နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်    ဗိုလ်ချုပ်မှူးကြီး မင်းအောင်လှိုင်   (၂၀၂၃)ခုနှစ် တရုတ်နှစ်သစ်ကူးပွဲတော်အထိမ်းအမှတ် ချစ်ကြည်ရေး ဘက်စကက်ဘောပြိုင်ပွဲပိတ်ပွဲ နှင့်တရုတ်နှစ်သစ်ကူးပွဲတော်အခမ်းအနားသို့တက်ရောက်ချီးမြှင့်

နေပြည်တော်၊ ဇန်နဝါရီ – ၂၁

(၂၀၂၃)ခုနှစ် တရုတ်နှစ်သစ်ကူးပွဲတော်အထိမ်းအမှတ် ချစ်ကြည်ရေး   ဘက်စကက်ဘောပြိုင်ပွဲ ပိတ်ပွဲနှင့် တရုတ်နှစ်သစ်ကူးပွဲတော်အခမ်းအနားကို ယနေ့ ညနေပိုင်းတွင် ရန်ကုန်မြို့ရှိ အမျိုးသားအားကစားပြိုင်ပွဲရုံ(၁)သုဝဏ္ဏ၌ ကျင်းပ ပြုလုပ် ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇနီးဒေါ်ကြူကြူလှ တို့ တက်ရောက်ချီးမြှင့်သည်။

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး တို့အား မြန်မာနိုင်ငံဆိုင်ရာတရုတ်နိုင်ငံသံအမတ်ကြီး H.E. Mr. Chen Hai၊ မြန်မာနိုင်ငံ တရုတ်ကုန်သည်များအသင်းချုပ် ဥက္ကဋ္ဌ ဦးအိုင်ထွန်း၊ မြန်မာနိုင်ငံ ဘက်စကက်ဘောအဖွဲ့ချုပ် ဥက္ကဋ္ဌနှင့် တာဝန်ရှိသူများက လှိုက်လှဲနွေးထွေးစွာ ကြိုဆိုနှုတ်ဆက်ကြသည်။ ထို့နောက် (၂၀၂၃) ခုနှစ်တရုတ် နှစ်သစ်ကူး ပွဲတော် အထိမ်းအမှတ် ချစ်ကြည်ရေးဘက်စကက်ဘောပြိုင်ပွဲ ပိတ်ပွဲ အခမ်း အနားကို စတင်ကျင်းပပြုလုပ်ရာ ပြိုင်ပွဲဝင်အသင်းများမှ အားကစားသမားများ၊ တရုတ်ရိုးရာ နဂါးအကအဖွဲ့များနှင့် ခြင်္သေ့အကအဖွဲ့များ၊ ဘင်ခရာအဖွဲ့များ၊ ပန်းပွား အကအဖွဲ့ များက နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်အား ဘင်ခရာ တီးမှုတ်၍ အလေးပြုကြသည်။

ယင်းနောက် အမှတ်(၂)အခြေခံ ပညာအထက်တန်းကျောင်း(လသာ)မှ ကျောင်းသား၊ ကျောင်းသူလေးများ၏ ဘင်ခရာအဖွဲ့နှင့် ပန်းပွားအကအဖွဲ့တို့က ကွင်းအတွင်းနေရာ ယူကြပြီး ပန်းပွားအကများ၊ ဘင်ခရာစွမ်းရည်ပြမှုများဖြင့် လည်းကောင်း၊ တရုတ်ရိုးရာ နဂါးအကအဖွဲ့က စွမ်းရည်ပြသရုပ်ဖော်ကပြမှုများဖြင့်လည်းကောင်း အသီးသီး ဖျော်ဖြေ တင်ဆက်ကြသည်။

