နေပြည်တော် ဇန်နဝါရီ – ၁၃
စစ်ကိုင်းတိုင်းဒေသကြီး၊ ချင်းပြည်နယ်နှင့် နာဂကိုယ်ပိုင်အုပ်ချုပ်ခွင့်ရဒေသများ ရှိ ဝေးလံခေါင်ဖျား၍ လမ်းပန်းဆက်သွယ်ရေးခက်ခဲသည့်ဒေသများမှ ဒေသခံပြည်သူ များ၏ ကျန်းမာရေးကဏ္ဍမြှင့်တင်ပေးရန်အတွက် ဆရာဝန်လိုအပ်လျက်ရှိသော ဆေးရုံ များတွင် တာဝန်ထမ်းဆောင်ခဲ့သည့် တပ်မတော်သားဆရာဝန်များအား ဂုဏ်ပြုပွဲ အခမ်းအနားကို ယနေ့နံနက်ပိုင်းတွင် ဘုရင့်နောင်ရိပ်သာ၌ ကျင်းပပြုလုပ်ရာ နိုင်ငံတော် စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်၍ ဂုဏ်ပြုအမှာစကားပြောကြားသည်။
အခမ်းအနားသို့ နိုင်ငံတော်စီမံအုပ်ချုပ်ရေးကောင်စီဒုတိယဥက္ကဋ္ဌ ဒုတိယ တပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်း၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး မောင်မောင်အေး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး မိုးအောင်၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်၊ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာ သက်ခိုင်ဝင်း၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ မြန်မာနိုင်ငံ စစ်မှုထမ်းဟောင်းအဖွဲ့၊ ဗဟိုအမှုဆောင်ဥက္ကဋ္ဌ၊ ချင်းပြည်နယ်နှင့် နာဂကိုယ်ပိုင်အုပ်ချုပ် ခွင့်ရဒေသများရှိ ဝေးလံခေါင်ဖျားဒေသများတွင် တာဝန်ထမ်းဆောင်ခဲ့ကြသည့် တပ်မတော်သားဆရာဝန်များ တက်ရောက်ကြသည်။
ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် က ဂုဏ်ပြုအမှာစကားပြောကြားရာတွင် ယခုကဲ့သို့ နိုင်ငံတော်၏ ဝေးလံခေါင်ဖျား သည့်ဒေသများတွင် ပြည်သူလူထု ကျန်းမာရေးစောင့်ရှောက်မှုတာဝန်ကို ထမ်းဆောင် နိုင်ခဲ့သည့်အတွက် ဝမ်းမြောက်ဂုဏ်ယူကြောင်းကို ဦးစွာ ပြောကြားလိုပါကြောင်း။
နိုင်ငံ၏ ပထဝီမြေပြင်အနေအထားနှင့် ဝေးလံခေါင်ဖျားဒေသများ၏ ကျန်းမာရေးအခြေအနေ
