နိုင်ငံတော်နှင့်တပ်မတော်အတွက် အားထားရမည့် အင်ဂျင်နီယာအတတ်ပညာရှင် သားကောင်းရတနာများဖြစ်အောင် ကြိုးပမ်းအားထုတ်သွားကြရန်လို

ထုိသုိ႔ေတြ႕ဆုံေျပာၾကားရာတြင္ မိမိတုိ႔အေနျဖင့္ ၆ ႏွစ္တာကာလအတြင္း စဥ္ဆက္မျပတ္ ႀကိဳးစားအားထုတ္ခဲ့မႈမ်ားေၾကာင့္ ယခုကဲ့သုိ႔ ထူးခြၽန္ဆုမ်ားရရွိခဲ့ျခင္းျဖစ္ၿပီး ဆက္လက္ထိန္းသိမ္း ေဆာင္ရြက္သြားၾကရန္ လုိေၾကာင္း၊ မိဘမ်ားကမိမိတုိ႔ ေမြးသည့္အခ်ိန္မွစ၍ ယေန႔ တပ္မေတာ္နည္းပညာတကၠသုိလ္သုိ႔ ေရာက္သည္အထိ ပညာသင္ၾကားေပး၍ ေကြၽးေမြးျပဳစုသြန္သင္ဆုံးမေပးခဲ့ၾကၿပီး တပ္မေတာ္နည္းပညာ တကၠသုိလ္ တက္ေရာက္ခ်ိန္မွစ၍ ယခုသင္တန္းၿပီးဆုံးခ်ိန္ အရာရွိငယ္မ်ားျဖစ္သည္ အထိတပ္မေတာ္မွ ေမြးထုတ္ေပးလုိက္ေၾကာင္း၊ မိမိကုိယ္ကုိ အလုိမလုိက္ပဲ ထိန္းသိမ္းလုပ္ေဆာင္ျခင္းျဖင့္ ႏုိင္ငံေတာ္အေပၚ၊ မိဘမ်ားအေပၚ အက်ိဳးျပဳႏုိင္သည့္ အရာရွိမ်ားျဖစ္ေအာင္ ထိန္းသိမ္းလုပ္ေဆာင္သြားၾကရန္ လုိေၾကာင္းျဖင့္ မွာၾကားခဲ့သည္။

(Unicode Version)

နိုင်ငံတော်နှင့်တပ်မတော်အတွက် အားထားရမည့် အင်ဂျင်နီယာအတတ်ပညာရှင် သားကောင်းရတနာများ ဖြစ်အောင် ကြိုးပမ်းအားထုတ်သွားကြရန်လို

နေပြည်တော်၊ ဒီဇင်ဘာ ၈

မိမိတို့တပ်မတော်ကို ခေတ်မီပြီးစွမ်းရည်ထက်မြက်သည့် တပ်မတော်အဖြစ် တည်ဆောက်ရာတွင် “ အင်ဂျင်နီယာစွမ်းပကား တပ်မတော်အား” ဆိုသည့် ဆောင်ပုဒ်နှင့်အညီ အင်ဂျင်နီယာအတတ်ပညာဖြင့် တိုက်စွမ်းအားမြှင့်တင်ရန် ကြိုးစားကြရမည်ဖြစ်သကဲ့သို့ တိုက်စွမ်းရည်ရှိရန်လည်း ထိရောက်သည့် လေ့ကျင့်မှုများ ပြုလုပ်ရန်လိုအပ်ကြောင်း၊ ထိုကဲ့သို့ လေ့ကျင့်ရေးဖြင့်တည်ဆောက်ရာတွင် ရုပ်ပိုင်းဆိုင်ရာ၊ စိတ်ပိုင်းဆိုင်ရာများကိုပါ လေ့ကျင့်ပေးပြီး တပ်မတော်၏ လုပ်ငန်းစဉ်(၃)ရပ်ဖြစ်သည့် “လေ့လာ၊ လေ့ကျင့်၊ လိုက်နာ” ဆိုသည့်အတိုင်း လေ့လာမှတ်သားမှုများ၊ လေ့ကျင့်မှုများ အမြဲမပြတ်ဆောင်ရွက်ပြီး ရရှိထားသည့် လေ့လာထားမှု၊ လေ့ကျင့်မှုများအတိုင်း လုပ်ငန်းခွင်တွင် လိုက်နာဆောင်ရွက်၍ နိုင်ငံတော်နှင့်တပ်မတော် အတွက် အားထားရမည့် အင်ဂျင်နီယာအတတ်ပညာရှင် သားကောင်းရတနာများဖြစ်အောင် ကြိုးပမ်းအား ထုတ်သွားကြရန် လိုအပ်ကြောင်းဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က ယနေ့နံနက်ပိုင်းတွင် ပြင်ဦးလွင်မြို့၊ တပ်မတော်နည်းပညာတက္ကသိုလ် စစ်ရေးပြကွင်း၌ ကျင်းပပြုလုပ်သည့် တပ်မတော်နည်းပညာတက္ကသိုလ် ဗိုလ်လောင်းသင်တန်းအမှတ်စဉ်(၁၉) သင်တန်းဆင်း ဂုဏ်ပြုစစ်ရေးပြအခမ်းအနား၌ မိန့်ခွန်းပြောကြားရာတွင် ထည့်သွင်းပြောကြားသည်။