အခမ်းအနားသို့ နိုင်ငံတော်စီမံအုပ်ချုပ်ရေးကောင်စီ တွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦးနှင့်ဇနီး၊ ကောင်စီဝင်များ၊ ပြည်ထောင်စုဝန်ကြီးများနှင့် ဇနီးများ၊ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းနှင့်ဇနီး၊ ကာကွယ်ရေးဦးစီးချုပ် ရုံးမှ တပ်မတော်အရာရှိကြီးများနှင့်ဇနီးများ၊ မြန်မာနိုင်ငံဆိုင်ရာ တရုတ်နိုင်ငံ သံအမတ် ကြီး H.E. Mr. Chen Hai နှင့် တာဝန်ရှိသူများ၊ ရန်ကုန်တိုင်းစစ်ဌာနချုပ်တိုင်းမှူး၊ ပြည်ထောင်စုသမ္မတမြန်မာနိုင်ငံ ကုန်သည်များနှင့်စက်မှုလက်မှုလုပ်ငန်းရှင်များ အသင်း ချုပ်(UMFCCI)၊ မြန်မာနိုင်ငံ တရုတ်ကုန်သည်များအသင်းချုပ်၊ တရုတ်-မြန်မာ ချစ်ကြည်ရေးအသင်း၊ မြန်မာနိုင်ငံ ဘက်စကက်ဘောအဖွဲ့ချုပ်တို့မှ တာဝန်ရှိသူများ၊ ပြိုင်ပွဲဝင်ဘက်စကက်ဘောအသင်းများ၊ ဖိတ်ကြား ထားသည့် ဧည့်သည်တော်များ၊ တရုတ်နွယ်ဖွားမြန်မာနိုင်ငံသားများ နှင့် အားကစားနှင့်ကာယပညာသိပ္ပံ(ရန်ကုန်)မှ ကျောင်းသား၊ ကျောင်းသူများ တက်ရောက်ကြသည်။

ယင်းနောက် ချစ်ကြည်ရေးဘက်စကက်ဘောပြိုင်ပွဲအဖြစ် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးအသင်းနှင့် လူငယ်ဘက်စကက်ဘောအသင်းတို့က ပထမပွဲစဉ်အဖြစ်လည်းကောင်း၊ ဒုတိယပွဲစဉ်အဖြစ် မြန်မာနိုင်ငံဆိုင်ရာ တရုတ် ပြည်သူ့သမ္မတနိုင်ငံသံရုံးအသင်းနှင့် မြန်မာနိုင်ငံဘက်စကက်ဘောအားကစားသမား ဟောင်းကြီးများအသင်းတို့က ဒုတိယပွဲစဉ်အဖြစ်လည်းကောင်း အသီးသီးယှဉ်ပြိုင် ကစားကြရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး၊ အခမ်းအနားတက်ရောက်လာကြသူများက ကြည့်ရှုအားပေးကြသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် နှင့်ဇနီး၊ အခမ်းအနားတက်ရောက်လာကြသူများသည် တရုတ်နှစ်သစ်ကူးပွဲတော် ဖွင့်ပွဲအခမ်းအနားကျင်းပမည့် နေရာသို့ရောက်ရှိကြရာ တာဝန်ရှိသူများက တရုတ်ရိုးရာ ပုဝါဖြင့် ဂါရဝပြုကြသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်များ၊ ရန်ကုန်တိုင်းဒေသ ကြီး ဝန်ကြီးချုပ်၊ ရန်ကုန်တိုင်းစစ်ဌာနချုပ်တိုင်းမှူး၊ မြန်မာနိုင်ငံဆိုင်ရာ တရုတ်နိုင်ငံ ဒုတိယသံအမတ်ကြီးနှင့် တာဝန်ရှိသူများက တရုတ်နှစ်သစ်ကူးပွဲတော် ဖွင့်ပွဲအခမ်း အနားကို ဖဲကြိုးဖြတ်ဖွင့်လှစ်ပေးကြသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် မြန်မာနိုင်ငံဆိုင်ရာတရုတ်နိုင်ငံသံအမတ်ကြီးတို့က နှစ်သစ်ကူးပွဲတော်အခမ်းအနားကို စက်ခလုတ်နှိပ်ဖွင့်လှစ်ပေးသည်။

