ယခုကဲ့သို့ သင်တန်းတက်ရောက်ခြင်းဖြင့် တပ်မတော်၏ စွမ်းရည်ကို တိုးတက်စေပြီး နိုင်ငံတော်နှင့် ပြည်သူလူထု၏ အသက်အိုးအိမ်စည်းစိမ်ကို ကာကွယ်ရာတွင် အထောက်အကူပြုမည်ဖြစ်

(unicode Version)

ယခုကဲ့သို့ သင်တန်းတက်ရောက်ခြင်းဖြင့် တပ်မတော်၏ စွမ်းရည်ကို တိုးတက်စေပြီး နိုင်ငံတော်နှင့် ပြည်သူလူထု၏ အသက်အိုးအိမ်စည်းစိမ်ကို ကာကွယ်ရာတွင် အထောက်အကူပြုမည်ဖြစ်

နေပြည်တော်၊ နိုဝင်ဘာ – ၁၄

အရည်အချင်းပြည့်ဝသည့် အရာရှိကြီးများကိုသာ စိစစ်ရွေးချယ်၍ စစ်ဘက်ဆိုင်ရာသင်တန်းများတွင် အမြင့်ဆုံးဖြစ်သည့် ယခုသင်တန်းကို တက်ရောက်စေခြင်းဖြစ်ကြောင်း၊ ယခုကဲ့သို့ သင်တန်း တက်ရောက်ခြင်းဖြင့် တပ်မတော်၏ စွမ်းရည်ကို တိုးတက်စေပြီး နိုင်ငံတော်နှင့် ပြည်သူလူထု၏ အသက်အိုးအိမ်စည်းစိမ်ကို ကာကွယ်ရာတွင် အထောက်အကူ ပြုမည်ဖြစ်ကြောင်းဖြင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ယနေ့နံနက်ပိုင်းတွင် ကလောတပ်နယ်ရှိ စစ်ဦးစီးတက္ကသိုလ်မှ သင်တန်းသားအရာရှိကြီးများကို တွေ့ဆုံအမှာစကားပြောကြားရာတွင် ထည့်သွင်း ပြောကြားသည်။

တွေ့ဆုံပွဲသို့ တပ်မတော်ကာကွယ်ရေးဦးစီးချုပ်နှင့်အတူ ကာကွယ်ရေး ဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ခင်အောင်မြင့်၊ ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများ၊ အရှေ့ပိုင်းတိုင်း စစ်ဌာနချုပ် တိုင်းမှူး၊ စစ်ဦးစီးတက္ကသိုလ် ကျောင်းအုပ်ကြီးနှင့် နည်းပြအရာရှိကြီးများ၊ သင်တန်းသားအရာရှိကြီးများ တက်ရောက်ကြသည်။

ထိုသို့တွေ့ဆုံအမှာစကားပြောကြားရာတွင် တပ်မတော်ကာကွယ်ရေးဦးစီးချုပ် က တပ်မတော်၏ တာဝန်သည် နိုင်ငံတော်ကာကွယ်ရေးတာဝန်နှင့် ပြည်သူလူထု၏ အသက်အိုးအိမ်စည်းစိမ်ကို ကာကွယ်ရန် ဖြစ်ကြောင်း၊ နိုင်ငံတော်ကာကွယ်ရေး တာဝန်ထမ်းဆောင်ရာတွင် ဥပဒေနှင့်အညီသာ ထမ်းဆောင်လျက် ရှိကြောင်း၊ ကာကွယ်ရေး တည်ဆောက်မှုသည်လည်း နိုင်ငံတော်ကို ကာကွယ်ရန်အတွက်သာဖြစ်ကြောင်း၊ တပ်မတော်အနေဖြင့် တိုင်းပြည်ကအားထားရသည့်၊ ပြည်သူက အားကိုးရသည့် တပ်မတော် ဖြစ်ရန်လိုကြောင်း၊ မိမိတို့နိုင်ငံနှင့် နယ်နိမိတ်ချင်း ထိစပ်လျက်ရှိသည့် အိမ်နီးချင်းနိုင်ငံ ၅ နိုင်ငံရှိပြီး နယ်စပ်ဒေသ တည်ငြိမ်အေးချမ်းမှုရှိရန် အရေးကြီးကြောင်း၊ နယ်စပ်ဒေသ တည်ငြိမ်အေးချမ်းမှုမရှိလျှင် နှစ်နိုင်ငံ ဆက်ဆံရေးကိုထိခိုက်နိုင်ပြီး တိုင်းပြည်ဖွံ့ဖြိုးတိုးတက်မှုကို နှောင့်နှေးစေနိုင်ကြောင်း၊ ထို့ကြောင့် တပ်မတော်အနေဖြင့် အိမ်နီးချင်းနိုင်ငံများ၏ တပ်မတော်များနှင့် ချစ်ကြည်ရင်းနှီးစွာ ဆက်ဆံရေး ပိုမိုခိုင်မာအောင်တည်ဆောက်လျက်ရှိကြောင်း ဦးစွာပြောကြားသည်။