အဆိုပါအခမ်းအနားသို့ တပ်မတော်ကာကွယ်ရေးဦးစီးချုပ်၏ဇနီး ဒေါ်ကြူကြူလှ၊ နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး သီရိပျံချီ ရဲအောင်နှင့်ဇနီး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး ဇေယျကျော်ထင် တင်အောင်စန်းနှင့်ဇနီး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ဇေယျကျော်ထင် ခင်အောင်မြင့်နှင့်ဇနီး၊ ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများနှင့်ဇနီးများ၊ တိုင်းမှူးများ၊ တပ်မတော်နည်းပညာတက္ကသိုလ် ကျောင်းအုပ်ကြီးနှင့် ပြင်ဦးလွင်တပ်နယ်မှ တပ်မတော်အရာရှိကြီးများ၊ ဖိတ်ကြားထားသည့် ဧည့်သည်တော်များ၊ သင်တန်းဆင်းဗိုလ်လောင်းများ၏ မိဘဆွေမျိုးများတက်ရောက် ကြသည်။

ဦးစွာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်သည် ဗိုလ်လောင်းတပ်ရင်းများ၏ အလေးပြုခြင်းကိုခံယူပြီး ကျောင်းဆင်းဗိုလ်လောင်းတပ်ရင်းများအား စစ်ဆေးသည်။

ထို့နောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်အား ဗိုလ်လောင်းတပ်ရင်းများက အနှေးလျှောက်၊ အမြန်လျှောက်တို့ဖြင့် ချီတက်အလေးပြုကြသည်။

ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က တပ်မတော်နည်းပညာတက္ကသိုလ် ဗိုလ်လောင်းသင်တန်းအမှတ်စဉ်(၁၉)မှ အောင်စစ်သည်ဆုရရှိသူ ဗိုလ်လောင်းအမှတ် ရ၀၇၆ ဗိုလ်လောင်း စံရဲကျော်၊ လေ့ကျင့်ရေးထူးချွန်ဆုရရှိသူ ဗိုလ်လောင်းအမှတ် ရ၀၉၇ ဗိုလ်လောင်း ဇင်ကိုထက်နှင့် စာပေထူးချွန်ဆုရရှိသူ ဗိုလ်လောင်းအမှတ် ရ၀၆၀ ဗိုလ်လောင်း ကျော်ဇင်သန့်တို့အား ဆုများအသီးသီးပေးအပ်ချီးမြှင့်သည်။