ယင်းနောက် တရုတ်နှစ်သစ်ကူးပွဲတော်ကို စတင်ကျင်းပရာ နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး၊ အခမ်းအနား တက်ရောက် လာကြသူများသည် တရုတ်ရိုးရာနဂါးအကအဖွဲ့များမှ ဂါရဝပြုကပြ ဖျော်ဖြေမှုကို ကြည့်ရှုအားပေးကြပြီး အကအဖွဲ့များနှင့်အတူ စုပေါင်းမှတ်တမ်းတင် ဓာတ်ပုံရိုက်ကူး ကြကာ တရုတ်ရိုးရာယဉ်ကျေးမှုပြခန်းများနှင့် ဆိုင်ခန်းများကို လှည့်လည် ကြည့်ရှုကြ သည်။ ၎င်းနောက် တရုတ်နှစ်သစ်ကူးပွဲတော်အခမ်းအနားအထိမ်းအမှတ် မီးရှုး မီးပန်း ပစ်ဖောက်မှုများကို ကြည့်ရှုအားပေးကြသည်။

ထို့နောက် (၂၀၂၃)ခုနှစ် တရုတ်နှစ်သစ်ကူးပွဲတော်အထိမ်းအမှတ် ချစ်ကြည်ရေး                     ဘက်စကက်ဘောပြိုင်ပွဲ ပိတ်ပွဲနှင့် တရုတ်နှစ်သစ်ကူးပွဲတော်အခမ်းအနား အထိမ်း အမှတ် ညစာစားပွဲကို ကျင်းပပြုလုပ်ရာ ဦးစွာတရုတ်ရိုးရာခြင်္သေ့မျက်လုံးဖွင့် မင်္ဂလာ အခမ်းအနားကိုပြုလုပ်ခဲ့ပြီး နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်နှင့်ဇနီးတို့က တရုတ် ရိုးရာခြင်္သေ့အား တရုတ်ထုံးတမ်းစဉ်လာများနှင့်အညီ ဂုဏ်ပြုဆေးခြယ်သပေးသည်။

ထို့နောက် နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် က တရုတ်နှစ်သစ်ကူးပွဲတော် နှစ်သစ်ဆုမွန်ကောင်းစကားပြောကြားရာတွင် ကမ္ဘာတွင် အသုံးများနေသည့် ပြက္ခဒိန်အရ နှစ်သစ်ကူးနေ့ကို ဇန်နဝါရီလ ၁ ရက်နေ့အဖြစ် ယေဘူယျမှတ်ယူကြပါကြောင်း၊ သို့သော်လည်း ကမ္ဘာပေါ်တွင် နေထိုင်ကြသည့် လူမျိုးစုများသည် ၎င်းတို့၏ကိုယ်ပိုင် ပြက္ခဒိန်နှင့် ကိုယ်ပိုင်နှစ်သစ်ကူးနေ့များ ရှိကြ ပါကြောင်း၊ မနက်ဖြန်တွင် ကျရောက်မည့် ၂၀၂၃ ခုနှစ်၊ ဇန်နဝါရီလ ၂၂ ရက်နေ့သည် လည်း လက်ရှိ ကမ္ဘာ့လူ့ဦးရေ အများဆုံးဖြစ်သည့်  တရုတ်လူမျိုးတို့၏ နှစ်သစ်ကူးနေ့ ဖြစ်ပါကြောင်း၊ ထိုကဲ့သို့သောနေ့တွင် နှုတ်ခွန်းဆက်စကား ပြောခွင့်ရသည့်အတွက် အင်မတန် ဝမ်းသာဂုဏ်ယူမိပါကြောင်း၊ နှစ်သစ်ကူးသည်ဆိုခြင်းသည် နှစ်ဟောင်းမှ နှစ်သစ်သို့ ကူးပြောင်းခြင်းဖြစ်ပါကြောင်း၊ ထိုကဲ့သို့ ကူးပြောင်းကြသည့် အခါ၌ မိမိတို့ အားလုံးသည် နှစ်ဟောင်းက ကြုံတွေ့ခဲ့ရသည့် အကောင်းအဆိုး၊ အကြောင်းအကျိုး များကို သေချာလေ့လာ စိစစ်ဝေဖန်ပိုင်းခြားပြီး နှစ်သစ်တွင် ပိုမိုကောင်းမွန် တိုးတက် အောင် အချင်းချင်းစည်းလုံးညီညွတ်စွာ ဝိုင်းဝန်းကူညီ ဆောင်ရွက်ကြရမည်ဖြစ်ပါ ကြောင်း၊ မိမိတို့အားလုံးဟုဆိုရာတွင် တစ်ဦးချင်း တစ်ယောက်ချင်းမှစ၍ မိသားစု အချင်းချင်း၊  ရပ်ကွက်အချင်းချင်း၊  မြို့အချင်းချင်းနှင့် နိုင်ငံအချင်းချင်းအထိ ပါဝင်ပါ ကြောင်း။

