နှစ်နိုင်ငံဆက်ဆံရေးနှင့် တပ်မတော်နှစ်ရပ်အကြား ပူးပေါင်းဆောင်ရွက်မှုအတွက် အရေးပါသော အောင်မြင်မှုများနှင့် ချစ်ကြည်ရေးခရီးစဉ်

(Unicode Version)

နှစ်နိုင်ငံဆက်ဆံရေးနှင့် တပ်မတော်နှစ်ရပ်အကြား ပူးပေါင်းဆောင်ရွက်မှုအတွက် အရေးပါသော အောင်မြင်မှုများနှင့် ချစ်ကြည်ရေးခရီးစဉ်

နေပြည်တော်၊ နို၀င်ဘာ ၂၆

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် နို၀င်ဘာ ၂၁ ရက်နေ့တွင် တရုတ်ပြည်သူ့သမ္မတနိုင်ငံသို့ ချစ်ကြည်ရေးခရီးစဉ် ရောက်ရှိလျက်ရှိရာ နို၀င်ဘာ ၂၄ ရက်နေ့တွင် တရုတ်ပြည်သူ့သမ္မတနိုင်ငံ၊ သမ္မတ Mr. Xi Jinping နှင့်တွေ့ဆုံဆွေးနွေးခဲ့ပြီး ယင်းမတိုင်မီတွင် ဗဟိုစစ်ကော်မရှင်အဖွဲ့ဝင်နှင့် ပူးတွဲစစ်ဦးစီးဌာနစစ်ဦးစီးချုပ် Gen. Li Zuocheng ၊ တရုတ်နိုင်ငံ ဗဟိုစစ်ကော်မရှင် ဒုတိယဥက္ကဋ္ဌ Gen. Xu Qiliang တို့နှင့်တွေ့ဆုံဆွေးနွေးခဲ့သည်။

သမ္မတကြီး Mr. Xi Jinping က တပ်မတော်ကာကွယ်ရေးဦးစီးချုပ်၏ ချစ်ကြည်ရေးခရီးစဉ်သည် ထူးခြားသည့် ခရီးစဉ်ဖြစ်ပါကြောင်း၊ တစ်ကမ္ဘာလုံး အာရုံစိုက်ခံရသောအရေးကြီးသည့် (၁၉)ကြိမ်မြောက် ကွန်မြူနစ်ပါတီ ညီလာခံကြီး အောင်မြင်စွာကျင်းပနိုင်ခဲ့ပြီးချိန်နှင့် ချစ်ကြည်ရေးခရီးစဉ် လာရောက်ချိန် တိုက်ဆိုင်မှုရှိပါကြောင်း၊ ပါတီညီလာခံအပြီးတွင် ပထမဆုံးလာရောက်သော ပြည်ပတပ်မတော်ခေါင်းဆောင်လည်းဖြစ်၍ အလေးထားပါကြောင်း၊ ပါတီညီလာခံတွင် တရုတ်နိုင်ငံအတွက် အရေးပါသော အနာဂါတ် လူမှုစီးပွားရေးဖွံ့ဖြိုးတိုးတက်မှုများအတွက် သက္ကရာဇ် ၂၀၅၀ ပြည့်နှစ်အထိ ဆောင်ရွက်မည့် မူဝါဒ၊ လမ်းစဉ်၊ မဟာဗျူဟာများ ချမှတ်ခဲ့ကြောင်း၊ တရုတ်နိုင်ငံ၏ဖွံ့ဖြိုးတိုးတက်မှုကို ကမ္ဘာ့နိုင်ငံများအတွက်မျှဝေရန်ဖြစ်ပြီး ယင်းဖွံ့ဖြိုးတိုးတက်မှု သည် အိမ်နီးချင်းမြန်မာနိုင်ငံ၏ ဖွံ့ဖြိုးတိုးတက်မှုအတွက်လည်း အထောက်အကူပေးနိုင်မည်ဖြစ်ကြောင်း၊ မြန်မာနိုင်ငံနှင့်ဆက်ဆံရေးသည် သမိုင်းကြောင်းရှည်လျားလှပြီး ဆွေမျိုးပေါက်ဖော်ဆက်ဆံရေး၊ ဘက်ပေါင်းစုံ မဟာဗျူဟာမိတ်ဖက်ဆက်ဆံရေးဖြစ်၍ ပူးပေါင်းဆောင်ရွက်မှုများ တိုးမြှင့်လုပ်ဆောင်သွားမည်ဖြစ်ကြောင်း၊ နှစ်နိုင်ငံတပ်မတော်ချင်း ဆက်ဆံရေးသည်လည်း ကောင်းမွန်ခဲ့ပြီး ယခုအချိန်သည် အကောင်းဆုံး ဖြစ်သောကြောင့် ပိုမို၍ကျယ်ကျယ်ပြန့်ပြန့် ပူးပေါင်းဆောင်ရွက်သွားရန် တရုတ်ပြည်သူ့တပ်မတော်ကို ထောက်ခံပေးထားကြောင်း၊ နိုင်ငံတကာမျက်နှာစာနှင့် ဒေသတွင်းအခြေအနေများပေါ်တွင်လည်း ဂရုစိုက်၍ ဆောင်ရွက်ခဲ့ရာ ရခိုင်ဒေသအရေးအတွက် မြန်မာနိုင်ငံနှင့်တပ်မတော်၏ ဆောင်ရွက်ချက်များကို အသိအမှတ်ပြု ထောက်ခံရပ်တည်ပေးခဲ့ကြောင်း၊ ဆက်လက်၍လည်း လိုအပ်သည့် အကူအညီများ ဆောင်ရွက် ပေးသွားမည်ဖြစ်ကြောင်း၊ နှစ်နိုင်ငံနယ်စပ်ဒေသ တည်ငြိမ်အေးချမ်းရေးအတွက်လည်း တပ်မတော်နှစ်ရပ် အကြား တွေ့ဆုံဆွေးနွေးမှုများ တိုးမြှင့်ဆောင်ရွက်ခြင်းဖြင့် ပိုမိုကောင်းမွန်အောင် ဆောင်ရွက်နိုင်မည် ဖြစ်ကြောင်း၊ မြန်မာနိုင်ငံအစိုးရ ခေါင်းဆောင်များနှင့်လည်း ဆက်ဆံရေးကောင်းမွန် လျက်ရှိကြောင်း၊ မြန်မာနိုင်ငံ၏ အမျိုးသားနိုင်ငံရေးတွင် တပ်မတော်နှင့် တပ်မတော်ကာကွယ်ရေးဦးစီးချုပ်၏ ကဏ္ဍသည် လွန်စွာအရေးပါကြောင်း၊ ယခုခရီးစဉ်သည် နှစ်နိုင်ငံချစ်ကြည်ရေး၊ ဘက်စုံမဟာဗျူဟာ မိတ်ဖက်ဆက်ဆံရေး အတွက် အထူးအရေးပါသောခရီးစဉ်၊ အောင်မြင်သောခရီးစဉ်ဖြစ်ပါကြောင်း၊ တရုတ်နိုင်ငံသို့ မကြာခဏ လာရောက်ရန် ဖိတ်ကြားပါကြောင်း ပြောကြားခဲ့သည်။