မိမိတို့နိုင်ငံသည် တိုင်းရင်းသားပေါင်းစုံ စုပေါင်းနေထိုင်ကြပြီး တောတောင် ရေမြေ၊ တောင်တန်း၊ မြေပြန့်နှင့် မြစ်ဝှမ်းလွင်ပြင်အစရှိသည့် မြေမျက်နှာသွင်ပြင် စုံလင်သည့် နိုင်ငံတစ်ခုဖြစ်ကြောင်း၊ ထိုကဲ့သို့သောဒေသများတွင် မိမိတို့တိုင်းရင်းသား များသည် နေရာအနှံ့ ပျံ့နှံ့နေထိုင်နေကြသည်ကိုလည်း တွေ့ရမည်ဖြစ်ကြောင်း၊ သွားလာရခက်ခဲသည့် တောင်တန်းဒေသများတွင် နေထိုင်ကြသည့် တိုင်းရင်းသားများ သည် ကျန်းမာရေးစောင့်ရှောက်မှုနှင့် ပတ်သက်ပါက လက်လှမ်းမမီခဲ့သည့်အတွက် ကျန်းမာရေးအဆင့်အတန်းသည် ခေတ်အဆက်ဆက် နိမ့်ကျခဲ့သည်ကိုလည်း တွေ့ရ မည် ဖြစ်ကြောင်း။
ချင်းပြည်နယ်၏ လက်ရှိကျန်းမာရေးအခြေအနေကို လေ့လာကြည့်မည်ဆိုပါက ၂၀၂၀ ပြည့်နှစ် ထုတ်ပြန်ချက်များအရ မြန်မာနိုင်ငံ၏ မျှော်မှန်းသက်တမ်း (Life Expectancy at Birth) သည် ၆၇ နှစ် ဖြစ်ပြီး ချင်းပြည်နယ်၏ မျှော်မှန်းသက်တမ်း သည် ၆၃.၃ နှစ်ဖြစ်သည့်အတွက် တစ်နိုင်ငံလုံးအတိုင်းအတာအနေဖြင့် အနိမ့်ဆုံးဖြစ် သည်ကို တွေ့ရှိရမည်ဖြစ်ကြောင်း၊ ထို့အပြင် ၁ နှစ်အောက်ကလေးသေဆုံးနှုန်းသည် တစ်နိုင်ငံလုံးအတိုင်းအတာဖြင့် ကလေးအရှင် ၁၀၀၀ မွေးတိုင်း ၁၂ ဦးရှိပြီး ချင်းပြည် နယ်၌ ၁၈ ဦး၊ ၅ နှစ်အောက်ကလေး သေဆုံးနှုန်းမှာ တစ်နိုင်ငံလုံး အတိုင်းအတာဖြင့် ကလေးအရှင် ၁၀၀၀ မွေးတိုင်း ၁၅ ဦးရှိပြီး ချင်းပြည်နယ်၌ ၂၅ ဦး ရှိသည်ကို တွေ့ရှိ ရမည်ဖြစ်ကြောင်း၊ မိခင်သေဆုံးမှုအနေဖြင့် တစ်နိုင်ငံလုံးအတိုင်းအတာဖြင့် ကလေး အရှင် ၁ သိန်း မွေးတိုင်း ၁၀၂.၇ ဦး ရှိပြီး ချင်းပြည်နယ်၌ ၁၅၈ ဦးခန့် ရှိသည့်အတွက် ပြည်နယ်နှင့် တိုင်းဒေသကြီးများတွင် အမြင့်ဆုံးဖြစ်နေသည်ကို တွေ့ရှိရမည်ဖြစ် ကြောင်း၊ ထို့အပြင် ငါးနှစ်အောက်ကလေးငယ်များ၌ အာဟာရချို့တဲ့မှုများ အနေဖြင့် တစ်နိုင်ငံလုံး အတိုင်းအတာအနေဖြင့် ၂၆.၇ ရာခိုင်နှုန်းရှိရာ ချင်းပြည်နယ်ရှိ ကလေး ငယ်များ၏ ၄၀ ရာခိုင်နှုန်းသည် အာဟာရချို့တဲ့နေသည်ကိုလည်း တွေ့ရှိရမည်ဖြစ် ကြောင်း၊ ထို့ကြောင့် ထိုကဲ့သို့ ဝေးလံခေါင်ဖျားပြီး ကျန်းမာရေးစောင့်ရှောက်မှုများကို လက်လှမ်းမမီသည့် တိုင်းရင်းသားဒေသများကို မိမိတို့တပ်မတော်အနေဖြင့် ကျန်းမာ ရေးစောင့်ရှောက်မှုများ ပေးသွားရမည်ဖြစ်ကြောင်း။
