ရခိုင်ပြည်နယ်၌ ဗုဒ္ဓဘာသာသာသနာတော်ကြီး တည်တံ့ပြန့်ပွားစေရန်၊ သာသနာ့ အာဇာနည်များ ပေါ်ထွန်း စေရန်၊ ပရိယတ္တိစာမေးစာပြန်ပွဲများ၊ ဘာသာရေး၊ သာသနာရေးအခမ်းအနားများ ခမ်းနားတင့်တယ်စွာကျင်းပ နိုင်ရန်အတွက် စစ်တွေမြို့သာသနာ့ဗိမာန်တော်ကြီး တည်ဆောက်ပြီးစီးဖွင့်လှစ်လှူဒါန်း

(Unicode Version)

ရခိုင်ပြည်နယ်၌ ဗုဒ္ဓဘာသာသာသနာတော်ကြီး တည်တံ့ပြန့်ပွားစေရန်၊ သာသနာ့ အာဇာနည်များ ပေါ်ထွန်း စေရန်၊ ပရိယတ္တိစာမေးစာပြန်ပွဲများ၊ ဘာသာရေး၊ သာသနာရေးအခမ်းအနားများ ခမ်းနားတင့်တယ်စွာကျင်းပ နိုင်ရန်အတွက် စစ်တွေမြို့သာသနာ့ဗိမာန်တော်ကြီး တည်ဆောက်ပြီးစီးဖွင့်လှစ်လှူဒါန်း

နေပြည်တော်၊ ဒီဇင်ဘာ – ၃

ရခိုင်ပြည်နယ်သည် မြန်မာနိုင်ငံ၏ဗုဒ္ဓဘာသာထွန်းကားပြန့်ပွားရာဘူမိနက်သန် နယ်မြေတစ်ခုဖြစ်ပြီး ဗုဒ္ဓဘာသာအမြဲတမ်းတည်တံ့ခိုင်မြဲ ထွန်းလင်းတောက်ပစေရန်နှင့် ပရိယတ္တိ၊ ပဋိပတ္တိသာသနာ ဆောင်ရွက် ကြမည့် သာသနာ့အာဇာနည် သံဃာတော်များ စဉ်ဆက်မပြတ်ပေါ်ထွန်းနိုင်ရန်အတွက်ရည်ရွယ်၍ တပ်မတော် (ကြည်း၊ရေ၊လေ) မိသားစုများနှင့် စေတနာရှင်ပြည်သူများ၏ စုပေါင်းလှူဒါန်းမှုဖြင့် စစ်တွေမြို့၊ လောကနန္ဒာ စေတီတော် ပရိဝုဏ်အတွင်းတည်ဆောက်ခဲ့သည့် သာသနာ့ဗိမာန်တော်ကြီး ဖွင့်လှစ်လှူဒါန်းခြင်း အခမ်းအနား အားယနေ့နံနက်ပိုင်းတွင်ကျင်းပပြုလုပ်ရာ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် တက်ရောက်ဖွင့်လှစ်သည်။

အဆိုပါအခမ်းအနားသို့ ပြည်နယ်သြဝါဒစရိယဆရာတော်၊ စစ်တွေမြို့၊ ဒက္ခိဏာ ရာမကျောင်းတိုက်ပဓာန နာယက၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မမဇောတိကဓဇ ဘဒ္ဒန္တစန္ဒနှင့် ပြည်နယ်သံဃနာယက ဥက္ကဋ္ဌဆရာတော်၊ စစ်တွေမြို့၊ ဓမ္မသုခကျောင်းတိုက် ပဓာနနာယက၊ အဂ္ဂမဟာဂန္တဝါစကပဏ္ဍိတ ဘဒ္ဒန္တသောမ အမှူးပြုသောသံဃာတော်များ၊တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်ဇနီး ဒေါ်ကြူကြူလှ၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီးခင်အောင်မြင့်၊ ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများ၊ အနောက်ပိုင်း တိုင်းစစ်ဌာနချုပ်တိုင်းမှူး ဗိုလ်မှူးချုပ် စိုးတင့်နိုင်၊ ရခိုင်ပြည်နယ် အစိုးရအဖွဲ့မှတာဝန်ရှိသူများ၊ ပြည်နယ် လွှတ်တော်မှတာဝန်ရှိသူများ စေတနာရှင်အလှူရှင်များ၊ ဖိတ်ကြားထားသည့် ဧည့်သည်တော်များ၊ ရပ်မိရပ်ဖ များနှင့် ဧည့်ပရိသတ်များတက်ရောက်ကြသည်။

