အထက်ကယုံကြည်အားထားရပြီး လက်အောက်ကလေးစားရသည့်၊ ပြည်သူက ယုံကြည်အားကိုးရသည့် အရာရှိကောင်းတစ်ဦးဖြစ်အောင် ကြိုးစားသွားကြရမည်ဖြစ်

စစ္ေရးျပအခမ္းအနားအၿပီးတြင္ တပ္မေတာ္ကာကြယ္ေရးဦးစီးခ်ဳပ္ ဗိုလ္ခ်ဳပ္မွဴဳးႀကီး မဟာသေရစည္သူ မင္းေအာင္လိႈင္သည္ စစ္တကၠသိုလ္ေက်ာင္းဌာနခ်ဳပ္၊ ဧည့္ခန္းမ၌ ထူးခြၽန္ဆုရရိွၾကသည့္ ဗိုလ္ေလာင္း ၅ ဦးႏွင့္ ၎တို႔၏မိဘမ်ားအား ေတြ႕ဆံု၍ ဂုဏ္ျပဳအမွာစကားေျပာၾကားခဲ့သည္။

(Unicode Version)

အထက်ကယုံကြည်အားထားရပြီး လက်အောက်ကလေးစားရသည့်၊ ပြည်သူက ယုံကြည်အားကိုးရသည့် အရာရှိကောင်းတစ်ဦးဖြစ်အောင် ကြိုးစားသွားကြရမည်ဖြစ်

နေပြည်တော် ၊ ဒီဇင်ဘာ ၁

တပ်မတော်(ကြည်း၊ရေ၊လေ)အတွက်လိုအပ်သည့် လက်ရုံးရည်၊ နှလုံးရည် ပြည့်ဝသည့် အရာရှိကောင်းများ မွေးထုတ်ပေးရန်ဆိုသည့် အမိစစ်တက္ကသိုလ်၏ ရည်ရွယ်ချက်နှင့်အညီ တပ်မတော်၏ခေါင်းဆောင်ငယ်များ အဖြစ်မွေးထုတ်ပေးခဲ့ကြောင်း၊ ကျောင်းဆင်းအရာရှိများအနေဖြင့် ခေတ်အဆက်ဆက်တွင်လည်း တပ်မတော်၏ တာဝန်၊ နိုင်ငံတော်၏တာဝန်များကို အောင်မြင်အောင် ထမ်းဆောင်ခဲ့ကြကြောင်း၊ မိမိတို့အနေဖြင့်လည်း ခေတ်အဆက်ဆက် ထိန်းသိမ်းလာခဲ့သည့် တပ်မတော်၏ဂုဏ်ကိုဆက်လက် ထိန်းသိမ်းနိုင်ရန်အတွက် ကျရာတာဝန်များကိုထမ်းဆောင်ရာတွင် အထက်ကယုံကြည် အားထားရပြီး လက်အောက်ကလေးစားရသည့်၊ ပြည်သူကယုံကြည်အားကိုးရသည့် အရာရှိကောင်းတစ်ဦးဖြစ်အောင် ကြိုးစားသွားကြရမည်ဖြစ်ကြောင်းဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က ယနေ့နံနက်ပိုင်း တွင် ပြင်ဦးလွင်မြို့၊ စစ်တက္ကသိုလ် စစ်ရေးပြကွင်း၌ ကျင်းပပြုလုပ်သော စစ်တက္ကသိုလ် ဗိုလ်လောင်းသင်တန်း အမှတ်စဉ်(၅၉) သင်တန်းဆင်း ဂုဏ်ပြု စစ်ရေးပြအခမ်းအနားသို့ တက်ရောက်မိန့်ခွန်းပြောကြားစဉ် ထည့်သွင်း ပြောကြားသည်။

အဆိုပါအခမ်းအနားသို့ တပ်မတော်ကာကွယ်ရေးဦးစီးချုပ်၏ ဇနီး ဒေါ်ကြူကြူလှ၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ဇေယျကျော်ထင် စိန်ဝင်း၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး ဇေယျကျော်ထင် တင်အောင်စန်း နှင့်ဇနီး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ဇေယျကျော်ထင် ခင်အောင်မြင့်နှင့် ဇနီး၊ ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများနှင့်ဇနီးများ၊ တိုင်းမှူးများ၊ စစ်တက္ကသိုလ်ကျောင်းအုပ်ကြီးနှင့် ပြင်ဦးလွင်တပ်နယ်မှ အရာရှိကြီးများ၊ ပြည်ထောင်စုသမ္မတမြန်မာနိုင်ငံ တော်ဆိုင်ရာ နိုင်ငံခြားစစ်သံရုံးများမှ စစ်သံမှူးများ၊ ဖိတ်ကြားထားသည့် ဧည့်သည်တော်များနှင့် သင်တန်းဆင်းဗိုလ်လောင်းများ၏ မိဘဆွေမျိုးများ တက်ရောက်ကြသည်။

ဦးစွာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က ဗိုလ်လောင်းတပ်ရင်းများ၏ အလေးပြုခြင်းကိုခံယူပြီး ကျောင်းဆင်း ဗိုလ်လောင်းတပ်ရင်းများကို စစ်ဆေးသည်။ ထို့နောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်အား ဗိုလ်လောင်းတပ်ရင်းများက အနှေးလျှောက်၊ အမြန်လျှောက်တို့ဖြင့် ချီတက်အလေးပြုကြသည်။

ယင်းနောက် တပ်မတော်ကာကွယ်ရေးဦးစီးချုပ်က စစ်တက္ကသိုလ် ဗိုလ်လောင်း သင်တန်းအမှတ်စဉ်(၅၉)မှ အောင်စစ်သည်ဆုရရှိသူ ဗိုလ်လောင်းအမှတ် ၃၀၇၆၅၊ ဗိုလ်လောင်း ကျော်သူရ၊ လေ့ကျင့်ရေး ထူးချွန်ဆုရရှိသူ ဗိုလ်လောင်းအမှတ် ၃၁၂၃၂၊ ဗိုလ်လောင်း မျိုးဇော်ဦး၊ စာပေထူးချွန်ဆု(ဝိဇ္ဇာ)ရရှိသူ ဗိုလ်လောင်းအမှတ် ၃၁၁၃၉၊ ဗိုလ်လောင်းပြည့်ဖြိုးအောင်၊ စာပေထူးချွန်ဆု(သိပ္ပံ)ရရှိသူ ဗိုလ်လောင်း အမှတ် ၃၁၄၇၉၊ ဗိုလ်လောင်း သန်းတိုးအောင် ၊ စာပေထူးချွန်ဆု (ကွန်ပျူတာ)ရရှိသူ ဗိုလ်လောင်းအမှတ် ၃၁၄၈၈၊ ဗိုလ်လောင်း သိန်းတိုး အောင် တို့အား ဆုများအသီးသီး ပေးအပ်ချီးမြှင့်သည်။

ထို့နောက် တပ်မတော်ကာကွယ်ရေးဦးစီးချုပ်က သင်တန်းဆင်း ဗိုလ်လောင်းများအား မိန့်ခွန်းပြောကြားရာတွင် စစ်တက္ကသိုလ်၏ ဆောင်ပုဒ်ဖြစ်သည့် ‘ သစ္စာ၊ သူရ၊ သိပ္ပ ’ ဆိုသည့် ဆောင်ပုဒ်နှင့်အညီ နိုင်ငံတော်၊ တပ်မတော်နှင့် ပြည်သူများအပေါ် တွင်ကျရောက်မည့် အန္တရာယ်မှန်သမျှကို ကိုယ်နှုတ်နှလုံးသုံးပါးတို့ဖြင့် ကာကွယ်စောင့် ရှောက်ရမည်ဖြစ်ကြောင်း၊ ထိုသို့ကာကွယ်စောင့်ရှောက်ရာတွင် သစ္စာရှိရှိ တာဝန်များကို ထမ်းဆောင်နိုင်အောင်၊ နိုင်ငံတော်နှင့် တပ်မတော်အပေါ် ကျရောက်မည့် ရန်စွယ်အသွယ်သွယ်ကို သူရဆို သည့်ရဲစွမ်းသတ္တိဖြင့် တိုက်ခိုက်ချေမှုန်းနိုင်အောင်၊ စစ်ခေါင်းဆောင်တစ်ဦး အနေဖြင့်သိအပ် တတ်အပ်သည့် စစ်ပညာ၊ ဝိဇ္ဇာ၊ သိပ္ပံပညာရပ်ဆိုသည့် သိပ္ပပညာရပ်များကို တတ်မြောက်အောင် ‘သစ္စာ၊ သူရ၊ သိပ္ပ’ ဆိုသည့် အရည်အချင်းများပြည့်ဝပြီး နောင်တစ်ခေတ်၏အောင်စစ်သည် များဖြစ်လာကြမည့် ခေါင်းဆောင်ကောင်း တစ်ဦးအဖြစ် စစ်တက္ကသိုလ်မှ မွေးထုတ်ပေးခဲ့ခြင်းဖြစ်ကြောင်း ပြောကြားသည်။

ယင်းနောက် ‘ကျန်းမာကြံ့ခိုင်ရမည်၊ ကျွမ်းကျင်ရမည်၊ ရဲစွမ်းသတ္တိရှိရမည်’ ဆိုသည့် တပ်မတော်၏ လေ့ကျင့်ရေးမူဝါဒနှင့်အညီ သင်တန်းကာလ ၄ နှစ်အတွင်း ရုပ်ပိုင်းဆိုင်ရာနှင့်စိတ်ပိုင်းဆိုင်ရာ တိုးတက် ကောင်းမွန်အောင် တစ်ပြိုင်တည်းလေ့ကျင့် ပေးခဲ့ကြောင်း၊ ထို့အတူအတွေးအခေါ် အယူအဆမြင့်မား လာစေရန်နှင့် ဆုံးဖြတ်ချက်များချမှတ်ရာတွင်လည်း မြန်မြန်နှင့်မှန်မှန်ချမှတ်နိုင်အောင် လေ့ကျင့်ပေးခဲ့သည့်အတွက် စစ်မြေပြင်တွင် အောင်မြင်စွာတိုက်ပွဲဝင်နိုင်သည့် စစ်သည်တော်များဖြစ်လာမည်ဖြစ်ကြောင်း၊ အမြင့်ဆုံးတာဝန်ဖြစ်သည့် စစ်မြေပြင်တွင် အသက်ပေးတာဝန်ထမ်းဆောင်ရသည်အထိ မျှော်မှန်းပြီး လေ့ကျင့်ပေးခဲ့သောကြောင့် တာဝန်ထမ်းဆောင်ရာတွင် ယုံကြည်စိတ်ချရသည့်ခေါင်းဆောင်များ ဖြစ်လာမည်ဖြစ်ကြောင်း၊ မကြာခင်ကာလအတွင်း တပ်မတော်တပ်ရင်း၊ တပ်ဖွဲ့အသီးသီးတွင် ခေါင်းဆောင်ငယ်များ အဖြစ်တာဝန်ထမ်း ဆောင်ကြရမည်ဖြစ်သောကြောင့် ခေါင်းဆောင်မှုအရည်အချင်းများနှင့်ပြည့်စုံနေရန် ကြိုးစားကြရမည်ဖြစ်ကြောင်း၊ ခေါင်းဆောင်တစ်ယောက်ဖြစ်လာရန်အတွက် ခေါင်းဆောင်မှု အင်္ဂါရပ်(၁၆)ရပ် နှင့်အညီဆောင်ရွက်ရန်လိုအပ်ပြီး လက်အောက်က ယုံကြည်အားကိုရသည့်အရည်အချင်းများရှိရန်လိုကြောင်း၊ မိမိတို့အနေဖြင့် စစ်ရေးခေါင်းဆောင်မှုနှင့် လူမှုရေးခေါင်းဆောင်မှု နှစ်မျိုးကိုတစ်ပြိုင်တည်းတာဝန်ထမ်းဆောင် ရမည်ဖြစ်ကြောင်း၊ လူမှုရေးပိုင်းအရ စစ်တက္ကသိုလ်တွင် Guardian စနစ်ဖြင့်လေ့ကျင့် ပေးခဲ့ပြီးဖြစ်သည့် အတွက် မိဘအုပ်ထိန်းသူသဖွယ်ဖြစ်အောင် အနစ်နာခံပြုမူဆောင်ရွက်ရမည်ဖြစ်သကဲ့သို့ စစ်ရေးခေါင်းဆောင် ရာတွင်လည်း ပြတ်သားသည့်ခေါင်းဆောင်မှုမျိုး ဖြစ်ရမည်ဖြစ်ကြောင်း၊ ခေါင်းဆောင်သည် ရောင့်ရဲတင်းတိမ်မှု ရှိရန်လိုပြီး တိုးတက်ချင်သည့် စိတ်ရှိရန်လည်းလိုကြောင်း၊ မိမိဘဝတိုးတက်အောင်မြင်ရန် အတွက်ကြိုးစား အားထုတ်မှု၊ ရောင့်ရဲတင်းတိမ်မှု၊ လက်အောက်ကိုစေတနာထားမှုနှင့် လူ့သဘောသဘာဝကို သိရှိနားလည်မှု တို့ဖြင့်ဆောင်ရွက်ရန်လိုကြောင်းမှာကြားသည်။

ဆက်လက်၍ အဆင့်တိုးမြှင့်မှုနှင့်ပတ်သက်ပြီး တူညီသည့်ရာထူးအဆင့်အတန်း များတစ်ပြိုင်နက်တည်းခန့် အပ်ပေးမည်ဖြစ်ကြောင်း၊ သို့သော်တာဝန်ထမ်းဆောင်သည့် အချိန်ကာလကြာမြင့်လာသည်နှင့်အမျှ ကြိုးစားအားထုတ်မှု၊ သစ္စာရှိမှု၊ တာဝန်ထမ်းဆောင်နိုင်မှု၊ စည်းကမ်းလိုက်နာမှု၊ ကျန်းမာရေးကောင်းမွန်မှု၊ ကံ၊ ဉာဏ်၊ ဝီရိယ စသည်များနှင့်ဆက်စပ်ပြီး ပြောင်းလဲသွားမည်ဖြစ်ကြောင်း၊ လူတိုင်းနံပါတ်တစ်မဖြစ်နိုင်သော် လည်း ဖြစ်နိုင်သည့်အခွင့်ရေးကိုပေးထားကြောင်း၊ စစ်တက္ကသိုလ်တွင် ၄ နှစ်တာသင်တန်းတက်ရောက်၍ အတူတကွလေ့ကျင့်ခဲ့ကြပြီး ကြိုးစားအားထုတ်မှုအပေါ်တွင်မူတည်၍ ကွဲပြားသည့်အဆင့်အလိုက် ကျောင်းဆင်းခဲ့ကြသည်ကို လက်တွေ့မြင်တွေ့ရမည်ဖြစ်ကြောင်း၊ ထို့ကြောင့်လူတိုင်းတွင် တူညီသည့် အခွင့်အရေးရှိသည့်အတွက် မိမိကိုယ်မိမိထိန်းသိမ်းပြီး စဉ်ဆက်မပြတ် ကြိုးစားအားထုတ်ရန်လိုအပ်ကြောင်း ပြောကြားသည်။