ထို့နောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က သင်တန်းဆင်းဗိုလ်လောင်းများအား မိန့်ခွန်းပြောကြားရာတွင် မိမိတို့နိုင်ငံ၏အတိတ်သမိုင်းတွင် ခေတ်ကာလ နှင့်အညီ စွမ်းရည်ရှိသည့် တပ်မတော်တစ်ရပ်မရှိခဲ့ခြင်းကြောင့် နိုင်ငံတော်၏ ပိုင်နက်နယ်မြေနှင့် အချုပ်အခြာအာဏာကို ကာကွယ်ထိန်းသိမ်းနိုင်စွမ်းမရှိဘဲ သူ့ကျွန်ဘဝကျရောက်ခဲ့ရကြောင်း၊ နိုင်ငံတော်၏ လွတ်လပ်ရေးအတွက် တိုက်ပွဲဝင်ခဲ့ရပြီး အရေးကြီးသည့် အလှည့်အပြောင်းကာလများတွင် တပ်မတော်သည် နိုင်ငံတော်အတွက် မားမားမတ်မတ် ရပ်တည်ပေးခဲ့ကြောင်း၊ အတိတ်သမိုင်းမှရရှိခဲ့သည့် သင်ခန်းစာများအရ ယခုအခါတွင် တပ်မတော်ကို စွမ်းရည်ပြည့်ဝသည့် Standard Army ဖြစ်အောင် တည်ဆောက်လျက်ရှိကြောင်း၊ မိမိတို့နိုင်ငံ၏ ပထဝီအနေအထား၊ မျက်မောက်ခေတ်ကာလ ခေတ်သစ်စစ်ပွဲများ၏ အသွင်သဏ္ဍာန်၊ အနာဂတ်စစ်ပွဲများ၏ အလားအလာများအရ နိုင်ငံတော်အပေါ် ကျရောက်လာမည့် ပြည်တွင်း/ပြည်ပ အန္တရာယ်များကို ကာကွယ်နိုင်ရန်အတွက် ခေတ်မီတပ်မတော်တစ်ရပ် တည်ဆောက်ရေးသည် ယနေ့ခေတ် ကာလ၏ မဖြစ်မနေလိုအပ်သည့် လုပ်ငန်းစဉ်တစ်ရပ်ဖြစ်ကြောင်း၊ ထို့ကြောင့် မိမိတို့တပ်မတော်အား အင်အားတောင့်တင်းပြီး စွမ်းရည်ထက်မြက်သည့် ခေတ်မီမျိုးချစ် တပ်မတော်ဖြစ်အောင် တပ်တည်ဆောက်ရေး လုပ်ငန်းကြီး ၄ ရပ်ကို အကောင်အထည် ဖော်ပြီး တပ်ရင်း/တပ်ဖွဲ့များ၏ စွမ်းရည် ၃ ရပ်ထက်မြက်အောင် ဆောင်ရွက်လျက်ရှိကြောင်း ရှင်းလင်းပြောကြားသည်။