ချင်းပြည်နယ်နှင့် နာဂကိုယ်ပိုင်အုပ်ချုပ်ခွင့်ရဒေသများ၌ တပ်မတော်သား ဆေးမှူးအရာရှိများ တာဝန်ထမ်းဆောင်ခဲ့မှု
ထိုကဲ့သို့ ကျန်းမာရေးစောင့်ရှောက်မှုပေးနိုင်ရန်အတွက် တပ်မတော်သား ဆေးမှူးအရာရှိများကို ၂၀၁၆ ခုနှစ်ကတည်းက စေလွှတ်ခဲ့ရာ ပထမအကြိမ် ၄၄ ဦး၊ ဒုတိယအကြိမ် ၄၄ ဦး၊ တတိယအကြိမ် ၄၆ ဦးနှင့် စတုတ္တအကြိမ်တွင် ၁၈ ဦးဖြင့် ဆေးမှူးအရာရှိ (၁၅၂)ဦးကို လေးကြိမ်ခွဲ၍ စေလွှတ်နိုင်ခဲ့ပြီးဖြစ်ကြောင်း၊ တတိယ အကြိမ် ဆေးအကာအကွယ်ပေးတာဝန်များကို ထမ်းဆောင်ရန်အတွက် ဆေးမှူး အရာ ရှိ ၄၆ ဦးကို စေလွှတ်ခဲ့ရာ ၄၄ ဦး ပြန်လည်ရောက်ရှိလာခဲ့ပြီး ၂ ဦးသည် လုံလဲ တိုက်နယ်ဆေးရုံတွင် တာဝန်ထမ်းဆောင်ရင်း အကြမ်းဖက်သမားများ၏ တိုက်ခိုက်မှု ကိုခံခဲ့ရသည့်အတွက် ကျဆုံးခဲ့ရသည်ကိုလည်း စိတ်မကောင်းဖွယ် တွေ့မြင်ကြရမည် ဖြစ်ကြောင်း၊ တတိယအကြိမ်စေလွှတ်ခဲ့သည့် တပ်မတော်သား ဆေးမှူးများသည် တွန်းဇံ၊ မတူပီ၊ မှောင်တလန်၊ လဟယ်နှင့် နန်းယွန်းအစရှိသည့် ဒေသများတွင်ရှိသည့် မြို့နယ် ဆေးရုံ၊ တိုက်နယ်ဆေးရုံနှင့် ကျေးလက်ကျန်းမာရေး ဆေးပေးခန်း ၂၃ နေရာ ၌ ၂ နှစ်နှင့် ၃ လကြာ တာဝန်ထမ်းဆောင်ခဲ့ကြခြင်းဖြစ်ကြောင်း၊ ထိုအထဲမှ ဆေးမှူး အရာရှိနှစ်ဦးဖြစ်သည့် ဗိုလ်ကြီး လှိုင်မြင့်ထွန်းနှင့် ဗိုလ်ကြီး ဝင်းကျော် တို့နှစ်ဦးသည် ကျရာတာဝန်များကို စွမ်းစွမ်းတမံဆောင်ရွက်နိုင်ခဲ့သည့်အတွက် တပ်မတော်ကာကွယ် ရေး ဦးစီးချုပ်၏ ဂုဏ်ထူးဆောင်လက်မှတ်ချီးမြှင့်ခြင်းကို ခံခဲ့ရသည်ကိုလည်း တွေ့ရ မည်ဖြစ်ကြောင်း။
လူတစ်ဦးချင်းတစ်ယောက်ချင်းစီ၏ဘဝများ ရှင်သန်ရပ်တည်ရန် တစ်ဦးချင်း စီ၏ မျှော်လင့်ချက်ပန်းတိုင်များ ရှင်သန်နေရန်လိုကြောင်း၊ ပြည်သူတစ်ဦးချင်းစီ၏ မျှော်လင့်ချက်ပန်းတိုင် ရှင်သန်ခြင်းမှသည် မိသားစုနှင့် နိုင်ငံတော်၏ မျှော်လင့်ချက် ပန်းတိုင်များ ရှင်သန်စေပြီး