တပ်မတော်ကာကွယ်ရေးဦးစီးချုပ်က (၁၉)ကြိမ်မြောက် တရုတ်ကွန်မြူနစ်ပါတီ ညီလာခံ အောင်မြင်စွာ ကျင်းပနိုင်ခဲ့ပြီး အနာဂါတ်တရုတ်နိုင်ငံ စီးပွားရေး၊ လူမှုရေး ဖွံ့ဖြိုးတိုးတက်မှုဆိုင်ရာ မူဝါဒလမ်းညွှန်ချက်များ အောင်မြင်စွာချမှတ်နိုင်ခြင်း၊ သမ္မတကြီး Mr. Xi Jinping ပါတီအထွေထွေအတွင်းရေးမှူး၊ ဗဟိုစစ်ကော်မရှင် ဥက္ကဋ္ဌအဖြစ် ထပ်မံရွေးချယ်တင်မြှောက်ခြင်းတို့အတွက် ဂုဏ်ယူဝမ်းမြောက်ပါကြောင်း၊ နှစ်နိုင်ငံ ချစ်ကြည်ရေး တည်ဆောက်နိုင်မှုတွင် ဆွေမျိုးပေါက်ဖော်ဆက်ဆံရေးဖြင့် မြန်မာနိုင်ငံနှင့် မြန်မာ့တပ်မတော် ဖွံ့ဖြိုးတိုးတက်ရေးအတွက် တရုတ်နိုင်ငံ၏အားပေးကူညီမှုများ၊ ရခိုင်ဒေသဖြစ်စဉ်နှင့်ပတ်သက်၍ အခြေအနေ မှန်များကို သိရှိနားလည်ကာ မြန်မာနိုင်ငံအပေါ် နိုင်ငံတကာမျက်နှာစာတွင် ထောက်ခံရပ်တည် ပေးမှုများသည် မြန်မာနိုင်ငံ၏ မိတ်ဆွေကောင်း၊ မဟာဗျူဟာမိတ်ဖက်နိုင်ငံအဖြစ် သက်သေပြလိုက်ခြင်းပင်ဖြစ်ကြောင်း၊ တရုတ်နိုင်ငံခြားရေးဝန်ကြီး Mr. Wang Yi လာရောက်စဉ် ထွက်ပြေးဘင်္ဂါလီများ ဥပဒေနှင့်အညီ ပြန်လည်လက်ခံရေးတွင် ဘင်္ဂလားဒေ့ရှ်နိုင်ငံနှင့် ဆွေးနွေးညှိနှိုင်းရေး၊ ရခိုင်ဒေသဖွံ့ဖြိုးတိုးတက်မှု ဆောင်ရွက်ရေး၊ ဒေသလုံခြုံရေးနှင့် တည်ငြိမ်အေးချမ်းအောင် ဆောင်ရွက်ရေး၊ အကြံပြုမှုများကိုလည်း မိမိတို့ဆောင်ရွက်လျက်ရှိပါကြောင်း၊ ရခိုင်ပဋိပက္ခသည် မြန်မာနိုင်ငံတစ်နိုင်ငံအတွက် သာမဟုတ်ဘဲ အိမ်နီးချင်း နိုင်ငံများနှင့် ဒေသတွင်းလုံခြုံရေးကိုပါ စိုးရိမ်ရနိုင်သည့် အလားအလာရှိ၍ အဘက်ဘက်မှ စဉ်းစားသုံးသပ်ကာ အိမ်နီးချင်းနိုင်ငံများနှင့် ပူးပေါင်းဆောင်ရွက်သွားရန်လိုအပ်ကြောင်း၊ တရုတ်နိုင်ငံ၏ One Belt ၊ One Road အစီအစဉ်သည် မြန်မာနိုင်ငံအပါအဝင် နိုင်ငံများစွာ၏ ဖွံ့ဖြိုးတိုးတက်ရေးကို အထောက်အကူပေးနိုင်ပါကြောင်း၊ မြန်မာနိုင်ငံ၏ နိုင်ငံရေးပြုပြင်ပြောင်းလဲမှုများကို ၂၀၁၁ ခုနှစ်မှစ၍ဆောင်ရွက်ခဲ့ရာ အခက်အခဲများစွာကို ကျော်လွှားနိုင်အောင် ကြိုးစားဆောင်ရွက်လျက်ရှိကြောင်း၊ မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များတွင် တပ်မတော်သည် မြန်မာနိုင်ငံ၏ ထာဝရငြိမ်းချမ်းရေးအတွက် ဦးတည်ဆောင်ရွက်လျက်ရှိရာ အိမ်နီးချင်း တရုတ်နိုင်ငံနှင့်ချစ်ကြည်ရင်းနှီးမှု၊ တပ်မတော်ချင်း ချစ်ကြည်ရင်းနှီးမှုများမှတစ်ဆင့် တိုးတက်မှုများ ရရှိနိုင်စေမည်ဖြစ်ကြောင်း၊ ဗဟိုစစ်ကော်မရှင် အဖွဲ့ဝင်နှင့် ပူးတွဲစစ်ဦးစီးဌာနစစ်ဦးစီးချုပ် Gen. Li Zuocheng ၊ တရုတ်နိုင်ငံဗဟိုစစ်ကော်မရှင် ဒုတိယဥက္ကဋ္ဌ Gen. Xu Qiliang တို့နှင့် ဆွေးနွေးမှုများမှရရှိခဲ့သော တပ်မတော်နှစ်ရပ်အကြား ပူးပေါင်းဆောင်ရွက်မှု သဘောတူညီချက်များ အကောင်အထည်ဖော်နိုင်ရေး အတွက် သမ္မတကြီး၏ ထောက်ခံကူညီအားပေးမှုများဖြင့် ဆောင်ရွက်သွားမည်ဖြစ်ကြောင်း၊ ယခုခရီးစဉ်တွင် တရုတ်နိုင်ငံ၏ ဖွံ့ဖြိုးတိုးတက်မှုများကို လေ့လာခွင့်ရရှိခဲ့ပြီး ကမ္ဘာ့အံ့ဖွယ်စာရင်းဝင် Three Gorges Dam ကို လေ့လာခဲ့ရာတွင် အခက်အခဲပေါင်းများစွာကို ကျော်လွှားဆောင်ရွက်နိုင်ခဲ့သည့် တရုတ်ခေါင်းဆောင်ကြီးများ၏ အမြော်အမြင်ကြီးမားမှု၊ ဒေသဖွံ့ဖြိုးတိုးတက်ရေးနှင့် ရေကြီးရေလျှံမှု သဘာဝဘေးအန္တရာယ် ကာကွယ်ရေး အတွက် ယခုအခါ ပြည်သူလူထုကောင်းစွာအကျိုးခံစားနေရမှု၊ တရုတ်ပညာရှင်များ၏ အင်ဂျင်နီယာ အတတ်ပညာတို့ကို မျက်မြင်ကိုယ်တွေ့သိရှိခွင့်ရသဖြင့် များစွာအကျိုးရှိပါကြောင်း၊ (၁၉)ကြိမ်မြောက် ပါတီညီလာခံအပြီး ပထမဆုံးလာရောက်ခွင့်ရသော ပြည်ပတပ်မတော်ခေါင်းဆောင်အဖြစ် သမ္မတကြီးက အလေးအနက်ထားသည့်အတွက်လည်း ၀မ်းမြောက်ဂုဏ်ယူပါကြောင်း၊ နိုင်ငံတော်၏ အနာဂါတ်နှင့် တပ်မတော်၏ မျိုးဆက်သစ်ခေါင်းဆောင်များအတွက် ကြိုးစားဆောင်ရွက် ပေးလျက်ရှိပါကြောင်း၊ နယ်စပ်ဒေသ တည်ငြိမ်အေးချမ်းရေးအတွက် တပ်မတော်နှစ်ရပ်အကြား တွေ့ဆုံဆွေးနွေးမှုများကို ညီအစ်ကိုစိတ်ထားများဖြင့် ပူးပေါင်းဆောင်ရွက်သွားမည်ဖြစ်ကြောင်း၊ မိမိ၏ခရီးစဉ်သည် နှစ်နိုင်ငံချစ်ကြည်ရေးနှင့် ပူးပေါင်းဆောင်ရွက်ရေး ကို မြှင့်တင်နိုင်သည့်အတွက် အောင်မြင်သည့် ခရီးစဉ်ဖြစ်ပါကြောင်း ပြန်လည်ဆွေးနွေးပြောကြားခဲ့သည်။