ယင်းနောက် ခေတ်မီတပ်မတော်တည်ဆောက်ရာတွင် အင်အားတောင့်တင်းရန် လိုအပ်သကဲ့သို့ စွမ်းရည်ထက်မြက်ရန်လည်း လိုအပ်ကြောင်း၊ ခေတ်မီတပ်မတော်တစ်ရပ်ဖြစ်ရန်အတွက် စစ်မှုသိပ္ပံနှင့် နည်းပညာဖွံ့ဖြိုးတိုးတက်မှုများ၊ စစ်မှုရေးရာ တော်လှန်ပြောင်းလဲမှုများကိုလည်း လေ့လာသိရှိနေရန် လိုအပ်ကြောင်း၊ သမိုင်းဦးကာလမှ ယနေ့မျက်မှောက်ခေတ်အထိ စစ်၏သဘောတရားများ၊ စစ်ပွဲ အယူအဆများ၊ စစ်ပွဲပုံသဏ္ဍန်များ၊ စစ်နည်းဗျူဟာနှင့် စစ်မဟာဗျူဟာများသည်လည်း စစ်ဘက်နည်းပညာ ဖွံ့ဖြိုးမှု၊ စစ်လက်နက်ပစ္စည်းများ ဆန်းသစ်တီထွင်လာမှုနှင့်ယှဉ်တွဲပြီး အဆင့်ဆင့်တိုးတက်ပြောင်းလဲ လျက်ရှိကြောင်း၊ မျက်မှောက်ကာလ နယ်ပယ်အသီးသီးတွင် နည်းပညာဆိုင်ရာ ဖွံ့ဖြိုးတိုးတက်မှုများနှင့်အတူ စိန်ခေါ်မှုများစွာကို ကမ္ဘာ့နိုင်ငံအသီးသီးက ရင်ဆိုင်နေရကြောင်း၊ နည်းပညာဆိုသည်မှာ စိတ်ကူးမှုများကို လက်တွေ့အကောင်အထည်ဖော် အသုံးချနိုင်အောင်ဆောင်ရွက်သည့် ပညာရပ်ဆိုင်ရာနည်းနာဖြစ်ပြီး ဘောင်ကန့်သတ်ချက် မရှိသောကြောင့် ပြိုင်ဆိုင်မှုနှင့်စိန်ခေါ်မှုများ စဉ်ဆက်မပြတ် ဖြစ်ပေါ်လျက်ရှိကြောင်း၊ ယနေ့ခေတ်ကာလတွင် သတင်းအချက်အလက်စီးဆင်းမှု လွယ်ကူမြန်ဆန်မှုနှင့်အတူ နည်းပညာ ဖွံ့ဖြိုးတိုးတက်မှုသည်လည်း အရှိန်အဟုန်ဖြင့် ပြောင်းလဲတိုးတက်နေသည့်အတွက် နည်းပညာဖွံ့ဖြိုးသည့်နိုင်ငံ နှင့် နည်းပညာမဖွံ့ဖြိုးသည့် နိုင်ငံများအကြားကွာဟမှုသည် နိုင်ငံ၏အချုပ်အခြာ အာဏာထိပါးခံရမှု၊ ဆုံးရှုံးနိုင်မှုတို့ကို ဖြစ်ပေါ်စေနိုင်သဖြင့် ကမ္ဘာ့နိုင်ငံအသီးသီးက နည်းပညာအခြေပြု ခေတ်မီတပ်မတော် တည်ဆောက်ရေးကို အပြိုင်အဆိုင် လုပ်ဆောင်နေကြသည်ကို လေ့လာတွေ့ရှိရမည်ဖြစ်ကြောင်း၊ ထိုကဲ့သို့ ခေတ်မီတပ်မတော်တည်ဆောက်မှုများကို လေ့လာကြည့်လျှင် စစ်မှုသိပ္ပံနှင့်နည်းပညာ ပြောင်းလဲတိုးတက်မှု များအရတပ်မတော်ကို အဆင့်မြှင့်တင်ခြင်း၊ ကျင့်သုံးသည့် စစ်ဆင်မှုသဘောတရား ပြောင်းလဲခြင်းများကို တွေ့မြင်ရမည်ဖြစ်ကြောင်း၊ တပ်မတော်ကို ပြုပြင်ပြောင်းလဲမှုများနှင့်အတူ နိုင်ငံရေး၊ စီးပွားရေး၊ စစ်ရေးဆိုင်ရာပြောင်းလဲမှုများ၊ ကျင့်သုံးသည့် နိုင်ငံရေးစနစ်အပေါ်တွင်မူတည်ပြီး အတွေးအခေါ်အယူအဆများ၊ ခြိမ်းခြောက်မှုများ၊ လုံခြုံရေးဆိုင်ရာ အယူအဆများလည်း လိုက်ပါပြောင်းလဲနေသည်ကို တွေ့ရှိရမည်ဖြစ် ကြောင်းပြောကြားသည်။