၎င်းနောက် မိမိတို့အနေဖြင့် ဒို့တာဝန်အရေးသုံးပါးကို ကျေပွန်စွာထမ်းဆောင်နိုင်ရန်အတွက် စစ်ရေးစွမ်းရည်၊ အုပ်ချုပ်ရေးစွမ်းရည်၊ စည်းရုံးရေးစွမ်းရည်စသည့် စွမ်းရည်သုံးရပ်နှင့်ပြည့်စုံနေရန် အမြဲလေ့ကျင့်နေကြ ရမည်ဖြစ်ကြောင်း၊ စစ်ရေးစွမ်းရည် ထက်မြက်ရန်အတွက် စစ်အတတ်ပညာများကို အမြဲလေ့လာလိုက်နာရန် လိုအပ်သကဲ့သို့ အုပ်ချုပ်ရေးစွမ်းရည်ထက်မြက်ရန် အမိန့်နှင့်ညွှန်ကြားချက်များကို အောင်မြင်အောင်ဆောင် ရွက်နိုင်ရန် စနစ်တကျစီမံခန့်ခွဲခြင်း၊ ဆင့်ကဲကွပ်ကဲကြပ်မတ်ခြင်းတို့ ဆောင်ရွက်ရမည်ဖြစ်ကြောင်း၊ အုပ်ချုပ်ရေး တွင် ကိုယ်တိုင်လိုက်နာဆောင်ရွက်ရသကဲ့သို့ စီမံဆောင်ရွက်ပေးရမှုများလည်းရှိကြောင်း၊ မိမိတို့အနေဖြင့် နှစ်ပိုင်းလုံးကိုလိုက်နာ ကျင့်ကြံအားထုတ်နိုင်သည့် ခေါင်းဆောင်ကောင်းတစ်ယောက်ဖြစ်ရမည်ဖြစ်သကဲ့သို့ နောက်လိုက်ကောင်းလည်းဖြစ်ရမည်ဖြစ်ကြောင်းရှင်းလင်းပြောကြားသည်။

ထို့နောက် စိတ်ဓာတ်ခိုင်မာမှုရှိမှသာတွေ့ကြုံရသည့်အခက်အခဲများကို အောင်မြင်စွာကျော်လွှားနိုင်မည်ဖြစ်၍ စိတ်ဓာတ်ရင့်ကျက်စေရန်အတွက် လေ့ကျင့်ပေးခဲ့ပြီးဖြစ်ကြောင်း၊ စိတ်ဓာတ်ကြံ့ခိုင်မှုအတွက် လိုအပ်သည့် အခြေခံအချက်များဖြစ်သည့် ခေါင်းဆောင်မှု၊ စည်းကမ်းသေဝပ်မှု၊ ရဲဘော်စိတ်ရှိမှု၊ မိမိကိုယ်ကိုယ်လေးစားမှု စသည့် အချက်များအား မိမိတို့အနေဖြင့်လေ့ကျင့်ပြီးဖြစ်သဖြင့် ရင်ဆိုင်ရမည့်တိုက်ပွဲတိုင်းကို အောင်မြင်စွာ ကျော်လွှားနိုင်မည်ဖြစ်ကြောင်း၊ စိတ်ဓာတ်ကောင်းမွန်ရန်အတွက် ကိုယ်ကျင့်တရားကောင်းမွန်ရေးသည်လည်း အရေးကြီးကြောင်း၊ ထို့ကြောင့် ကိုယ်ကျင့်တရားကောင်းမွန်ရန်အတွက် မိမိတို့ငယ်စဉ်ကစပြီး အမိ စစ်တက္ကသိုလ်ရောက်သည်အထိ မိဘဆရာများက ကောင်းစွာ သင်ကြားလေ့ကျင့်ပေးခဲ့ပြီးဖြစ်ကြောင်း၊ ကိုယ်ကျင့်တရားကောင်းမွန်သူများသည် ဘာသာရေး၊ လူမှုရေးအဆုံးအမများနှင့်အညီ နေထိုင်ပြီး ကိုယ့်ကိုယ် ကိုယ်တန်ဖိုးထားသကဲ့သို့ သူတစ်ပါးကိုလည်း အလေးထားကြောင်း၊ ထို့ကြောင့် မိမိတို့ ဘဝတစ်လျှောက်မှာ ကိုယ်ကျင့်တရား အထူးကောင်းမွန်သည့်ခေါင်းဆောင်ကောင်းများဖြစ်အောင် ကိုယ်တိုင်ပြုစုပျိုးထောင်နေထိုင် သွားကြရန်လိုကြောင်း၊ ယနေ့ ၂၁ ရာစုခေတ်ကြီးတွင် နိုင်ငံရေး၊ စစ်ရေး၊ စီးပွားရေး၊ အုပ်ချုပ်ရေးစသည့် အချက်များသည် တစ်ခုနှင့်တစ်ခု ချိတ်ဆက်နေကြောင်း၊ ထို့ကြောင့်မိမိတို့အနေဖြင့် စစ်ရေးတစ်ခုတည်းကို သာအာရုံစိုက်လေ့လာရုံသာမက အခြားကဏ္ဍများကိုလည်း ယခုကတည်းကလေ့လာ ဖတ်ရှုကြရန်လိုကြောင်း၊ သို့မှသာ အကြားအမြင်ဗဟုသုတ၊ ပညာဉာဏ်နှင့်ပြည့်စုံမှာဖြစ်ပြီး ‘ပညာရဲရင့် ပွဲလယ်တင့်’ ဆိုသည့် ဆောင်ပုဒ်အတိုင်း တွေ့ကြုံလာသည့်အခက်အခဲမှန်သမျှအား ရင်ဆိုင်ကျော်လွှားနိုင်မည်ဖြစ်ကြောင်း တိုက်တွန်းမှာကြားသည်။