        ၂၀၂၃ ခုနှစ်သည် တရုတ်ရိုးရာယုန်နှစ်ဖြစ်ပါကြောင်း၊ တရုတ်ရာသီခွင်အရ လေးခုမြောက်နှစ် ဖြစ်ပြီး အဓိပ္ပါယ်မှာ ချစ်ခင်ခြင်း၊ ငြိမ်းချမ်းခြင်း၊ သာယာဝပြောခြင်း တို့ဖြစ်ကြောင်း၊ နှစ်သစ်ကြို အိမ်သန့်ရှင်းခြင်း၊ အိမ်တံခါးများတွင် မင်္ဂလာစာလုံးများ ကပ်ခြင်း၊ မည်မျှပင် အဝေးသို့ရောက်ရှိနေပါစေ မိသားစုများ ပြန်လည် ဆုံစည်းကြ ခြင်း၊ နှစ်သစ်ကူးထမင်းဝိုင်းကို မိသားစုနှင့် ဝိုင်းဖွဲ့စားသောက်ခြင်း၊ နှစ်သစ်ကူး၏ ပထမဆုံးခေါင်းလောင်းသံကိုစောင့်ခြင်း၊ ဆွေမျိုးများကို နှုတ်ဆက်ခြင်း စသည့် ချစ်စဖွယ်ရိုးရာဓလေ့များကို ဆောင်ရွက်ကြပါကြောင်း၊ ယနေ့ အခမ်းအနားတွင် လည်း တစ်အိမ်တည်းနေမိသားစုများ၊ တစ်မြေတည်းတစ်မိုးတည်း အောက်တွင်နေကြ သည့် ဆွေမျိုး၊ သားချင်း၊ မိတ်ဆွေများ ပြန်လည်စုစည်းတွေ့ဆုံပြီး နှစ်သစ်ကိုကြိုဆို ကြခဲ့ခြင်း ဖြစ်ပါကြောင်း၊ ယင်းသည် နှစ်သစ်ကူး၏ တန်ဖိုးရှိလှသည့် ပေါင်းစည်းမှု လည်း ဖြစ်ပါကြောင်း။