ဆက်လက်ပြီး ယနေ့ခေတ်သည် နည်းပညာခေတ်ဖြစ်သည်နှင့်အညီ ပြောင်းလဲတိုးတက်နေသည့် နည်းပညာများကို မျက်ခြေမပြတ်လေ့လာနေရန်လိုကြောင်း၊ ခေတ်မီတပ်မတော် တည်ဆောက်ရေးတွင် တပ်မတော်သားတိုင်း၏ ပညာရည်မြင့်မားမှုသည် အရေးကြီးသည့် အခြေခံအချက်ဖြစ်ကြောင်း၊ ခေတ်နှင့်အညီ ပြောင်းလဲတိုးတက်နေသည့် နည်းပညာများကို အမှီလိုက်နိုင်ရန်အတွက် အရည်အချင်း၊ အရည်အသွေး မြင့်မားသည့် အင်ဂျင်နီယာများ ပေါ်ထွန်းလာရေးအတွက် ခေတ်မီပညာရေးစနစ်ကို အသုံးပြုရမည်ဖြစ်ကြောင်း၊ ယနေ့နည်းပညာဆိုင်ရာ ပညာရေးစနစ်များကို လေ့လာကြည့်လျှင် ရလဒ်အခြေပြုပညာရေးစနစ် (Outcome Based Education System) အား ပြောင်းလဲအသုံးပြုလာကြကြောင်း၊ သင်တန်းတစ်ခုပြီးဆုံးသည့်အချိန်တွင် မည်သည့်အရာများအား တတ်ကျွမ်းနားလည်ရမည်ဆိုသည့် မျှော်မှန်းရလဒ်များကို ကြိုတင်သတ်မှတ်ပြီး အဆိုပါပညာရပ်များ တတ်မြောက်အောင်သင်ကြားပေးရသည့် စနစ်ကိုဆိုလိုခြင်းဖြစ်ကြောင်း၊ တပ်မတော် နည်းပညာတက္ကသိုလ်မှ သင်ကြားပေးလိုက်သည့်ပညာများသည် အခြေခံမျှသာဖြစ်ပြီး မိမိတို့တပ်ရင်း/တပ်ဖွဲ့ အသီးသီးသို့ ရောက်ရှိတာဝန်ထမ်းဆောင်ချိန်တွင် သက်ဆိုင်ရာ ဘာသာရပ်အလိုက် သင်ကြားပေးလိုက်သည့် ပညာရပ်များကို ပိုမိုကျယ်ပြန့်စွာ သိရှိနားလည်စေရန်အမြဲတမ်း လေ့လာနေရမည်ဖြစ်ကြောင်း၊ အဓိကအားဖြင့် ၂၁ ရာစုခေတ်သစ်စစ်ပွဲကို ရင်ဆိုင်နိုင်ရန်အတွက် ခေတ်မီတပ်မတော် တစ်ရပ်လိုအပ်သည့်အပြင် တိုက်စွမ်းအားမြင့်မားသည့် ခေတ်မီစစ်လက်နက်ပစ္စည်းများ လိုအပ်မည်ဖြစ်ကြောင်း၊ စွမ်းအားမြင့် ခေတ်မီ စစ်လက်နက်ပစ္စည်းများသည် တိုက်ပွဲ၏အဆုံးအဖြတ်ကို ပြောင်းလဲနိုင်စွမ်းရှိကြောင်း၊ ထို့ကြောင့် မိမိတို့ တတ်မြောက်ထားသည့် အင်ဂျင်နီယာအတတ်ပညာများဖြင့် တိုက်စွမ်းအားမြင့်မား သောခေတ်မီစစ်လက်နက် ပစ္စည်းများကို ကျွမ်းကျင်စွာ ကိုင်တွယ်အသုံးပြုနိုင်ရုံမက တီထွင်ဖန်တီးနိုင်စွမ်းရှိအောင် တီထွင်မှု၊ သုတေသနပြုလုပ်မှုများကိုလည်း အားပေး လုပ်ဆောင်သွားကြရန်လိုကြောင်း မှာကြားသည်။