ယင်းနောက် စစ်စည်းကမ်းနှင့်ပတ်သက်၍ စစ်စည်းကမ်းသည် တပ်မတော်၏ ကျောရိုးမဏ္ဍိုင်ဖြစ်သကဲ့သို့ တပ်မတော်၏ အသက်ဝိဉာဉ်လည်းဖြစ်ကြောင်း၊ စည်းကမ်းလိုက်နာမှုတွင်လည်း မိမိတို့သည် စံနမူနာပြဖြစ် ရမည်ဖြစ်ကြောင်း၊ တပ်မတော်စည်းကမ်းဥပဒေများ၊ စစ်မြေပြင်စည်းကမ်းများနှင့် နယ်ဘက်ဆိုင်ရာ စည်းကမ်းဥပဒေများကို စံနမူနာပြ လေးစားလိုက်နာကျင့်ကြံကြရမည်ဖြစ်ကြောင်း၊ မိမိတို့ လက်အောက် ငယ်သားများအပေါ် တင်းကြပ်သည့် စည်းကမ်းများချမှတ်ပြီး မိမိလုပ်ချင်ရာလုပ်တာမျိုးကိုရှောင်ကြဉ်ကြရမည် ဖြစ်ကြောင်း၊ မိမိကိုယ်ကိုအလိုလိုက်ခြင်းသည်ကိုယ့်ကိုပျက်စီးစေသည့်အတွက် ထိန်းသိမ်းရန်လိုအပ်သကဲ့သို့ လက်အောက်ကိုလည်း ထိန်းသိမ်းရမည်ဖြစ်ကြောင်း၊ ကိုယ်တိုင် စည်းကမ်းအရာတွင် စံနမူနာပြဖြစ်မှသာ မိမိဦးဆောင်ရသည့်အဖွဲ့အစည်းကို လွယ်ကူစွာ အုပ်ချုပ်နိုင်မည်ဖြစ်ကြောင်း၊ စည်းကမ်းကောင်းမွန်သည့် အဖွဲ့အစည်းသည် ကြာရှည်တည်တံ့ပြီး အလုပ်တာဝန်များကိုလည်း အောင်မြင်စွာ ဆောင်ရွက်နိုင်သည်ကို တွေ့ရမည်ဖြစ်ကြောင်း၊ စစ်သမိုင်းများတွင် လက်အောက်ခံတပ်ဖွဲ့များကို စည်းကမ်းတကျဖွဲ့စည်းနိုင်ခြင်း မရှိသည့်ခေါင်းဆောင်သည် အောင်မြင်မှုမရသည်ကို တွေ့ရှိရမည်ဖြစ်ကြောင်း၊ လူတစ်ယောက်သည် စည်းကမ်းကောင်းလျှင် အချိန်အခါမရွေးတာဝန်ကိုကျေပွန်စွာ ထမ်းဆောင်တတ်သည့် စိတ်ရှိကြောင်း၊ ထို့ကြောင့် မိမိတို့ကွပ်ကဲရသည့်စစ်သည်များ စည်းကမ်းဖောက်လျှင် တည့်မတ်ပေးရမည်ဖြစ်ကြောင်း၊ မိမိတို့အနေဖြင့် တပ်မတော်သား အားလုံးလိုက်နာရန်လိုအပ်သည့် စစ်သည်တော်ကျင့်ဝတ်အပါး (၆၀)အား ခါးဝတ်ပုဆိုးကဲ့ သို့မြဲမြံစွာ လိုက်နာသွားကြရန်လိုကြောင်း၊ အသောက်အစား၊ အပျော်အပါးများကို ထိန်းသိမ်းပြီး ခြိုးခြံချွေတာမှသာ ၀င်ငွေ၊ ထွက်ငွေမျှတမည်ဖြစ်ကြောင်း၊ သွားသင့်၊ သွားထိုက်သည့်နေရာ၊ ပျော်သင့်၊ ပျော်ထိုက်သည့်နေရာတွင် စည်းကမ်းနှင့်လုပ်ကိုင် ဆောင်ရွက်မှသာ လူ့ဘဝတန်ဖိုးမြင့် လာမည်ဖြစ်ကြောင်း၊ ခြိုးခြံချွေတာသည့်စိတ်၊ ရောင့်ရဲတင်းတိမ်သည့်စိတ်၊ လိုချင်တပ်မက်သည့်စိတ်ကို အမြဲသတိထားပြီး မိမိကိုယ်ကိုယ် ထိန်းသိမ်းစောင့်ရှောက်ခြင်းဖြင့် မိမိတို့၏တန်ဖိုးသည် တစ်ဆင့်ထက်တစ်ဆင့် မြင့်တက်လာမည်ဖြစ်ကြောင်း ရှင်းလင်းပြောကြားသည်။