တပ်မတော်ကာကွယ်ရေးဦးစီးချုပ်၏ တရုတ်နိုင်ငံချစ်ကြည်ရေးခရီးစဉ်သည် နို၀င်ဘာလ ၂၁ ရက်မှ ၂၆ ရက်နေ့ အထိဖြစ်ပြီး ခရီးစဉ်အတွင်း တပ်မတော်ကာကွယ်ရေးဦးစီးချုပ်သည် ဗဟိုစစ်ကော်မရှင်အဖွဲ့ဝင်နှင့် ပူးတွဲစစ်ဦးစီးဌာနစစ်ဦးစီးချုပ် Gen. Li Zuocheng ၊ တရုတ်နိုင်ငံဗဟို စစ်ကော်မရှင်ဒုတိယဥက္ကဋ္ဌ Gen. Xu Qiliang ၊ တောင်ပိုင်းစစ်နယ်ဝန်းဌာနချုပ်၊ ဌာနချုပ်မှူး Vice Admiral Yuan Yubai နှင့်တွေ့ဆုံဆွေးနွေးခြင်း၊ ယိချန်းမြို့အနီးရှိ Three Gorges Dam အားလေ့လာခြင်း၊ ပေကျင်းမြို့ရှိ ဗုဒ္ဓမြတ်စွယ်တော်အား ဖူးမြော်ကြည်ညိုခြင်း၊ Beijing ပြတိုက်၌ ပြသထားသော သမ္မတ Mr. Xi Jinping ၏ ၂၀၁၂-၂၀၁၆ ဖွံ့ဖြိုးတိုးတက်မှုနှင့် အောင်မြင်မှုဆိုင်ရာပြခန်းများ၊ ကွမ်ကျိုးမြို့ရှိ ကြည်းတပ်အထူးစစ်ဆင်ရေး သင်တန်းကျောင်း၊ ရှန်ကျန်းမြို့ရှိ Shenzhen Lotus Hill Park နှင့် Shenzhen Museum သို့ ကြည့်ရှုလေ့လာခဲ့သည်။

တပ်မတော်ကာကွယ်ရေးဦးစီးချုပ်၏ ယခုခရီးစဉ်တွင် ထူးခြားမှုများအဖြစ် (၁၉)ကြိမ်မြောက် တရုတ်ကွန်မြူနစ်ပါတီ ညီလာခံအပြီးတွင် သမ္မတ Mr. Xi Jinping က ပထမဦး ဆုံးလက်ခံတွေ့ဆုံသော ပြည်ပတပ်မတော် ခေါင်းဆောင်ဖြစ်ကြောင်း၊ Beijing ပြတိုက်သို့ ပထမဆုံးလာရောက်ကြည့်ရှုသည့် ပြည်ပတပ်မတော် ခေါင်းဆောင်ဖြစ်ကြောင်း၊ ကမ္ဘာ့အံ့ဖွယ် Three Gorges Dam သို့ ပထမဆုံး လာရောက်လေ့လာကြည့်ရှုသည့် ပြည်ပတပ်မတော်ခေါင်းဆောင်ဖြစ်ကြောင်း၊ တရုတ်ပြည်သူ့သမ္မတနိုင်ငံ သမ္မတနှင့် စစ်ဘက်ခေါင်းဆောင်များက ပြောကြားကြသည်။