ဆက်လက်ပြီး အင်ဂျင်နီယာပညာဒဿန(Engineering Philosophy) အယူအဆသည် အင်ဂျင်နီယာ နည်းပညာဖြင့် သော်လည်းကောင်း၊ အင်ဂျင်နီယာများမှသော်လည်းကောင်း လူ့အဖွဲ့အစည်းအတွက် ၎င်းတို့၏ ပညာရပ်များကို မည်ကဲ့သို့အကျိုးရှိရှိ အသုံးပြုရမည်ဆိုသည့် စည်းမျဉ်းကိုရည်မှန်း၍ ရေးဆွဲသတ်မှတ်ထားသည့် အယူအဆတစ်ရပ်ဖြစ်ကြောင်း၊ သင်္ချာပညာရပ်များ၊ သဘာဝသိပ္ပံပညာရပ်များကို သင်ယူမှု၊ လေ့လာမှု၊ လက်တွေ့ဆောင်ရွက်မှုများမှတစ်ဆင့် နားလည်တတ်ကျွမ်းစေပြီး လူမှုအဖွဲ့အစည်းကို ဖွံ့ဖြိုးတိုးတက်စေရန်အတွက် သဘာဝပတ်ဝန်းကျင်ကို ပြုပြင်ဖန်တီးခြင်းပင်ဖြစ်ကြောင်း၊ အင်ဂျင်နီယာ ပညာရပ်သည် ခေတ်မီနိုင်ငံတည်ဆောက်ရေးအတွက် အဓိကမောင်းနှင်အားလည်းဖြစ်ကြောင်း၊ ထို့ကြောင့် မိမိတို့သည် အင်ဂျင်နီယာပညာရှင်များပီပီ အတွေးအခေါ် အယူအဆတစ်ခုကို လက်တွေ့အကောင် အထည်ဖော်နိုင်သည်အထိ လုပ်နိုင်စွမ်းရှိအောင် ကြိုးစားနေရန်လိုအပ်သကဲ့သို့ မိမိတို့ တတ်ကျွမ်းသည့် ပညာရပ်ကိုအသုံးချပြီး စစ်မြေပြင်တွင် စစ်ပွဲအောင်နိုင်ရေးအတွက် အထောက်အကူပြုရန်လိုကြောင်း၊ တပ်မတော်နည်းပညာတက္ကသိုလ် ကျောင်းဆင်း အင်ဂျင်နီယာပညာရှင်များသည် ကာကွယ်ရေးစွမ်းရည်ကို မြှင့်တင်ပေးနိုင်ရမည့်အပြင် နိုင်ငံတော်ကာကွယ်ရေးလုပ်ငန်းများတွင်လည်း အားထားရမည့်ပညာရှင် များဖြစ်ရန်လည်းလိုကြောင်း မှာကြားသည်။

၎င်းနောက် မိမိတို့ အင်ဂျင်နီယာပညာရှင်များသည် သီအိုရီများကိုအခြေခံပြီး ပြဋ္ဌာန်းချက်များ၊ ကျင့်ဝတ်များ၊ စည်းမျဉ်းစည်းကမ်းများအတိုင်း တိတိကျကျလိုက် နာလုပ်ဆောင်ကြရမှာ ဖြစ်သည့်အပြင် အချိန်မီ လုပ်ဆောင်နိုင်ရန်လည်း လိုအပ်ကြောင်း၊ အင်ဂျင်နီယာပိုင်းဆိုင်ရာ အားနည်းချက်များကြောင့် ဖြစ်ပေါ်နေသည့် ပျက်စီးဆုံးရှုံးမှု သာဓကများကို ယနေ့ကမ္ဘာပေါ်တွင် များစွာတွေ့ရှိရမည်ဖြစ်ကြောင်း၊ ထို့ကြောင့် ကျင့်ဝတ်၊ စည်းကမ်းသတ်မှတ်ချက်များအတိုင်း တိတိကျကျနှင့် အချိန်ကိုက်လုပ်ဆောင်တတ်သည့် အကျင့်ကောင်းများ ထာဝရရှိနေရန်လိုအပ်ကြောင်း၊ အင်ဂျင်နီယာအရာရှိများအဖြစ် တာဝန်ထမ်းဆောင်ကြမည့်မိမိတို့သည် အတတ်ပညာရှင်များ ဖြစ်သလို စစ်ဘက်ခေါင်းဆောင်ငယ်များလည်းဖြစ်ကြောင်း၊ ထို့ကြောင့် တပ်မတော်၏ အဓိကတာဝန်ဖြစ်သည့် နိုင်ငံတော်ကာကွယ်ရေးနှင့် လုံခြုံရေးတာဝန်များကို ကျရာကဏ္ဍမှ ထမ်းဆောင် ကြရမည်ဖြစ်ကြောင်း၊ စစ်ဘက်ခေါင်းဆောင်ဆိုသည်မှာ တပ်ကိုကောင်းအောင် တည်ဆောက်နိုင်စွမ်း ရှိရမှာဖြစ်ကဲ့သို့ အခက်အခဲအကျပ်အတည်း မှန်သမျှကိုလည်း ရင်ဆိုင်ကျော်လွှားပြီး မိမိတပ်ဖွဲ့ကို တက်ညီလက်ညီ စုပေါင်းဆောင်ရွက်နိုင်စွမ်းရှိအောင် ဖွဲ့စည်းထားနိုင်ရမည်ဖြစ်ကြောင်း မှာကြားသည်။