ဆက်လက်ပြီး မိမိတို့နိုင်ငံသည် တိုင်းရင်းသားလူမျိုးတစ်ရာကျော်ဖြင့် ဖွဲ့စည်းထားသည့် ပြည်ထောင်စု နိုင်ငံတော်ဖြစ်ပြီး နိုင်ငံတော်၏ လွတ်လပ်ရေးနှင့် အချုပ်အခြာအာဏာကို ထိန်းသိမ်းစောင့်ရှောက်ရန်အတွက် တပ်မတော်တွင်တာဝန်ရှိကြောင်း၊ မိမိတို့ ဘိုးဘွားများ၏ အသက်၊ သွေး၊ ချွေးများ စတေးပြီးမှရရှိထားသည် သမိုင်းအမွေများကို တင့်တယ်စေရန်အတွက် ခေတ်အဆက်ဆက်က သစ္စာလေးချက်ကိုဦးရွက်ပြီး တပ်မတော်မှ တာဝန်ထမ်းဆောင်ခဲ့ကြောင်း၊ ယခုအချိန်တွင် တိုင်းရင်းသားပြည်သူများ၏ ဆန္ဒအတိုင်း ဒီမိုကရေစီနိုင်ငံတော်သစ် တည်ဆောက်ရေးအတွက် လိုအပ်သည့် အခြေခံအဆောက်အဦများကို ဆယ်စုနှစ် နှစ်ခုကျော် ပြင်ဆင်တည်ဆောက်ပေးခဲ့ပြီးဖြစ်သဖြင့် ပြည်သူများရွေးချယ်သည့် ပါတီစုံဒီမိုကရေစီ လမ်းကြောင်းအတိုင်း အမျိုးသားရေးအင်အားစုအဖြစ် ပါ၀င်လျှောက်လှမ်းလျက်ရှိကြောင်း၊ မိမိတို့တပ်မတော်သည် နိုင်ငံရေးလောင်းရိပ်အောက်မှ လွတ်ကင်းသည့် တပ်မတော်ဖြစ်ရမည်ဖြစ်ကြောင်း၊ တပ်မတော်အနေဖြင့် ဒို့တာဝန်အရေးသုံးပါးကို ဦးထိပ်ထားပြီး အမျိုးသားအကျိုးစီးပွားနှင့် အမျိုးသားရေး စရိုက်လက္ခဏာများကို ထိန်းသိမ်းကာကွယ်၍ ပါတီစုံဒီမိုကရေစီစနစ်လမ်းကြောင်းအတိုင်း ဒီမိုကရေစီ နှင့်ဖက်ဒရယ်စနစ်ကို အခြေခံသည့် ပြည်ထောင်စုကြီးအဖြစ် ခိုင်ခိုင်မာမာလျှောက်လှမ်းရန်အတွက် မူဝါဒချမှတ်ထားသည့် လမ်းကြောင်းအတိုင်းလျှောက်လှမ်းလျက်ရှိကြောင်း ရှင်းလင်းပြောကြားသည်။

ထို့နောက် တပ်မတော်သားများ၏ တာဝန်သည် နိုင်ငံတော်၏ အချုပ်အခြာအာဏာကို မထိခိုက်ရန်၊ နိုင်ငံတော်၏ အကျိုးစီးပွားနှင့် တိုင်းရင်းသားများ၊ နိုင်ငံသူ၊ နိုင်ငံသားများကို ကာကွယ်စောင့်ရှောက်ရန် ဖြစ်ကြောင်း၊ အဆိုပါတာဝန်များကို နိုင်ငံတော်၏ဖွဲ့စည်းပုံ အခြေခံဥပဒေအရ ပေးအပ်ထားပြီးဖြစ်သော်လည်း ဥပဒေမဲ့ ဆောင်ရွက်၍မရသည်ကို သိရှိလိုက်နာကြရမည်ဖြစ်ကြောင်း၊ ဥပဒေ၏အထက်တွင် မည်သူ မျှနေ၍မရကြောင်း၊ တပ်မတော်သားများအနေဖြင့် တာဝန်ထမ်းဆောင်ကြသည့်အခါတွင် နိုင်ငံတော်မှ ထုတ်ပြန်ထားသည့် စည်းမျဉ်း၊ စည်းကမ်း၊ ဥပဒေများကို ပြဋ္ဌာန်းချက်များနှင့်အညီ လိုက်နာလုပ်ဆောင် သွားကြရမည်ဖြစ်ကြောင်း၊ တပ်မတော်သားများအနေဖြင့် တာဝန်ထမ်းဆောင်ချိန်တွင် သတ်မှတ်ထားသည့် အမိန့်၊ စည်းမျဉ်း၊ ညွှန်ကြားချက်များအတိုင်း လိုက်နာတာဝန်ထမ်းဆောင်လျက်ရှိသဖြင့် ရခိုင်ပြည်နယ်အတွင်း ဖြစ်စဉ်များတွင်လည်း တပ်မတော်အနေဖြင့် Rules of Engagement (ROE)နှင့်ပတ်သက်ပြီး စနစ်တကျ ဥပဒေနှင့်အညီသာ လုပ်ကိုင်ဆောင်ရွက်ခဲ့သည်ကို တွေ့မြင်ရမည်ဖြစ်ကြောင်း ပြောကြားသည်။