လူ့အဖွဲ့အစည်းတစ်ခုလုံး၏ အောင်မြင်မှုကို ရရှိလာနိုင် မည်ဖြစ်ကြောင်း၊ ထို့ကြောင့် ထိုကဲ့သို့ဝေးလံခေါင်ဖျားသည့် ဒေသများ၌ တာဝန် ထမ်းဆောင်ခဲ့သည့် ဆေးမှူးအရာရှိများအနက် ၇၆ ဦးကို ဆေးပညာမဟာသိပ္ပံ သင်တန်းကို တိုက်ရိုက်တက်ရောက်ခွင့်ပြုခဲ့ပြီးဖြစ်သည်ကို တွေ့ရမည်ဖြစ်ကြောင်း၊ ဆေးမှူးအရာရှိများအနေဖြင့်လည်း မိမိတို့၏ဘဝ မျှော်လင့်ချက်ပန်းတိုင်ကို ရောက်ရှိ အောင် မျက်ခြေမပြတ် ဆက်လက်ကြိုးပမ်းအားထုတ်ခြင်းဖြင့် မိမိအကျိုး၊ မိမိ မိသားစု အကျိုး၊ နိုင်ငံတော်နှင့် တပ်မတော်အကျိုးကို တိုးတက်အောင် ဆောင်ရွက်သွားကြ လိမ့်မည်ဟု ယုံကြည်ပါကြောင်း၊ ယခုရရှိခဲ့သည့် ဇွဲ၊ လုံ့လ၊ ဝီရိယနှင့် စိတ်ရှည် သည်းခံ မှု၊ ရောင့်ရဲတင်းတိမ်မှုများကို မလျှော့ကြရန်မှာကြားလိုကြောင်း။
ချင်းပြည်နယ်နှင့် နာဂကိုယ်ပိုင်အုပ်ချုပ်ခွင့်ရဒေသများ၌ တာဝန် ထမ်းဆောင် ခဲ့သည့် ဆေးမှူးအရာရှိများအနက် ထူးခြားချက်အနေဖြင့် တပ်မတော်သား ဆေးမှူး အရာရှိတစ်ဦးသည် ၂၀၁၈ ခုနှစ်တွင် မတူပီမြို့နယ် ပြည်သူ့ဆေးရုံမှာ ပထမအကြိမ် သွားရောက် တာဝန်ထမ်းဆောင်ခဲ့ပြီး၊ ယခု ၂၀၂၂ ခုနှစ်တွင်လည်း ဒုတိယအကြိမ် အနေဖြင့် မိမိဆန္ဒအလျောက် လဟယ်မြို့နယ် ပြည်သူ့ဆေးရုံတွင် ထပ်မံ သွားရောက်တာဝန် ထမ်းဆောင်လျက်ရှိသည်ကို တွေ့ရသည့်အတွက် ချီးကျူးဂုဏ်ယူ ကြောင်းကို ပြောကြားလိုပါကြောင်း။
တပ်မတော်အနေဖြင့် ယခုကဲ့သို့ ချင်းပြည်နယ်နှင့် နာဂကိုယ်ပိုင်အုပ်ချုပ်ခွင့် ရ ဒေသများတွင်ရှိသည့် တိုင်းရင်းသားများကို ကျန်းမာရေး စောင့်ရှောက်မှုပေးခဲ့ရာ တွင် ပထမအကြိမ်အနေဖြင့် ဒေသခံပြည်သူလူထု ၂၀၂,၃၃၂ ဦး၊ ဒုတိယအကြိမ် အနေ ဖြင့် ၁၇၁,၀၈၄ ဦး၊ တတိယ အကြိမ်အနေဖြင့် ၉၃,၆၀၀ ဦး၊ စုစုပေါင်း ၄၆၇,၀၁၆ ဦးတို့ကို ပြုစုစောင့်ရှောက်မှုများကို ပေးနိုင်ခဲ့သည်ကို တွေ့ရှိရမည် ဖြစ်ပါကြောင်း၊ ကျန်းမာ ရေးစောင့်ရှောက်မှုများအနေဖြင့် ဆေးကုသမှုဆိုင်ရာရောဂါ၊ ခွဲစိတ်ရောဂါ၊ ကလေးနှင့် သားဖွားမီးယပ်ရောဂါ၊ မျက်စိနှင့် နား၊ နှာခေါင်းရောဂါ၊ အစာအိမ်နှင့် အူလမ်းကြောင်း ရောဂါ အစရှိသည့် ရောဂါများခံစားနေရသည့် ဒေသခံပြည်သူလူထုကို ပြုစု စောင့်ရှောက်မှုပေးနိုင်ခဲ့ခြင်းဖြစ်ကြောင်း၊ ယင်းသည် မိမိတို့တပ်မတော်အနေဖြင့် တိုင်းရင်းသားပြည်သူများ၏ အရေးနှင့်ပတ်သက်ပါက အစဉ်အမြဲဦးထိပ်ထား ဆောင်ရွက်ပေးလျက်ရှိသည်ကို ဖော်ပြလျက်ရှိသည့် အချက်များပင်ဖြစ်ကြောင်း။
ပြည်သူလူထု ကျန်းမာရေးစောင့်ရှောက်မှုများကို အစဉ်အဆက် ဆောင်ရွက်ပေးလျက်ရှိ
ယခုအချိန်သည် နိုင်ငံတကာနှင့် နိုင်ငံအတွင်း၌ပါ ကပ်ရောဂါ ဘေးဒဏ်များနှင့် ကျန်းမာရေးဆိုင်ရာ လူ့စွမ်းအားအရင်းအမြစ်များ လျော့နည်းကျဆင်းမှုများ ကြုံတွေ့ နေရသည်ကို တွေ့ရမည်ဖြစ်ကြောင်း၊ ကမ္ဘာ့ကျန်းမာရေးအဖွဲ့က နိုင်ငံများအနေဖြင့် လူဦးရေ ၁၀၀၀ တွင် အနည်းဆုံး ဆရာဝန် ၁ ဦးနှင့် ကျန်းမာရေးလုပ်သား အနည်းဆုံး ၂.၃ ဦး ရှိသင့်ကြောင်း သတ်မှတ်ထားရာ မြန်မာနိုင်ငံအနေဖြင့် လက်ရှိ အချိန်တွင် လူဦးရေ ၁၀၀၀ ၌ ဆရာဝန် ၀.၃၇ ဦး၊ ကျန်းမာရေးလုပ်သား ၁.၄၇ ဦး ရှိသည်ကို တွေ့ရှိရပြီး ကမ္ဘာ့ကျန်းမာရေးအဖွဲ့၏ သတ်မှတ်ချက်ထက် လျော့နည်းနေသည်ကို လည်း တွေ့ရှိရမည်ဖြစ်ကြောင်း၊ မကြာသေးမီက ဖြစ်ပွားခဲ့သော နိုင်ငံရေး ပဋိပက္ခတွင် ကျန်းမာရေးဝန်ထမ်းအချို့သည် လုပ်ငန်းခွင် စွန့်ခွာမှုများ ပြုလုပ်ခဲ့သည့်အတွက် နိုင်ငံ အတွင်း၌ရှိသည့် ကျန်းမာရေးဝန်ထမ်းအင်အားမှာ များစွာလျော့နည်းခဲ့ရပါကြောင်း၊ ထိုကဲ့သို့လျော့နည်းခဲ့သည့်အတွက် လစ်ဟာသွားသည့် ကျန်းမာရေးစောင့်ရှောက်မှု ကဏ္ဍကို ဖြည့်ဆည်းနိုင်ရန် တပ်မတော်ဆေးရုံ၊ ဆေးပေးခန်းများတွင် ပြည်သူလူထု ကျန်းမာရေးစောင့်ရှောက်မှုများကို တိုးမြှင့်ဆောင်ရွက်ခဲ့ရာ ယခုအချိန်ထိ ပြင်ပလူနာ ၄၄၉,၈၉၂ ဦး၊ ဆေးရုံတက်လူနာ ၁၃၇,၀၈၀ ဦးကို ပြုစုစောင့်ရှောက်မှုပေးနိုင်ခဲ့ပြီး ဖြစ်သည်ကို တွေ့ရမည်ဖြစ်ကြောင်း။