ယင်းနောက် စစ်ဘက်ခေါင်းဆောင်တစ်ဦးအနေဖြင့် စစ်ပညာနှင့်ပတ်သက်ပြီး ပြည့်စုံပြီးမြောက်အောင် ဖြည့်ဆည်းရန်အတွက် ပြောင်းလဲတိုးတက်နေသည့် စစ်နည်းဗျူဟာနှင့် အဆင့်မြင့်နည်းပညာများကို နိုင်ငံတကာနှင့် ရင်ဘောင်တန်းနိုင်အောင် စဉ်ဆက််မပြတ် လေ့လာသုတေသနပြုတီထွင်နေရန်လိုအပ်ကြောင်း၊ ခေါင်းဆောင်ဆိုသည်မှာ မွေးရာပါပင်ကိုဗီဇဟု ယခင်ကသတ်မှတ်ခဲ့ကြသော်လည်း ယခုအခါတွင် ခေါင်းဆောင်မှု အရည်အချင်းသည် လေ့ကျင့်ယူနိုင်သည့် အရည်အသွေးအဖြစ် သတ်မှတ်လာကြပြီဖြစ်ကြောင်း၊ ထို့ကြောင့်မိမိတို့၏ လက်အောက်ငယ်သားများက အတုယူအား ကျလောက်သည့် စွမ်းဆောင်ရည်ရှိသည့် စံပြုခေါင်းဆောင်များဖြစ်အောင် ကြိုးစားကြရန်လိုကြောင်း၊ အနာဂတ်နိုင်ငံတော် ဖွံ့ဖြိုးတိုးတက်မှုအတွက် အင်ဂျင်နီယာ ခေါင်းဆောင်များအဖြစ် မိမိတို့သည် ရုပ်ပိုင်းဆိုင်ရာနှင့် စိတ်ပိုင်းဆိုင်ရာများတွင် ကြံ့ခိုင် နေရန်လိုအပ်ကြောင်း၊ သို့မှသာတပ်မတော်၏ ရည်မှန်းချက်တာဝန်များကို အောင်မြင်အောင် ထမ်းဆောင်နိုင်ကြမည် ဖြစ်ကြောင်း၊ ကျန်းမာအောင်နေထိုင်စားသောက်ပြီး ကြံ့ခိုင်အောင် လေ့ကျင့်ကြရမည် ဖြစ်ကြောင်း၊ လေ့ကျင့်မှကျွမ်းကျင်၊ ကျွမ်းကျင်မှယုံကြည်၊ ယုံကြည်မှရဲရင့်၊ ရဲရင့်မှအောင်ပွဲဆင်ဆိုသည့် ဆောင်ပုဒ်နှင့်အညီ တာဝန်ကျရာ တပ်ရင်း/တပ်ဖွဲ့များရှိ စစ်သည်၊ မိသားစုဝင်အားလုံးကို ကျွမ်းကျင်မှု ရှိစေရန်နှင့် ရဲစွမ်းသတ္တိရှိစေရန်လည်း ဦးဆောင်လေ့ကျင့်ပြီး ရည်မှန်းချက်တာဝန်များကို အောင်မြင်အောင် ထမ်းဆောင်သွားကြရန်လိုကြောင်း မှာကြားသည်။