ထို့နောက် ကာကွယ်ရေးတာဝန်ထမ်းဆောင်မှုနှင့်ပတ်သက်၍ တပ်မတော် တစ်ရပ်သည် တိုက်စွမ်းရည်၊ တိုက်စွမ်းအားရှိသည့့် တပ်မတော်ဖြစ်ရမည်ဖြစ်ကြောင်း၊ တိုက်စွမ်းအားရရှိရန်အတွက် ငွေကြေးသုံးစွဲနိုင်မှု၊ လူသားအရင်းအမြစ်များနှင့် စွမ်းဆောင်နိုင်မှုများအပေါ်မူတည်ကြောင်း၊ တိုက်စွမ်းရည် ဆိုသည်မှာ အရာရှိ၊ စစ်သည်များ၏ အရည်အချင်းပင်ဖြစ်ကြောင်း၊ စစ်ရေးစွမ်းရည်၊ အုပ်ချုပ်ရေးစွမ်းရည်နှင့် စည်းရုံးရေးစွမ်းရည်စသည့် စွမ်းရည် ၃ ရပ်ပြည့်စုံရမည်ဖြစ်ကြောင်း၊ ထိုသို့စွမ်းရည် ၃ ရပ်ပြည့်ဝ နေစေရန်အတွက် လေ့လာလေ့ကျင့်မှုများ ပြုလုပ်ရမည်ဖြစ်ကြောင်း၊ ယနေ့ခေတ်သစ်စစ်ပွဲများတွင် လေကြောင်းအကဲသာမှုနှင့် အီလက်ထရောနစ်နည်းပညာ သာလွန်မှုရှိသည့် တပ်ကသာစစ်ပွဲကို အဆုံးအဖြတ် ပေးနိုင်မည်ဖြစ်ကြောင်း၊ စစ်မြေပြင်တွင် တွေ့ကြုံခဲ့ရသည့်အတွေ့အကြုံများနှင့် သင်ယူတတ်မြောက်ထားသည့် စစ်အတတ် ပညာများကိုပေါင်းစပ်ပြီး လက်တွေ့လိုက်နာကျင့်သုံးခြင်းဖြင့် စွမ်းရည်ရှိသော တပ်မတော်ကို တည်ဆောက်နိုင်မည်ဖြစ်ပြီး နိုင်ငံတော်ကို အပြည့်အဝကာကွယ်နိုင် မည်ဖြစ်ကြောင်း ပြောကြားသည်။