ဦးစွာ အနောက်ပိုင်းတိုင်းစစ်ဌာနချုပ်တိုင်းမှူး ဗိုလ်မှူးချုပ်စိုးတင့်နိုင်၊ ရခိုင်ပြည်နယ် လူမှုရေးဝန်ကြီး ဒေါက်တာချမ်းသာနှင့် မြို့မိမြို့ဖ ဦးမောင်ထွန်းကျော်တို့က သာသနာ့ ဗိမာန်တော်ကြီးအား ဖဲကြိုးဖြတ်ဖွင့် လှစ်ပေးကြသည်။ ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က သာသနာ့ဗိမာန်တော်ကမ္ပည်းမော်ကွန်း ကျောက်စာတိုင်နှင့် သာသနာ့ဗိမာန်အမည်စာတမ်းအား စက်ခလုတ် နှိပ်ဖွင့်လှစ်ပေးပြီး အမွှေးနံ့သာရည်များပက်ဖျန်းကြသည်။

ထို့နောက်တပ်မတော်ကာကွယ်ရေးဦးစီးချုပ်က သာသနာ့ဗိမာန်တော်ကြီးရှိ ဗုဒ္ဓရုပ်ပွားတော်မြတ်အား မြသပိတ် ဆွမ်းတော်၊ သစ်သီး၊ ပန်းမန်၊ သောက်တော်ရေချမ်းများ ကပ်လှူပူဇော်သည်။ ၎င်းနောက် တပ်မတော် ကာကွယ်ရေးဦးစီးချုပ်နှင့် အခမ်းအနား တက်ရောက်လာကြသူများသည် ပြည်နယ်သြဝါဒစရိယဆရာတော်၊ စစ်တွေမြို့၊ ဒက္ခိဏာ ရာမကျောင်းတိုက်ပဓာန နာယက၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မမဇောတိကဓဇ ဘဒ္ဒန္တစန္ဒထံမှ ငါးပါးသီလခံယူဆောက်တည်ကြပြီး သံဃာတော်များရွတ်ပွားသရဇ္ဈာယ် တော်မူကြသည့် မေတ္တသုတ်ပရိတ်တရားတော်များအားနာယူကြသည်။

ယင်းနောက် တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီးမင်းအောင်လှိုင်နှင့် ဇနီးဒေါ်ကြူကြူလှတို့သည် ပြည်နယ်သြဝါဒစရိယဆရာတော်ကြီးထံ သဒ္ဓမ္မသုံးဖြာ သာသနာတော်မြတ်ကြီးအတွက် သာသနာ့ဗိမာန် တော်ကြီးကို သာဟတ္ထိကမြောက် ဆက်ကပ်လှူဒါန်းကြသည်။ ထို့နောက် တပ်မတော်ကာကွယ်ရေး ဦးစီးချုပ်နှင့်ဇနီးနှင့် အခမ်းအနားတက်ရောက်လာကြသူများက သံဃာတော်အရှင်သူမြတ် များအား လှူဖွယ် ပစ္စည်းများဆက်ကပ်လှူဒါန်းကြသည်။

ဆက်လက်ပြီး သာသနာ့ဗိမာန်တော်ကြီး တည်ဆောက်လှူဒါန်းရခြင်းနှင့် စပ်လျဉ်း ၍ စစ်အင်ဂျင်နီယာ ညွှန်ကြားရေးမှူးရုံး ညွှန်ကြားရေးမှူး ဗိုလ်ချုပ်မောင်မောင်မြင့်က ရှင်းလင်းလျှောက်ထားသည်။ ယင်းနောက် စစ်ထောက်ချုပ် ဒုတိယဗိုလ်ချုပ်ကြီးညိုစော က သာသာနာ့ဗိမာန်တော်ကြီးနှင့် သက်ဆိုင်သည့် မှတ်တမ်း ဓာတ်ပုံများနှင့် စာရွက်စာတမ်းများကို ရခိုင်ပြည်နယ်သာသနာရေးဦးစီးမှူးထံသို့လွှဲပြောင်းပေးအပ်ပြီး သာသနာ့ ဗိမာန်တော်ကြီး တည်ဆောက်ပေးသည့် ဓညဝတီငွေတင်းပြည့် ကုမ္ပဏီအား ဂုဏ်ပြုချီးမြှင့်ငွေ များပေးအပ် သည်။