ယင်းနောက် ရခိုင်ပြည်နယ်အတွင်း သြဂုတ်လ ၂၅ ရက်နေ့တွင် ARSA အစွန်းရောက် ဘင်္ဂါလီအကြမ်းဖက်သမားများက နယ်ခြားစောင့်ရဲစခန်းအခု ၃၀ နှင့် တပ်ရင်းဌာနချုပ်တစ်ခုအား တစ်ချိန်တည်း တစ်ပြိုင်တည်း အင်အားသုံးအကြမ်းဖက်တိုက်ခိုက်၍ ဒေသခံတိုင်းရင်းသားကျေးရွာများကို ဝိုင်းဝန်းခြိမ်းခြောက် အကြမ်းဖက် သတ်ဖြတ်ခဲ့သည်ကို တွေ့မြင်ရမည်ဖြစ်ကြောင်း၊ ထို့အပြင် အကြမ်းဖက်မှုနှင့်ပတ်သက်ပြီး သင်တန်းပေးလေ့ကျင့်မှု၊ စားနပ်ရိက္ခာစုပုံမှု၊ တပ်စခန်းများကိုတိုက်ခိုက်ရန် ကြံစည်မှုများအရ အဆိုပါ အကြမ်းဖက်တိုက်ခိုက်မှုသည် ကြိုတင်စီစဉ်လုပ်ဆောင်သည့် ဖြစ်စဉ်တစ်ခုဖြစ်ကြောင်း၊ အဆိုပါ တိုက်ခိုက်မှု အပေါ်တွင် အစွန်းရောက်ဘင်္ဂါလီများအား ဒေသတွင်ရှိသည့်လူအချို့က အားပေးကူညီမှုပြုခဲ့သည်များကိုလည်း တွေ့ရကြောင်း၊ နိုင်ငံတော်အနေဖြင့် ၎င်းတို့သည် အကြမ်းဖက်သမားများဟု ကြေငြာထားပြီးဖြစ်ကြောင်း၊ သို့သော် နိုင်ငံတကာ အဖွဲ့အစည်းအချို့နှင့် ပြည်ပသတင်းဌာနအချို့သည် ဖြစ်စဉ်မှန်များကို ဖုံးကွယ် ပြီးမှန်ကန်မှုမရှိသည့်သတင်းများကို အခြေခံထားသည့် သတင်းထုတ်ပြန်ဖော်ပြမှု၊ လှုံ့ဆော်ဝါဒ ဖြန့်မှုများကြောင့် နိုင်ငံတကာက ဖြစ်စဉ်အခြေအနေမှန်အား မသိရှိသည်ကို တွေ့မြင်ရမည်ဖြစ်ကြောင်း၊ နိုင်ငံတော်အစိုးရနှင့် တပ်မတော်အနေဖြင့် တရားဥပဒေနှင့်အညီ မှန်ကန်စွာလုပ်ဆောင်နေသော်လည်း နိုင်ငံတကာမှ သိရှိမှုများသည် မှားယွင်းလျက်ရှိကြောင်း၊ မိမိတို့တပ်မတော်အနေဖြင့် တိုင်းရင်းသားများနှင့် တစ်စည်းတစ်လုံးတည်း စိတ်ချမ်းမြေ့စွာနေထိုင်နိုင်ရန်အတွက် ထာဝစဉ်စောင့်ထိန်း ဆောင်ရွက်သွားမည် ဖြစ်ကြောင်း၊ ရခိုင်ဒေသရှိ လူနည်းစုဖြစ်သည့် တိုင်းရင်းသားများ လူမျိုးတုန်းသတ်ဖြတ်မှု မခံရအောင် အပြည့်အဝကာကွယ်ပေးသွားမည်ဖြစ်ကြောင်း၊ တပ်မတော်အနေဖြင့် အပြုသဘောဆောင်ပြီး ကောင်းမွန်သည့် လုပ်ဆောင်ချက်များကိုလည်း ညှိနှိုင်းလုပ်ဆောင်သွားမည်ဖြစ်ကြောင်း ရှင်းလင်းပြောကြားသည်။