မြန်မာနိုင်ငံနှင့် တရုတ်နိုင်ငံတို့၏ ဆက်ဆံရေးသည် ရှေးမြန်မာဘုရင်များ လက်ထက်ကပင် ရွှေလမ်းငွေလမ်းခင်းကာ နှစ်ပြည်ထောင်ချစ်ကြည်ရေးကို တည် ထောင်ခဲ့ကြခြင်း ဖြစ်ပါကြောင်း၊ အေဒီ ၈၀၂ ခုနှစ်ခန့်က တရုတ်ပြည် ထန် မင်းဆက် ဘုရင်လက်ထက်၌ ပျူသံတမန်အဖွဲ့သည် တရုတ်ပြည်သို့သွားရောက်၍ အနုသုခုမ ပညာများဖြင့် ဖျော်ဖြေခဲ့သည့် မှတ်တမ်းများရှိခဲ့သကဲ့သို့ မြန်မာသက္ကရာဇ် ၆၄၀ ပြည့် နှစ်၊ ပုဂံမင်း နရသီဟပတေ့ လက်ထက်တွင်လည်း ဆရာတော် ရှင်ဒိသာပါမောက္ခသည် ငြိမ်းချမ်းရေးသံတမန်အဖြစ် တရုတ်ပြည်သို့ ကြွရောက်ခဲ့ဖူးကြောင်း၊ မြန်မာနိုင်ငံသည် ၁၉၄၉ ခုနှစ်၊ ဒီဇင်ဘာ ၁ ရက်၌  တရုတ်ပြည်သူ့သမ္မတနိုင်ငံကို အသိအမှတ်ပြုသည့် ကြေညာချက်တစ်ရပ် ထုတ်ပြန်ခဲ့ပါကြောင်း၊ နှစ်နိုင်ငံသံတမန်ဆက်ဆံရေးကိုလည်း ၁၉၅၀ ဇွန် ၈ ရက်တွင် စတင်နိုင်ခဲ့ပြီး လာမည့် ၂၀၂၃ ခုနှစ်၊ ဇွန် ၈ ရက်တွင် တရုတ်-မြန်မာ သံတမန်ဆက်ဆံရေးသည် ၇၃ နှစ် ပြည့်မြောက်မည်ဖြစ်ပါကြောင်း၊ ၁၉၆၀ ပြည့်နှစ်၊ အောက်တိုဘာ ၁ ရက်တွင်လည်း  ဝန်ကြီးချုပ် ဦးနုနှင့် ဝန်ကြီးချုပ် ချူအင်လိုင်း တို့က  မြန်မာ-တရုတ် နယ်နိမိတ်စာချုပ်ကို ချုပ်ဆိုနိုင်ခဲ့ပါကြောင်း။

        မြန်မာနိုင်ငံနှင့် တရုတ်နိုင်ငံသည် ဆွေမျိုးပေါက်ဖော်ချစ်ကြည် ရင်းနှီးသည့် ဆက်ဆံရေးဖြစ်ပြီး  အိမ်နီးချင်းတရုတ်နိုင်ငံနှင့် နယ်နိမိတ်ထိစပ်မှုကို ကြည့်မည် ဆိုပါကလည်း ကီလိုမီတာပေါင်း ၂၂၀၀ ကျော်ခန့် ထိစပ်နေသည်ကို တွေ့ရမည်ဖြစ် သည့်အပြင် သံလွင်မြစ်သည်လည်း တရုတ်နိုင်ငံနှင့် မြန်မာနိုင်ငံအထိပါ ဖြတ်သန်း စီးဆင်းနေခြင်းဖြစ်ပါကြောင်း၊ တရုတ်နိုင်ငံ၌ မိမိတို့ တိုင်းရင်းသားလူမျိုးစုများ နေထိုင် လျက်ရှိသကဲ့သို့ တရုတ်နွယ်ဖွားများသည်လည်း မိမိတို့နိုင်ငံတွင် လာရောက် အခြေချ ပြီး အေးချမ်းစွာနေထိုင်လျက်ရှိပါကြောင်း။