မိမိတို့တပ်မတော်သည် ခေတ်အဆက်ဆက်တွင်လည်း နိုင်ငံ့အရေး၊ တိုင်းရင်း သား ပြည်သူများအရေးတို့နှင့် ပတ်သက်ပါက အစဉ်အမြဲဆောင်ရွက်ခဲ့သည့် အဖွဲ့ အစည်းဖြစ်ကြောင်း၊ ထိုကဲ့သို့ ဆောင်ရွက်သည့်နေရာတွင် တပ်မတော်၏ မူလတာဝန် များဖြစ်သည့် တည်ငြိမ်အေးချမ်းရေးနှင့် လုံခြုံရေးကိုဆောင်ရွက်သည့်နည်းတူ ပြည်သူ လူထုကျန်းမာရေးနှင့် ပညာရေးများကိုလည်း တစ်ဖက်တစ်လမ်းက ဆောင်ရွက် လျက်ရှိကြောင်း၊ ယခုကဲ့သို့ ဝေးလံခေါင်ဖျားသည့်ဒေသများတွင် ကျန်းမာရေး စောင့်ရှောက်မှုတာဝန်များ ထမ်းဆောင်နိုင်ခဲ့သည့်အတွက်လည်း ချီးကျူး ဂုဏ်ပြု ကြောင်းကိုပြောကြားလိုကြောင်း၊ နောင်လာမည့် အနာဂတ်တွင်လည်း ဆရာဝန် တစ်ဦးအနေဖြင့် ပညာရပ်ပိုင်းဆိုင်ရာတိုးတက်ရေးကို ဆောင်ရွက်ရမည့်နည်းတူ တိုင်းပြည်အကျိုး၊ ပြည်သူအကျိုးကိုလည်း ဦးထိပ်ထား ဆက်လက်ဆောင်ရွက်သွား ကြရန် မှာကြားလိုကြောင်းဖြင့် ပြောကြားသည်။
ဂုဏ်ပြုလက်ဆောင်များအသီးသီးပေးအပ်
ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေး ဦးစီးချုပ်က ဝေးလံခေါင်ဖျားဒေသများတွင် တာဝန်ထမ်းဆောင်ခဲ့ကြသည့် တပ်မတော် သားဆရာဝန်များအား အမှတ်တရဂုဏ်ပြုလက်ဆောင်များပေးအပ်ရာ တပ်မတော် သား ဆရာဝန်များ ကိုယ်စား ဆေးမှူးသုံးဦးက လက်ခံရယူသည်။
တပ်မတော်အကြီးအကဲ၏ လမ်းညွှန်ချက်နှင့်အညီ ကျန်းမာရေးအဆင့်အတန်း မြင့်မားလာစေရေးအတွက်သာမက ပြည်သူ့အကျိုးပြုလုပ်ငန်းများကိုပါ ဆောင်ရွက်ပေးနိုင်ခဲ့
ယင်းနောက် ဝေးလံခေါင်ဖျားဒေသများတွင် တာဝန်ထမ်းဆောင်ခဲ့ကြသည့် တပ်မတော်သားဆရာဝန်များကိုယ်စား ဆေးမှူး ဗိုလ်ကြီး လှိုင်မြင့်ထွန်း က ဆေးဝါး ကုသခြင်းလုပ်ငန်းများဆောင်ရွက်ခဲ့ရာတွင် တွေ့ကြုံခဲ့ရမှုများအား ရှင်းလင်းတင်ပြပြီး ကျေးဇူးတင်စကား ပြန်လည်ပြောကြားရာတွင် ကျန်းမာရေးစောင့်ရှောက်မှုအပြည့်အဝ မရရှိသေးသည့် ဒေသများသို့ သွားရောက်တာဝန်ထမ်းဆောင်ခဲ့စဉ် မိမိတို့၏ အသေး စိတ် လိုအပ်ချက်များကိုဖြည့်ဆည်းပေးရုံသာမက နယ်မြေခံဒေသခံလူထုအပေါ် ကျန်းမာရေးစောင့်ရှောက်မှုအပြည့်အဝပေးနိုင်ရေးအတွက် လိုအပ်သည့် ဆေးနှင့်ဆေး ပစ္စည်းများ၊ အုပ်ချုပ်ထောက်ပံ့မှုပစ္စည်းများ၊ ကိုဗစ်-၁၉ ရောဂါ ကာကွယ်ကုသ ရေး ပစ္စည်းများကို ထောက်ပံ့ပေးခဲ့သည့်အတွက် ယခုကဲ့သို့ မိမိတို့၏ တာဝန်ဝတ္တရား များကို အောင်မြင်စွာ ထမ်းဆောင်နိုင်ခဲ့ခြင်းဖြစ်ပါကြောင်း၊ နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ်၏ လမ်းညွှန်မှုဖြင့် နယ်မြေခံ ပြည် သူလူထု၏ ကျန်းမာရေးအဆင့်အတန်းမြင့်မားလာစေရေးအတွက်သာမက ပြည်သူ့ အကျိုးပြုလုပ်ငန်းများ၊ ဒေသဘက်စုံတိုးတက်ရေးလုပ်ငန်းများနှင့် အခြေခံပညာစာပေ သင်ကြားရေးများတွင်လည်း ဝိုင်းဝန်းကူညီဆောင်ရွက်ပေးနိုင်ခဲ့ပါကြောင်း၊ ဒေသခံ ပြည်သူလူထု၏ နွေးထွေးသည့် တုန့်ပြန်မှုများကိုလည်း ရရှိခဲ့ပါကြောင်း၊ မိမိတို့ တာဝန်ထမ်းဆောင်စဉ်ကာလအတွင်း တာဝန်များကို အောင်မြင်စွာ ထမ်းဆောင်နိုင် ရေးအတွက် လိုအပ်ချက်မှန်သမျှကို ဖြည့်ဆည်းပေးခဲ့ပြီး လမ်းညွှန်ပြသစောင့်ရှောက် ပေးခဲ့သည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီး ချုပ်နှင့် တာဝန်ရှိသူများအားလုံးကို ကျေးဇူးအထူးတင်ရှိပါကြောင်းနှင့် နိုင်ငံတော်နှင့် တပ်မတော်အတွက် ကျရာတာဝန်များကို ကျေပွန်စွာ ဆက်လက်ထမ်းဆောင်သွား မည်ဖြစ်ပါကြောင်းဖြင့် ပြောကြားသည်။
ထို့နောက် အခမ်းအနားတက်ရောက်လာကြသူများနှင့် ဝေးလံခေါင်ဖျားဒေသ များတွင် တာဝန်ထမ်းဆောင်ခဲ့ကြသည့် တပ်မတော်သားဆရာဝန်များအား ဂုဏ်ပြု လက်ဖက်ရည်ဝိုင်းဖြင့် တည်ခင်းဧည့်ခံခဲ့ပြီး ဂုဏ်ပြုလက်ဖက်ရည်သုံးဆောင်နေစဉ် အတွင်း မြဝတီတေးဂီတအဖွဲ့က တေးသီချင်းများဖြင့် ဂုဏ်ပြုဖျော်ဖြေကြသည်။
အခမ်းအနားအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော် ကာကွယ်ရေးဦးစီးချုပ်နှင့် အဖွဲ့ဝင်များသည် ဝေးလံခေါင်ဖျားဒေသများတွင် တာဝန် ထမ်းဆောင်ခဲ့ကြသည့် တပ်မတော်သားဆရာဝန်များအား ရင်းရင်းနှီးနှီး လိုက်လံ နှုတ်ဆက်ခဲ့သည်။