ထို့နောက် တပ်မတော်ကာကွယ်ရေးဦးစီးချုပ်၊ ဇနီးနှင့် အခမ်းအနားတက်ရောက် လာကြသူများသည် ပြည်နယ်သံဃနာယက ဥက္ကဋ္ဌဆရာတော်၊ စစ်တွေမြို့၊ ဓမ္မသုခ ကျောင်းတိုက် ပဓာနနာယက၊ အဂ္ဂမဟာဂန္တဝါစကပဏ္ဍိတ ဘဒ္ဒန္တသောမထံမှ အနုမောဒနာတရားနာကြား၍ လှူဒါန်းမှုအစုစုအတွက် ရေစက် သွန်းချအမျှပေးဝေကြသည်။ ၎င်းနောက် သံဃာတော်အရှင်သူမြတ်များက သာသနာ့ဗိမာန်တော်ကြီးအပေါ်ထပ် ရှိ ဗုဒ္ဓကျောင်းဆောင်တွင်အပူဇော်ခံထားရှိမည့် ကြေးသွန်းဗုဒ္ဓရုပ်ပွားတော်မြတ်ကြီးအား ဗုဒ္ဓါဘိသေက အနေကဇာတင်၍ ဗုဒ္ဓါဘိသိက်သွန်းတော်မူကြသည်။ ယင်းနောက် တပ်မတော်ကာကွယ်ရေးဦးစီးချုပ်၊ ဇနီးနှင့် အဖွဲ့ဝင်များသည် သံဃာတော်အရှင် သူမြတ်များအားနေ့ဆွမ်းဆက်ကပ်လှူဒါန်းကြသည်။

ယခင်ကစစ်တွေမြို့လောကနန္ဒာစေတီတော်ပရိဝုဏ်အတွင်း သာသနာ့ဗိမာန် ဆောက်လုပ်ရန်၂၀၁၀ ခုနှစ်တွင် စတင်လုပ်ဆောင်ခဲ့ရာ ၂၀၁၁ ခုနှစ်တွင်အကြောင်း အမျိုးမျိုးကြောင့် ဆောက်လုပ်မှုရပ်ဆိုင်းခဲ့ရပြီး ၂၀၁၆ ခုနှစ် ဇူလိုင်လအတွင်း တပ်မတော်ကာကွယ်ရေးဦးစီးချုပ် စစ်တွေမြို့သို့လာရောက်ခဲ့စဉ် ပြည်နယ်သံဃနာယက ဥက္ကဋ္ဌဆရာတော်ကြီး၏ သြဝါဒမိန့်ကြားချက်အရ တပ်မတော်ကာကွယ်ရေး ဦးစီးချုပ်၏လမ်းညွှန်ချက်ဖြင့် စစ်အင်ဂျင်နီယာညွှန်ကြားရေးမှူးရုံးမှ ဒီဇိုင်းပုံစံထုတ်လုပ်၍ တာဝန်ယူကြီးကြပ်မှုဖြင့် ဓညဝတီ ငွေတင်းပြည့် ဆောက်လုပ်ရေးကုမ္ပဏီက ဆောက်လုပ်ခဲ့ခြင်းဖြစ်သည်။ တပ်မတော်(ကြည်း၊ရေ၊လေ) မိသားစုများနှင့် စေတနာရှင်အလှူရှင်များ၏ လှူဒါန်းငွေစုစုပေါင်း ကျပ်သန်း ၁၅၀၀ ဖြင့် ၂၀၁၆ ခုနှစ်နို၀င်ဘာလတွင် စတင်တည်ဆောက်ခဲ့ခြင်းဖြစ်ကာ အလျား ၁၇၁ ပေ၊ အနံ ရ၂ ပေ၊ အမြင့် ၃၁ ပေရှိ သံကူကွန်ကရစ် နှစ်ထပ်ဗိမာန်တော်ကြီးဖြစ်သည်။ သာသနာ့ဗိမာန်တော်ကြီးအတွင်း သံဃာတော်အပါး ၅၀၀ ခန့်တစ်ပြိုင်တည်း စာပြန်ပွဲပြုလုပ်နိုင်ပြီး ဘာသာရေး၊ သာသနာရေး အခမ်းအနားများအတွက် ပရိသတ်ဦးရေ ၈၀၀ ကျော်ဝင် ဆန့်မှုရှိကြောင်း သိရှိရသည်။ထို့ကြောင့် ရခိုင်ပြည်နယ်အတွင်းနှစ်စဉ်ကျင်းပပြုလုပ်သည့် သံဃာတော်များ စာပြန်ပွဲ ကျင်းပခြင်းများ၊ သာသနာရေးဆိုင်ရာ အခမ်းအနားများကျင်းပခြင်းများနှင့် အခြားသာသနာရေး ဆိုင်ရာ အခမ်းအနားများအား အခက်အခဲမရှိအဆင်ပြေချောမွေ့စွာဖြင့် ကျင်းပနိုင်တော့မည် ဖြစ်ကြောင်း သိရှိရသည်။