လူတစ်ယောက်၏ ဘဝလမ်းခရီး ကောင်းမွန်စွာလျှောက်လှမ်းနိုင်ရေးအတွက် ကာယကံရှင်တစ်ဦးတစ်ယောက်တည်းကောင်းနေ၍ မရပါကြောင်း၊ ယင်းနှင့် ဆက်စပ် နေသည့် ပတ်ဝန်းကျင်၊ လူ့အဖွဲ့အစည်းများလည်း ကောင်းရန်လိုအပ်ပါကြောင်း၊ ထိုကဲ့သို့ပင် နိုင်ငံတစ်နိုင်ငံ ဖွံ့ဖြိုးတိုးတက်ရန်ဆိုပါကလည်း ယင်းနိုင်ငံတစ်ခုတည်း ကောင်းအောင် ကြိုးစားနေရုံမက နယ်နိမိတ်ချင်းထိစပ်နေသည့် အိမ်နီးချင်းများသည် လည်း အိမ်နီးချင်းနိုင်ငံကောင်းများ ဖြစ်ရန်လိုအပ်ပါကြောင်း၊ မြန်မာနိုင်ငံနှင့် တရုတ် ပြည်သူ့သမ္မတနိုင်ငံသည် အပြန်အလှန် အိမ်နီးချင်းနိုင်ငံကောင်းများ ဖြစ်ပါကြောင်း၊ မြန်မာနိုင်ငံသည် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေးမူဝါဒကို လက်ခံကျင့်သုံးနေသည့်နိုင်ငံဖြစ်ပြီး ငြိမ်းချမ်းစွာအတူယှဉ်တွဲနေထိုင်ရေးမူကြီး ၅ ရပ် ကို လက်ခံကျင့်သုံးနေသည့် နိုင်ငံဖြစ်ပါကြောင်း၊ မိမိကိုယ်တိုင်လည်း  ၂၀၂၁ ခုနှစ်၊ မေ ၂၀ ရက်တွင် တရုတ်နိုင်ငံ၊ Phoenix  ရုပ်သံမီဒီယာနှင့် အင်တာဗျူး၌ နှစ်နိုင်ငံ ဆက်ဆံရေးနှင့် ပတ်သက်၍ ယုံကြည်မှုနှင့် ချစ်ခင်ရင်းနှီးစွာနေခြင်းသည် အကောင်း ဆုံးဖြစ်ကြောင်း၊ အိမ်နီးချင်းဟူသည်မှာ အရင်းနှီးဆုံး အိမ်နီးချင်းကောင်းများ ဖြစ်ရ မည့် အကြောင်း၊ မြန်မာနိုင်ငံသည် နယ်နိမိတ်ခြင်းထိစပ်နေသည့် အိမ်နီးချင်း ၅ နိုင်ငံ နှင့် ရင်းနှီးချစ်ကြည်စွာ နေထိုင်သွားမည်ဖြစ်သည့်အကြောင်း၊ တရုတ်နိုင်ငံနှင့် မြန်မာ နိုင်ငံသည် ငြိမ်းချမ်းစွာအတူယှဉ်တွဲရေးမူ ၅ ချက်ကို ကမ္ဘာတွင်စပြီး လက်မှတ်ထိုး သည့် နိုင်ငံဖြစ်ကြောင်းကို ဖြေကြားခဲ့ပါကြောင်း၊ မိမိဖြေဆိုခြင်းဖြစ်သည် ဆိုသော် လည်း  မြန်မာနိုင်ငံ၏ အိမ်နီးချင်းနိုင်ငံများအပေါ်ထားသည့် ရပ်တည်ချက်ဆိုပါက လည်း မမှားပါကြောင်း။

တရုတ်နိုင်ငံအနေဖြင့် ၂၀၂၂ ခုနှစ်၊ ဩဂုတ်လ ၁၀ ရက်တွင် တရုတ်(တိုင်ပေ) နှင့်ပတ်သက်၍  တတိယအကြိမ် စက္ကူဖြူစာတမ်း ထုတ်ပြန်ခဲ့ပါကြောင်း၊ မြန်မာနိုင်ငံ အနေဖြင့် မည်သူတရားပျက်ပျက် ကိုယ်မပျက်စေနှင့် ဟူသည့်အတိုင်း အိမ်နီးချင်း ကောင်းပီသစွာ တရုတ်တစ်နိုင်ငံတည်း မူဝါဒ(One China Policy)ကို အစဉ်ထောက် ခံရပ်တည်လျက်ရှိကြောင်းကို ပြောကြားလိုပါကြောင်း။

        တစ်နိုင်ငံတည်း ဗိုလ်ကျစိုးမိုးနေသည့် ဧကဝင်ရိုးမှ ဗဟုဝင်ရိုးကို ပြောင်းလဲနိုင် ရေးအတွက် အခြားကမ္ဘာ့နိုင်ငံများနှင့် ပူးပေါင်းလုပ်ဆောင် သွားမည့်ကိစ္စများ အပေါ်၌ လည်း ကြိုဆိုအားပေးပါကြောင်း၊ ထိုသို့ဆောင်ရွက်ခြင်းသည် မိမိတို့နိုင်ငံကဲ့သို့ ဖွံ့ဖြိုး ဆဲနိုင်ငံများအတွက် အလွန်အကျိုးဖြစ်ထွန်းစေမည့် ကိစ္စများဖြစ်ပါကြောင်း၊ ရှန်ဟိုင်း ပူးပေါင်းဆောင်ရွက်ရေးအဖွဲ့ (Shanghai Cooperation Organization)၌ မြန်မာနိုင်ငံ ကို ဆွေးနွေးဖက်နိုင်ငံအဖြစ် (Dialogue Patner) သတ်မှတ်ပေးခဲ့သည်ကိုလည်း အထူးပင်ကျေးဇူးတင်ရှိကြောင်းကို  ပြောကြားလိုပါကြောင်း။