ထို့နောက် ပြည်တွင်းငြိမ်းချမ်းရေး ဖော်ဆောင်မှုနှင့်ပတ်သက်ပြီး တိုင်းရင်းသားပြည်သူများ၏ ဆန္ဒနှင့်အညီ ပါတီစုံဒီမိုကရေစီလမ်းကြောင်းပေါ်တွင် ခိုင်ခိုင်မာမာ ဖြောင့်ဖြောင့်တန်းတန်း လျှောက်လှမ်းနိုင်ရန်အတွက် ဒီမိုကရေစီရည်မှန်းချက်များ အောင်မြင်ပြီး နိုင်ငံဖွံ့ဖြိုးတိုးတက်စေရေးအတွက် အဓိကလိုအပ်ချက်သည် နိုင်ငံတော် တည်ငြိမ်အေးချမ်းရေးနှင့် ထာဝရငြိမ်းချမ်းရေးပင်ဖြစ်ကြောင်း၊ ထို့ကြောင့်တိုင်းရင်းသား လက်နက်ကိုင်အဖွဲ့ ၈ ဖွဲ့နှင့် လက်မှတ်ရေးထိုးနိုင်ခဲ့သည့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (Nationwide Ceasefire Agreement-NCA)သည် နိုင်ငံ၏ ငြိမ်းချမ်းရေး လုပ်ငန်းစဉ်တွင် အဓိကအကျဆုံး အခြေခံလုပ်ဆောင်ရမည့် အချက်ပင်ဖြစ်ကြောင်း၊ NCA သည် အမည်နာမအားဖြင့်သာ ပစ်ခတ်တိုက်ခိုက်မှုရပ်စဲရေးသဘောတူစာချုပ်ဖြစ်သော်လည်း အနှစ်သာရအားဖြင့် ပိုမိုနက်ရှိုင်းပါကြောင်း၊ စာချုပ်တွင်ပါ၀င်သည့် အချက်များသည် တိုင်းရင်းသားပြည်သူလူထု၏ အခွင့်အရေးကို ကန့်သတ်ထားခြင်း၊ ချုပ်ချယ်ထားခြင်း၊ ပိတ်ပင်ထားခြင်း တစ်ခုမှမပါ၀င်ဘဲ အခွင့်အရေးများကို တတ်နိုင်သမျှ ပေးထားကြောင်း၊ NCA စာချုပ်တွင်ပါ၀င်သည့် လုပ်သင့်လုပ်ထိုက်သည့်ကိစ္စများကို မြန်မြန်ဆန်ဆန် အကောင်အထည်ဖော် လုပ်ဆောင်ခြင်းအားဖြင့် ငြိမ်းချမ်းမှု၏ရလဒ်များ၊ အသီးအပွင့်များကို အမြန်ဆုံးရယူ ခံစားနိုင်မည်ဖြစ်ကြောင်း၊ တပ်မတော်၏ ငြိမ်းချမ်းရေးမူဝါဒ(၆)ရပ်သည်လည်း အတိတ်သမိုင်းကြောင်း အခြေအနေများနှင့် လက်ရှိအခြေအနေများကိုနှိုင်းယှဉ်ပြီး နှစ်ဖက်စလုံးလိုက်နာပူးပေါင်း ဆောင်ရွက်သင့်သည့် အခြေခံအချက်များကိုဖော်ထုတ်ထားခြင်းဖြစ်ကြောင်း၊ နိုင်ငံတော်ကာကွယ်ရေးတာဝန်ကိုအဓိကတာဝန်ယူ ထမ်းဆောင်နေသည့် တပ်မတော်အနေဖြင့် အမျိုးသားရေးတာဝန်ဖြစ်သည့် ဒို့တာဝန်အရေးသုံးပါးကို မည်သည့်အခါမှ ပွန်းပဲ့ခံမည်မဟုတ်ဘဲ အမြဲဦးထိပ်ပန်ဆင်ပြီး ကာကွယ်စောင့်ရှောက်သွားမည်ဖြစ်ကြောင်း ရှင်းလင်းပြောကြားသည်။

ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်သည် ဗိုလ်လောင်းတပ်ရင်းများ၏ အလေးပြုခြင်းကို ခံယူပြီးနောက် စစ်ရေးပြအခမ်းအနားမှ ပြန်လည်ထွက်ခွာသည်။

စစ်ရေးပြအခမ်းအနားအပြီးတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူုးကြီး မဟာသရေစည်သူ မင်းအောင်လှိုင်သည် စစ်တက္ကသိုလ်ကျောင်းဌာနချုပ်၊ ဧည့်ခန်းမ၌ ထူးချွန်ဆုရရှိကြသည့် ဗိုလ်လောင်း ၅ ဦးနှင့် ၎င်းတို့၏မိဘများအား တွေ့ဆုံ၍ ဂုဏ်ပြုအမှာစကားပြောကြားခဲ့သည်။