စစ်ကိုင်းတိုင်းဒေသကြီး၊ ချင်းပြည်နယ်နှင့် နာဂကိုယ်ပိုင်အုပ်ချုပ်ခွင့်ရဒေသများ ရှိ ဝေးလံခေါင်းဖျား၍ လမ်းပန်းဆက်သွယ်ရေးခက်ခဲသော ဒေသများမှ ဒေသခံပြည်သူ များ၏ ကျန်းမာရေးကဏ္ဍမြှင့်တင်ပေးရန်အတွက် ဆရာဝန်လိုအပ်လျက်ရှိသည့် ဆေးရုံများတွင် တပ်မတော်သားဆရာဝန်များ တာဝန်ထမ်းဆောင်ခဲ့မှုအနေဖြင့် ပထမ အကြိမ်အဖြစ် ၂၀၁၆ ခုနှစ်တွင် တပ်မတော်သားဆရာဝန် ၄၄ ဦးဖြင့်လည်းကောင်း၊ ဒုတိယအကြိမ်အဖြစ် ၂၀၁၈ ခုနှစ်တွင် တပ်မတော်သားဆရာဝန် ၄၄ ဦးဖြင့်လည်း ကောင်း၊ တတိယအကြိမ်အဖြစ် ၂၀၂၀ ပြည့်နှစ်တွင် တပ်မတော်သားဆရာဝန် ၄၆ ဦးဖြင့်လည်းကောင်း အသီးသီး တာဝန်လဲလှယ်ထမ်းဆောင်ခဲ့ကြပြီး ယခု ၂၀၂၂ ခုနှစ် တွင်လည်း တပ်မတော်သားဆရာဝန် ၁၈ ဦးသည် စတုတ္ထအကြိမ်အဖြစ် သွားရောက် တွဲဖက်တာဝန်ထမ်းဆောင်လျက်ရှိကြောင်း၊ တာဝန်လဲလှယ်ထမ်းဆောင်ချိန်များတွင် လည်း ဒေသခံပြည်သူများက တပ်မတော်သားဆရာဝန်များနှင့် မိသားစုများကို လှိုက်လှဲနွေးထွေးစွာကြိုဆိုခဲ့ကြကြောင်း၊ ထိုသို့ သွားရောက်တာဝန်ထမ်းဆောင်စဉ် ၎င်းတို့၏ မိသားစုများသည်လည်း အတူတကွလိုက်ပါကြပြီး ကျရာတာဝန်များနှင့် ဒေသဖွံ့ဖြိုးတိုးတက်ရေးလုပ်ငန်းများကို အတူတကွ တစ်ဖက်တစ်လမ်းမှ ကူညီ ဆောင်ရွက် ပေးခဲ့ကြကြောင်းသိရှိရသည်။
တပ်မတော်သားဆရာဝန်များအနေဖြင့် စတင်တာဝန်ထမ်းဆောင်ချိန်မှစ၍ တတိယအကြိမ်အထိ ဒေသခံတိုင်းရင်းသားပြည်သူ စုစုပေါင်း ၄၆၇,၀၁၆ ဦးတို့ကို ကျန်းမာရေးဆိုင်ရာ ပြုစုစောင့်ရှောက်မှုများဆောင်ရွက်ပေးနိုင်ခဲ့ကြောင်းနှင့် ဒေသခံ ပြည်သူတို့၏ ကျန်းမာရေးစောင့်ရှောက်မှု လုပ်ငန်းများအပြင် ပြည်သူ့အကျိုးပြု လုပ်ငန်းများ၊ စားဝတ်နေရေးအထောက်အကူဖြစ်စေရန် စိုက်ပျိုးမွေးမြူရေးဆိုင်ရာ အသိပညာပေးခြင်းများ၊ ဒေသဘက်စုံတိုးတက်ရေး လုပ်ငန်းများတွင်လည်း ဒေသခံ ပြည်သူများ၊ ဌာနဆိုင်ရာဝန်ထမ်းများနှင့်အတူ ဝိုင်းဝန်းကူညီဆောင်ရွက်ပေးနိုင်ခဲ့ပြီး မိမိတို့ တတ်မြောက်ထားသည့် ပညာရပ်များဖြင့် ဒေသခံပြည်သူတို့၏ အကျိုး၊ နိုင်ငံတော် အကျိုးကို တတ်စွမ်းသရွေ့ သယ်ပိုးထမ်းရွက်နိုင်ခဲ့ကြသဖြင့် ယခုကဲ့သို့ အခမ်းအနားဖြင့် ဂုဏ်ပြုခဲ့ခြင်းဖြစ်သည်။