မြန်မာနိုင်ငံသည် တရုတ်ပြည်သူ့သမ္မတနိုင်ငံနှင့် တရုတ်လူမျိုးများ၊ တရုတ်နွယ် ဖွား မြန်မာနိုင်ငံသားများအတွက် မျက်နှာနှစ်ဖက် ဆက်ဆံရေးမျိုး မရှိသည့် ယုံကြည် စိတ်ချရသည့် အိမ်နီးချင်းနိုင်ငံတစ်ခု ဖြစ်ပါကြောင်း၊ တရုတ်နိုင်ငံသည်လည်း မြန်မာ နိုင်ငံအတွက် အရေးကြီးသည့် အိမ်နီးချင်းနိုင်ငံတစ်ခုဖြစ်သကဲ့သို့ ဘက်စုံမဟာဗျူဟာ မြောက် ပူးပေါင်းဆောင်ရွက်ရေး မိတ်ဖက်နိုင်ငံတစ်ခုလည်း ဖြစ်ပါကြောင်း၊ ယခုကဲ့သို့ မင်္ဂလာရှိသည့် တရုတ်နှစ်သစ်ကူးနေ့တွင် ယုန်နှစ်ဖြစ်သည့်အလျောက် မိမိတို့ အားလုံး ပိုမို၍ချစ်ခင်ကြပါစေ၊ ငြိမ်းချမ်းမှုနှင့် သာယာဝပြောမှု ပိုမိုရရှိကြပါစေ၊ မြန်မာနိုင်ငံ အတွင်း မှီတင်းနေထိုင်ကြသည့် တရုတ်နွယ်ဖွားမြန်မာနိုင်ငံသားများ၊ တရုတ်ပြည်သူ့ သမ္မတနိုင်ငံအတွင်းရှိ တရုတ်နိုင်ငံသားများ၊ ကမ္ဘာအနှံ့ မှီတင်းနေထိုင်ကြသည့် တရုတ် နွယ်ဖွားများအားလုံး နှစ်သစ်ကူးပွဲတော်၌ ပျော်ရွှင်ပါစေ၊ မင်္ဂလာအပေါင်းနှင့် ခညောင်းပါစေ၊ စီးပွားလာဘ်လာဘများ တိုးပွားပါစေ၊ အစစအရာရာအဆင်ပြေ ချောမွေ့ပြီး ကံကောင်းခြင်းများ ပွင့်လန်းပါစေ၊ ကျန်းမာဘေးကင်းပါစေ၊ လိုအင်ဆန္ဒ များ ပြည့်ဝပါစေကြောင်းဖြင့် ပြောကြားသည်။

