွယ်ရေးတွင်သာမက နိုင်ငံရေး၊ စီးပွားရေး၊ လူမှုရေး ကဏ္ဍများ၌လည်း အဓိကပါဝင်ကူညီဆောင်ရွက်ပေးလျက်ရှိသည့်အခြေအနေများ၊ နိုင်ငံတိုင်းရှိ တပ်မတော်တိုင်းသည် မိမိတို့နိုင်ငံ၏ အချုပ်အခြာနှင့် ပိုင်နက်နယ်မြေ ၊ ပြည်သူလူထု၏ အသက်အိုးအိမ်စည်းစိမ်ကို ကာကွယ်စောင့်ရှောက်ရန် တာဝန်ရှိပြီး ဒေသတွင်း ညှိနှိုင်းဖြေရှင်းနိုင် သည့် အငြင်းပွားမှုများကို နိုင်ငံတကာက ဝင်ရောက်စွက်ဖက်ခြင်းမျိုးသည် ဒေသ၏တည်ငြိမ်ရေးနှင့် ဖွံ့ဖြိုးတိုးတက်မှုကို ထိခိုက်စေနိုင်သည့် အခြေအနေများ၊ အာဆီယံဒေသတွင်း ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးအတွက် အဖွဲ့ဝင်နိုင်ငံများ၏ တပ်မတော်အချင်းချင်း စည်းလုံးညီညွတ်စွာဖြင့် ပူးပေါင်းဆောင်ရွက်မှုများ ခိုင်မာရန်၊ ဆက်ဆံရေးများတိုးမြှင့်ဆောင်ရွက်ရန် လိုအပ်သည့် အခြေအနေများ၊ မြန်မာနိုင်ငံအနေဖြင့် တောင်တရုတ်ပင်လယ်အရေးကိစ္စ အပါအဝင် အရှေ့တောင် အာရှဒေသတွင်းနှင့် နိုင်ငံတကာဆက်ဆံရေးကဏ္ဍများတွင် အာဆီယံအဖွဲ့၏ ရပ်တည်ချက် အတိုင်းသာ ရပ်တည်ဆောင်ရွက်သွားမည့် အခြေအနေများ၊ နှစ်နိုင်ငံအကြား စီးပွားရေး၊ ကုန်သွယ်မှု နှင့် ခရီးသွားလုပ်ငန်းများတွင် ပိုမိုတိုးမြှင့်ဆောင်ရွက်နိုင်မည့် အလားအလာများ၊ နှစ်နိုင်ငံ တပ်မတော် နှစ်ရပ်အကြားချစ်ကြည်ရေး ခရီးစဉ်များ အပြန်အလှန်လည်ပတ်ရေး၊ လေ့ကျင့်ရေးဆိုင်ရာနှင့် ဆေးဘက်ဆိုင်ရာ ပူးပေါင်းဆောင်ရွက်မှုအခြေအနေများ၊ နည်းပညာ၊ ယဉ်ကျေးမှု၊ အားကစားနှင့် အခြားနယ်ပယ်များတွင်လည်း အပြန်အလှန်ပူးပေါင်း ဆောင်ရွက်နိုင်မည့်အခြေအနေများ၊ နိုင်ငံ အားလုံး၏ တာဝန်ဖြစ်သော မူးယစ်ဆေးဝါးကာကွယ်တားဆီးတိုက်ဖျက်ရေးနှင့် သတင်းအချက် အလက်ဖလှယ်ရေးအတွက် ပူးပေါင်းဆောင်ရွက်နိုင်မည့် အခြေအနေများ၊ မြန်မာနိုင်ငံ၏ ငြိမ်းချမ်းရေး လုပ်ငန်းစဉ်များ ဆောင်ရွက်နေသည့် အခြေအနေများအား ခင်မင်ရင်းနှီးစွာ ကျယ်ကျယ်ပြန့်ပြန့် အမြင်ချင်း ဖလှယ်ဆွေးနွေးခဲ့ကြသည်။
ယင်းနောက် တပ်မတော်ကာကွယ်ရေးဦးစီးချုပ်နှင့် ဗီယက်နမ်ပြည်သူ့တပ်မတော် စစ်ဦးစီးအရာရှိချုပ် တို့သည် အမှတ်တရလက်ဆောင်ပစ္စည်းများ အပြန်အလှန်ပေးအပ်ကြပြီး တက်ရောက်လာကြသူ များနှင့်အတူ စုပေါင်းဓာတ်ပုံရိုက်ခဲ့ကြသည်။ ဗီယက်နမ်ပြည်သူ့တပ်မတော် စစ်ဦးစီးအရာရှိချုပ်၏ ယခုခရီးစဉ်သည် မြန်မာနှင့် ဗီယက်နမ် နှစ်နိုင်ငံပူးပေါင်း ဆောင်ရွက်ရေးနှင့် ဆက်ဆံရေးများ တိုးမြှင့်ဆောင်ရွက်ရေး နယ်ပယ်အားလုံးအတွက် များစွာအကျိုးရှိစေမည့် ခရီးစဉ်ဖြစ်ကြောင်း သတင်းရရှိသည်။
