တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သည့် မြန်မာ့တပ်မတော် ချစ်ကြည်ရေးကိုယ်စားလှယ်အဖွဲ့ တရုတ်ပြည်သူ့သမ္မတနိုင်ငံရှိ Three Gorges Dam သို့သွားရောက်ကြည့်ရှုလေ့လာ

(Unicode Version)

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဦးဆောင်သည့် မြန်မာ့တပ်မတော် ချစ်ကြည်ရေးကိုယ်စားလှယ်အဖွဲ့ တရုတ်ပြည်သူ့သမ္မတနိုင်ငံရှိ Three Gorges Dam သို့သွားရောက်ကြည့်ရှုလေ့လာ

နေပြည်တော်၊ နို၀င်ဘာ – ၂၁

တရုတ်ပြည်သူ့သမ္မတနိုင်ငံ၊ ဗဟိုစစ်ကော်မရှင်အဖွဲ့ဝင်နှင့် ပူးတွဲစစ်ဦးစီးဌာန စစ်ဦးစီးချုပ် Gen. Li Zuocheng ၏ဖိတ်ကြားချက်အရ တရုတ်နိုင်ငံတွင်ရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ဦးဆောင်သော မြန်မာ့တပ်မတော်ချစ်ကြည်ရေးကိုယ်စားလှယ်အဖွဲ့သည် ဟူပေပြည်နယ်စစ် ဒေသ၊ စစ်ဒေသမှူး Maj. Gen. Ma Tao နှင့် တရုတ်ပြည်သူ့လွတ်မြောက်ရေး တပ်မတော်မှအရာရှိကြီးများ၊ တရုတ်နိုင်ငံဆိုင်ရာမြန်မာနိုင်ငံသံအမတ်ကြီး ဦးသစ်လင်းအုန်း၊ မြန်မာစစ်သံ (ကြည်း၊ရေ၊လေ)ဗိုလ်မှူးချုပ် တင့်ဆန်းနှင့်တာဝန်ရှိသူများလိုက်ပါပြီး ယနေ့မွန်းလွဲပိုင်းတွင် ဟူပေပြည်နယ်၊ Sandouping မြို့ရှိ Three Gorges Dam သို့သွားရောက် ကြည့်ရှုလေ့လာသည်။

ဦးစွာတပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် Three Gorges Project Exhibition Centre သို့ရောက်ရှိရာ Three Gorges Dam တည်ဆောက်ခဲ့မှု အခြေအနေများအား ဗီဒီယိုမှတ်တမ်းများဖြင့် ရှင်းလင်းပြသသည်။ ထို့နောက် တပ်မတော် ကာကွယ်ရေးဦးစီးချုပ်နှင့်အဖွဲ့ဝင်များသည် Three Gorges Dam ပုံစံငယ်နှင့် ပြတိုက် အတွင်းပြသထားသည့် မှတ်တမ်းဓာတ်ပုံများ၊ Three Gorges Dam တွင်တည်ဆောက် ထားသည့် Shiplock နှင့် Three Gorges Dam တည်ဆောက်ထားမှုအခြေအနေများအား ကြည့်ရှုလေ့လာကြရာ ဆန်းရှာဆည်မြောင်းတာတမံစီမံခန့်ခွဲရေးဌာန၊ နည်းပညာ စီမံခန့်ခွဲရေးရုံးဥက္ကဋ္ဌ Mr. Guo Mian Ming ကလိုက်လံရှင်းလင်းပြသကြသည်။

ထို့နောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် Three Gorges Left Bank Power Station သို့ရောက်ရှိကြပြီး လျှပ်စစ်ဓာတ်အားထုတ်လုပ်နေမှု အခြေအနေများအား ကြည့်ရှုလေ့လာကြရာ လျှပ်စစ်ထုတ်လုပ်ရေးရုံးအကြီးအကဲ Mr. Li Zhi Xiang ကလိုက်လံရှင်းလင်း ပြသသည်။ ယင်းနောက်တပ်မတော်ကာကွယ်ရေးဦးစီးချုပ်သည် စက်ရုံရှိဧည့်သည်တော် မှတ်တမ်းစာအုပ်တွင် လက်မှတ်ရေးထိုးပြီး အဖွဲ့ဝင်များနှင့်အတူ Three Gorges Dam ရှေ့တွင် အမှတ်တရစုပေါင်း ဓာတ်ပုံရိုက်ကြသည်။

အဆိုပါ Three Gorges Dam သည်ဟူပေပြည်နယ်၊ Yichang ကောင်တီ၊ Yiling ခရိုင်၊ Sandouping မြို့အနီးတွင်တည်ရှိပြီး ၁၉၉၄ ခုနှစ်တွင်ရေကြီးမှုထိန်းချုပ်ရေး၊ လျှပ်စစ်ဓာတ်အား ထုတ်လုပ်ရေးနှင့် ရေကြောင်းသွားလာမှုအဆင်ပြေစေရန်ရည်ရွယ်၍ တရုတ်နိုင်ငံပိုင် China Three Gorges Corporation ကတည်ဆောက်ခဲ့ခြင်းဖြစ်သည်။ ဆည်အမျိုးအစားမှာ Concrete Gravity အမျိုးအစားဖြစ်ပြီး တမံအလျား ၂၃၃၅ မီတာ၊ အမြင့် ၁၈၁ မီတာ၊ အောက်ခြေအကျယ် ၁၁၅ မီတာ၊ တမံထိပ်ပိုင်းအကျယ် ၄၀ မီတာရှိ ကာ ရေလှောင်ပမာဏမှာ ၃၁၄၀၀၀၀၀ ဧကပေဖြစ်သည်။ အဆိုပါ Three Gorges Dam တွင် Generator ရ၀၀ မဂ္ဂါ၀ပ် ၃၂ လုံး၊ ၅၀ မဂ္ဂါ၀ပ် ၂ လုံး တပ်ဆင်ထားကာနှစ်စဉ် လျှပ်စစ်စွမ်းအင်ပမာဏ ၈၇ တာရာဝပ်နာရီအထိထုတ်လုပ်ပေးပြီး နိုင်ငံ၏ အလယ်ပိုင်းသို့ ၅၂ ရာခိုင်နှုန်း၊ အရှေ့ပိုင်းသို့ ၃၂ ရာခိုင်နှုန်း၊ ကွမ်းတုံပြည်နယ်သို့ ၁၆ ရာခိုင်နှုန်းဖြန့်ဖြူး လျက်ရှိသည်။ Three Gorges Dam တွင် သင်္ဘောများဖြတ်သန်းသွားလာနိုင်ရန်အတွက် Two Way, Five-Step System Shiplock တစ်ခုနှင့် One Way, One Step Elevator တစ်ခုအားတပ်ဆင်ထားကြောင်းသိရှိရပြီး အဆိုပါဆည်ကြီးတည်ဆောက်မှုကုန်ကျငွေမှာ တရုတ်ယွမ်ငွေ ၁၈၀ ဘီလီယံ(အမေရိကန်ဒေါ်လာ ၂၇ ဒသမ ၆ ဘီလီယံ)ဖြစ်ကြောင်း သိရှိရသည်။

ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သည့် မြန်မာ့တပ်မတော်ချစ်ကြည်ရေးကိုယ်စားလှယ်အဖွဲ့သည် ဟူပေပြည်နယ် စစ်ဒေသ၊ စစ်ဒေသမှူး Maj. Gen. Ma Tao ကတည်ခင်းဧည့်ခံသည့် ဂုဏ်ပြုညစာ စားပွဲအခမ်းအနားသို့ တက်ရောက်ခဲ့ကြသည်။