ယင်းနောက် မြန်မာနိုင်ငံဆိုင်ရာတရုတ်ပြည်သူ့သမ္မတမြန်မာနိုင်ငံသံအမတ်ကြီး ကနှစ်သစ်ဆုတောင်းစကားပြောကြားရာတွင် တရုတ်နှစ်သစ်ကူးပွဲတော်သို့ ယခုကဲ့သို့ နိုင်ငံ့အကြီးအကဲကိုယ်တိုင် တက်ရောက်သည်မှာ ပထမဦးဆုံးအကြိမ်ဖြစ်ပြီး တက် ရောက်ချီးမြှင့်ပေးခဲ့သည့်အတွက် ကျေးဇူးအထူးတင်ရှိပါကြောင်း၊ နှစ်သစ်တွင် တရုတ်နိုင်ငံအနေဖြင့် မြန်မာနိုင်ငံနှင့်အတူ ဆွေမျိုးပေါက်ဖော်သံယောဇဉ်ကို ဆက်လက်လက်ဆင့်ကမ်းပြီး တရုတ်-မြန်မာ အေးအတူပူအမျှ အသိုက်အဝန်း တည်ဆောက်မှုကို စဉ်ဆက်မပြတ်ဖေါ်ဆောင်ကာ နှစ်နိုင်ငံချစ်ကြည်ရင်းနှီးမှု ရလဒ် များဖြင့် နှစ်နိုင်ငံပြည်သူများအတွက် အကျိုးကိုပိုမိုဖော်ဆောင်သွားမည်ဖြစ်ကြောင်း၊ နှစ်နိုင်ငံဆက်ဆံရေးနှင့် ချစ်ကြည်ရင်းနှီးမှုများ ယခုထက်ပိုမိုတိုးတက်ခိုင်မြဲပြီး အဓွန့်ရှည်တည်တံ့ပါစေရန် ဆုမွန်ကောင်းတောင်းပါကြောင်းဖြင့် ပြောကြားသည်။ ဆက်လက်ပြီးမြန်မာနိုင်ငံ တရုတ် ကုန်သည်များအသင်းချုပ်ဥက္ကဋ္ဌ က နှစ်သစ်ဆု တောင်းစကား ပြောကြားသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် နှင့်ဇနီးတို့သည် အခမ်းအနားတက်ရောက်လာကြသူများနှင့်အတူ တရုတ်ရိုးရာနှစ်သစ် ကူး အထိမ်းအမှတ်ဂုဏ်ပြုညစာကို အတူတကွသုံးဆောင်ကြသည်။ ညစာသုံးဆောင် နေစဉ်အတွင်း  တရုတ်တူရိယာ(ယူနန်ဘုံကျောင်း)အဖွဲ့မှ တီးမှုတ်ဖျော်ဖြေကြပြီး မင်္ဂလာ နဂါးအဖွဲ့က ကပြဖျော်ဖြေကြသည်။

ယင်းနောက် ဘက်စကက်ဘောပြိုင်ပွဲ ဆုပေးပွဲကိုကျင်းပပြုလုပ်ရာ အလွတ် တန်း(အမျိုးသား)ပထမဆုရရှိသည့် ပြည်ထဲရေးဝန်ကြီးဌာနအသင်း၊ အလွတ်တန်း (အမျိုးသမီး) ပထမဆုရရှိသည့် A- Studio အသင်း၊ အသက်(၅၀)ကျော် (အမျိုးသား) ပထမဆုရ Great Wall အသင်း၊ အသက်(၅၀)ကျော် (အမျိုးသမီး) ပထမဆုရ Sweet Angle အသင်းတို့အား ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း က ဆုဖလားများကို ပေးအပ်ချီးမြှင့်သည်။

၎င်းနောက် ဘက်စကက်ဘောပြိုင်ပွဲဝင်အသင်းများအား ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းက အမှတ်တရဂုဏ်ပြုတံဆိပ်များ ပေးအပ်သည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် နှင့် ဇနီး၊ အခမ်းအနားတက်ရောက်လာကြသူများသည် တရုတ်ရိုးရာအကအဖွဲ့များနှင့် အနုပညာရှင်များ၏ ဖျော်ဖြေမှုအစီအစဉ်များကို ကြည့်ရှုအားပေးကြသည်။

ဖျော်ဖြေမှုများအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်ထံသို့ မြန်မာနိုင်ငံဆိုင်ရာတရုတ်နိုင်ငံသံအမတ်ကြီးက တရုတ်နှစ်သစ်ကူး လက်ဆောင်မွန်ကို ဂါရဝပြုပေးအပ်သည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်နှင့် ဇနီးတို့သည် တရုတ်ရိုးရာအကအဖွဲ့များနှင့် သီဆိုဖျော်ဖြေခဲ့ကြသည့် အနုပညာ ရှင်များကို အမှတ်တရပန်းခြင်းများပေးအပ်ခဲ့ပြီး ရင်းရင်းနှီးနှီး နှုတ်ဆက်ခဲ့ကြသည်။