ဆက်လက်ပြီး အောင်စကြာမုနိသိမ်တော်မြတ်ကြီးအတွင်းရှိ စကြာမုနိဗုဒ္ဓရုပ်ပွားတော်မြတ်ကြီးအား တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇနီးဒေါ်ကြူကြူလှ၊ သားသမီး မြေးမိသားစုကလှူဒါန်းသည့် ဖန်အုပ်ဆောင်းတော်တပ် ဆင်လှူဒါန်းပူဇော်ပွဲကို ကျင်းပရာဦးစွာ တပ်မတော်ကာကွယ်ရေးဦးစီးချုပ်က စကြာမုနိဗုဒ္ဓရုပ်ပွားတော်မြတ်ကြီးအား ပန်း၊ ရေချမ်း၊ ဆီမီးများကပ်လှူပူ ဇော်သည်။

ထို့နောက် တပ်မတော်ကာကွယ်ရေးဦးစီးချုပ်နှင့်ဇနီးဒေါ်ကြူကြူလှတို့က စကြာမုနိဗုဒ္ဓရုပ်ပွား တော်မြတ်ကြီးတွင် တပ်ဆင်မည့်ဖန်အုပ်ဆောင်းတော်ကိုသဟတ္ထိကမြောက် ပြည်နယ်သံဃနာယက ဥက္ကဋ္ဌဆရာတော်ကြီးထံ ဆက်ကပ်လှူဒါန်းပြီး အလှူငွေများအား ဆက်ကပ်လှူဒါန်းသည်။ ယင်းနောက် ဖန်အုပ်ဆောင်းတော်အား ရုပ်ပွားတော်မြတ်တွင် တပ်ဆင်ဆက်ကပ်သည်။

၎င်းနောက် တပ်မတော်ကာကွယ်ရေးဦးစီးချုပ်၊ ဇနီးနှင့်အဖွဲ့ဝင်များသည် ပြည်နယ် သံဃနာယက ဥက္ကဋ္ဌ ဆရာတော်ကြီးထံမှ အနုမောဒနာတရားနာယူပြီး လှူဒါန်းမှုအစုစု အတွက်ရေစက်သွန်းချအမျှပေးဝေကြသည်။ အဆိုပါစကြာမုနိဗုဒ္ဓရုပ်ပွားတော်မြတ်ကြီး သည်တတိယဓညဝတီခေတ် စန္ဒသူရိယမင်းလက်ထက်ရှေးဟောင်း အံ့မခန်း ကြေးသွန်းလက်ရာများဖြင့် ကြည်ညိုဖွယ်သပ္ပါယ်တော်မူသည့် ဗုဒ္ဓရုပ်ပွားတော်မြတ်ကြီး ဖြစ်ပြီး သဘာဝဘေးအန္တရာယ်များမှ ကာကွယ်နိုင်ရန်နှင့် ရေရှည်တည်တံ့ခိုင်မြဲစေရန် အတွက် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇနီးဒေါ်ကြူကြူလှ၊ သားသမီးမြေးမိသားစုတို့က ဖန်အုပ်ဆောင်းတော်ကြီးကို တပ်ဆင်လှူဒါန်း ပူဇော်ခြင်းဖြစ်သည်။ ဖန်အုပ်ဆောင်းတော်ကြီးမှာ အချင်း ၂၆ လက်မ၊ အမြင့် ၃၆ လက်မ၊ ထု ၀ ဒသမ ရ၈ လက်မ၊ အလေးချိန် ၅၆ ဒသမ ရ ကီလို ဂရမ်ရှိ Acrylic အမျိုးအစားဖြစ််ကြောင်းသိရှိရသည်။

ယင်းနောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် လောကနန္ဒာ စေတီတော်မြတ်ကြီး အတွင်းရှိ ဗုဒ္ဓရုပ်ပွားတော်အားဖူးမြော်ကြည်ညိုပြီး တပ်မတော်ကာကွယ်ရေးဦးစီးချုပ်နှင့်ဇနီးတို့သည် စေတီတော်ကြီးရှိ ဧည့်သည်တော်မှတ်တမ်း စာအုပ်တွင်လက်မှတ်ရေးထိုးသည်။ ထို့နောက် တပ်မတော်ကာကွယ်ရေးဦးစီးချုပ်နှင့်ဇနီးတို့က စေတီတော်ကြီးအတွက် အလှူငွေများအား ဂေါပကအဖွဲ့ထံပေးအပ်လှူဒါန်းသည်။ ယင်းနောက် တပ်မတော်ကာကွယ်ရေးဦးစီးချုပ်သည် လောကနန္ဒာစေတီတော်မြတ်ကြီး ဘက်စုံပြုပြင် မွန်းမံရန်လိုအပ်လျက်ရှိသည့် အခြေအနေများအားကြည့်ရှု၍ လိုအပ်သည်များ ဆောင်ရွက်နိုင်ရန် တာဝန်ရှိသူများအားစီစဉ်မှာကြားခဲ့သည်။