ဆက်လက်ပြီး တပ်မတော်ကို အင်အားခိုင်မာအောင်တည်ဆောက်ရာတွင် စည်းလုံးညီညွတ်ရေးသည် အရေးပါကြောင်း၊ တပ်တွင်းစည်းလုံးညီညွတ်ရေးကို တည်ဆောက်ရာတွင် ညီညွတ်မျှတသည့် အမိန့်ပေးခြင်း၊ စီမံခန့်ခွဲခြင်းနှင့် စည်းရုံးခြင်းများဖြင့် တည်ဆောက်ရမည်ဖြစ်ကြောင်း၊ မိမိတို့အုပ်ချုပ်ရသူများ၏ သဘောသဘာဝကို နားလည်နေရမည်ဖြစ်ပြီး မိမိအနေဖြင့်စံနမူနာပြထား၍ ”ငါပြောသလိုလုပ်၊ ငါလုပ်သလို လုပ်” ဟုပြတ်သားစွာဦးဆောင်မှုပေးရန်လိုကြောင်း၊ အုပ်ချုပ်မှုနှင့် စီမံခန့်ခွဲမှုများကို ဆောင်ရွက်ရာတွင် တွေးခေါ်မြော်မြင်မှုကို အထောက်အကူဖြစ်စေသည့် သမိုင်း၊ ပထဝီ၊ ယဉ်ကျေးမှုနှင့်စိတ်ပညာစသည့် ဝိဇ္ဇာပညာ ရပ်များကို ပစ်ပယ်၍မရကြောင်း၊ ၎င်းပညာရပ်များသည် စီမံခန့်ခွဲမှုကို များစွာအထောက်အကူပြုသဖြင့် မဖြစ်မနေလေ့လာ သင်ယူရမည်ဖြစ်ကြောင်း၊ စည်းလုံးညီညွတ်မှုရှိမှသာတပ်အနေဖြင့် တိုက်စွမ်းရည် တိုးတက်ကောင်းမွန်မည်ဖြစ်ကြောင်း၊ ထုတ်ပြန်ထားသည့် အမိန့်နှင့်စစ်စည်းကမ်းများကို တိကျစွာလိုက်နာပြီး စစ်သားပီသစွာနေထိုင်ကျင့်ကြံခြင်းသည် လက်တွေ့မပါသော စည်းရုံးရေးပင်ဖြစ်ကြောင်း ရှင်းလင်းမှာ ကြားသည်။

ရခိုင်ပြည်နယ်အရေးကိစ္စနှင့်ပတ်သက်၍ ပြောကြားရာတွင် ဖြစ်စဉ်မှန်များကို နိုုင်ငံတကာအစိုးရ၊ အဖွဲ့အစည်းများနှင့် မီဒီယာများက အမှန်အတိုင်းသိရှိခြင်းမရှိသောကြောင့် ၎င်းတို့သိရှိစေရန်အတွက် မိမိတို့အနေဖြင့် ကျယ်ကျယ်ပြန့်ပြန့်လုပ်ဆောင်နိုင်ရန်လိုကြောင်း၊ အစိုးရနှင့်တပ်မတော်အနေဖြင့် ရခိုင်ပြည်နယ်အတွင်း လူသားချင်းစာနာ ထောက်ထားမှုဆိုင်ရာကိစ္စရပ်များကို ဥပဒေနှင့်အညီဆောင်ရွက် ပေးလျက်ရှိသော်လည်း လူ့အခွင့်အရေးချိုးဖောက်မှုများရှိနေသည်ဟု စွပ်စွဲပြောဆိုမှုများရှိကြောင်း၊ တပ်မတော် အနေဖြင့် တိုင်းပြည်၏ အချုပ်အခြာအာဏာတည်တံ့ခိုင်မြဲရေးအတွက် နိုင်ငံတော်အစိုးရထံတင်ပြ၍ ဥပဒေနှင့်အညီ လုပ်သင့်လုပ်ထိုက်သည်များကိုသာ ဆောင်ရွက်နေခြင်းပင်ဖြစ်ကြောင်း၊ ဘင်္ဂါလီများ သာမကမည်သူမဆို နိုင်ငံသားဖြစ်ခွင့်အား ၁၉၈၂ခုနှစ်၊ နိုင်ငံသားဥပဒေနှင့်အညီသာ ပေးသွားမည်ဖြစ်ကြောင်း၊ ထို့ပြင် တိုင်းပြည်စည်းလုံးညီညွတ်မှုကို ပျက်ပြားစေနိုင်သည့် မည်သည့်ကိစ္စမျိုးကိုမဆို တပ်မတော်က လက်ခံမည်မဟုတ်ကြောင်းပြောကြားသည်။

ပြည်တွင်းငြိမ်းချမ်းရေးနှင့်ပတ်သက်၍ ပြောကြားရာတွင် ယနေ့ပြည်သူက ရွေးချယ်ထားသည့် ပါတီစုံ ဒီမိုကရေစီလမ်းကြောင်းပေါ်တွင် ဒီမိုကရေစီကျင့်စဉ်များအတိုင်း တိုင်းရင်းသား လက်နက်ကိုင် အဖွဲ့အစည်း အားလုံးက လိုက်ပါဆောင်ရွက်ရန်လိုကြောင်း၊ တိုင်းရင်းသားလက်နက်ကိုင်အဖွဲ့အစည်းများသည် မိမိတို့အတွက် ရရှိမည့် အခွင့်အရေးတစ်ခုတည်းကိုသာ မျှော်မှန်းပြီး လုပ်ဆောင်နေလျှင် ငြိမ်းချမ်းရေးနှင့် အလှမ်းကွာဝေးနေမည်သာဖြစ်ကြောင်း၊ ဥပဒေနှင့်အညီသာ အခွင့်အရေးများကိုရရှိနိုင် မည်ဖြစ်ကြောင်း၊ ငြိမ်းချမ်းရေးဆောင်ရွက်ရာတွင် စိတ်ရှည်သည်းခံမှုရှိရန်လိုပြီး ပစ္စုပ္ပန်အခြေအနေမှ အနာဂတ်ကို ပုံဖော် ရမည်ဖြစ်ကာ အတိတ်ကိုသင်ခန်းစာယူရမည် ဖြစ်ကြောင်း၊ သို့မှသာပြည်တွင်းငြိမ်းချမ်းရေးကို အမြန်ဆုံးရရှိပြီး တိုင်းပြည်ဖွံ့ဖြိုးတိုး တက်လာမည်ဖြစ်ကြောင်း ရှင်းလင်းပြောကြားသည်။

တွေ့ဆုံပွဲအပြီးတွင် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် သင်တန်းသားစားရိပ်သာ၌ သင်တန်းသားများနှင့်အတူ နေ့လယ်စာကို အတူတကွ သုံးဆောင်ကြသည်။

ယင်းနောက် မွန်းလွဲပိုင်းတွင် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် အောင်ပန်း တပ်နယ်ရှိ နယ်မြေခံတပ်မတော်ဆေးရုံသို့သွားရောက်ကြည့်ရှုစစ်ဆေးရာ အစည်းအဝေးခန်းမ၌ ဆေးရုံ တပ်မှူးက စစ်ဦးစီး၊ စစ်ရေး၊ စစ်ထောက်ဆိုင်ရာ လုပ်ငန်းများဆောင်ရွက်ထားရှိမှုနှင့် အရာရှိ၊ စစ်သည်၊ မိသားစုများအား ဆေးဝါးကုသ ပေးနေမှုအခြေအနေ များကိုရှင်းလင်း တင်ပြသည်။ ရှင်းလင်းတင်ပြမှုများအပေါ် တပ်မတော်ကာကွယ်ရေးဦးစီးချုပ်က အုပ်ချုပ်မှုဆိုင်ရာနှင့် ဆေးဝါးကုသမှုဆိုင်ရာများအပေါ် လိုအပ်သည်များ ဖြည့်ဆည်းဆောင်ရွက်ပေးသည်။

ထို့နောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် ဆေးရုံတက်ရောက် ကုသလျက် ရှိသော အရာရှိ၊ စစ်သည်များအား လိုက်လံတွေ့ဆုံ၍ တစ်ဦးချင်း၏ ရောဂါဖြစ်ပွားမှုများ၊ ဆေးဝါးကုသ ပေးထားမှုများနှင့် ကျန်းမာရေး တိုးတက်မှုအခြေအနေများအားမေးမြန်းကာ အားပေးစကား များပြောကြားပြီး လက်ဆောင် ပစ္စည်းများပေးအပ်သည်။

အလားတူ တပ်မတော်ကာကွယ်ရေးဦးစီးချုပ်၏ ဇနီးဒေါ်ကြူကြူလှနှင့်အဖွဲ့ဝင်များသည်လည်း အမျိုးသမီးကုသဆောင်၌ တက်ရောက်ကုသလျက်ရှိသော မိသားစုဝင်များအား လိုက်လံတွေ့ဆုံ၍ တစ်ဦးချင်း၏ ရောဂါဖြစ်ပွားမှုများ၊ ဆေးဝါးကုသပေးထား မှုများနှင့် ကျန်းမာရေးတိုးတက်မှုအခြေအနေများအား မေးမြန်းကာ အားပေးစကားများ ပြောကြားပြီး လက်ဆောင်ပစ္စည်းများပေးအပ်ခဲ့ကြသည်။