ဆက်လက်ပြီး ခေတ်မီဖွံ့ဖြိုးတိုးတက်သည့် နိုင်ငံတော်ကိုဖော်ဆောင်ရာတွင် ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှုမပြိုကွဲရေး၊ အချုပ်အခြာအာဏာ တည်တံခိုင်မြဲရေးဆိုသည့် ဒို့တာဝန်အရေးသုံးပါးသည် ခိုင်ခိုင်မာမာ တည်ရှိနေရန်လိုကြောင်း၊ ၂၀၀၈ ခုနှစ်ဖွဲ့စည်းပုံအခြေခံဥပဒေ တွင်လည်း “နိုင်ငံသားတိုင်းသည် ဒို့တာဝန်အရေးသုံးပါးကို စောင့်ထိန်းရန်တာဝန်ရှိသည်” ဟု သတ်မှတ်ပြဋ္ဌာန်း ထားကြောင်း၊ မိမိတို့တပ်မတော်အနေဖြင့် အမျိုးသားရေးတာဝန်ဖြစ်သည့် ဒို့တာဝန်အရေးသုံးပါးကို မည်သည့်အခါမှ အထိအပါးအပွန်းအပဲ့ခံမည် မဟုတ်ဘဲ အမြဲဦးထိပ်ပန်ဆင်ပြီး ကာကွယ်စောင့်ရှောက် သွားမည်ဖြစ်ကြောင်း၊ ဒို့တာဝန်အရေးသုံးပါးသည် တပ်မတော်တစ်ရပ်တည်းနှင့် သက်ဆိုင်သည်မဟုတ်ဘဲ မြန်မာနိုင်ငံတွင် မှီတင်းနေထိုင်ကြသည့် တိုင်းရင်းသားပြည်သူတစ်ရပ်လုံးနှင့် သက်ဆိုင်နေသည့် အမျိုးသားရေးတာဝန် တစ်ရပ်ဖြစ်ကြောင်း၊ မိမိတို့နိုင်ငံ၏ သမိုင်းကြောင်းနှင့် ပကတိအရှိတရားအရ ဒို့တာဝန်အရေးသုံးပါးကို မထိခိုက်အောင် ကာကွယ်ရန်အတွက် မိမိတို့တပ်မတော်၏ သမိုင်းပေးတာဝန် တစ်ရပ်လည်းဖြစ်ကြောင်း၊ ဒို့တာဝန်အရေးသုံးပါးကို ထိခိုက်လာလျှင် မမျှော်မှန်းနိုင်သည့်ရလဒ်ဆိုးများ ပေါ်ပေါက်လာနိုင်ပြီး ဘယ်ခေတ်၊ ဘယ်စနစ်တွင်ဖြစ်စေ နိုင်ငံတော်နှင့် တိုင်းရင်းသားပြည်သူများအတွက် ထာဝရလိုအပ်နေသည့် ဒို့တာဝန်အရေးသုံးပါးသည် ပြည်သူတစ်ရပ်လုံးက ၀ုိင်းဝန်းကာကွယ် စောင့်ရှောက်ကြရမည့် အမျိုးသားရေး တာဝန်ဖြစ်ကြောင်း ရှင်းလင်းပြောကြားသည်။

ထို့နောက် မိမိတို့တပ်မတော်သည် နိုင်ငံတော်ကာကွယ်ရေးတာဝန်ကို စွမ်းစွမ်းတမံ ထမ်းဆောင်နိုင်ရန်အတွက် စစ်ရေးစွမ်းရည်၊ စည်းရုံးရေးစွမ်းရည်၊ အုပ်ချုပ်ရေးစွမ်းရည်ဆိုသည့် စွမ်းရည်သုံးရပ်နှင့် အစဉ်ပြည့်ဝနေရန် လိုကြောင်း၊ ထို့အပြင် တပ်တွင်း/တပ်ပြင် စည်းရုံးရေးလုပ်ငန်းများကိုလည်း အောင်မြင်အောင် တည် ဆောက်ကြရမည်ဖြစ်ကြောင်း၊ နိုင်ငံတော်ကာကွယ်ရေးလုပ်ငန်းသည် ပြည်သူမပါ၀င်လျှင် အဆုံးစွန်အောင်မြင်မှုကို ရရှိနိုင်မည်မဟုတ်သည့်အတွက် နိုင်ငံတော် ကာကွယ်ရေးလုပ်ငန်းစဉ်များတွင် ပြည်သူတစ်ရပ်လုံး ပူးပေါင်းပါ၀င်ပြီး အပြည့်အဝ ထောက်ခံအားပေးမှုရရှိအောင် တည်ဆောက်ထားကြ ရမှာဖြစ်ကြောင်း၊ အင်အားတောင့်တင်းပြီး စွမ်းရည်ထက်မြက်သည့် ခေတ်မီမျိုးချစ်တပ်မတော်အဖြစ် တည်ဆောက်နိုင်မှသာ နိုင်ငံတော်နှင့်ပြည်သူလူထုက ယုံကြည်အားကိုးရသည့် တပ်မတော်၊ နိုင်ငံတကာက အလေးထားရသည့် တပ်မတော်အဖြစ်ရောက်ရှိ လာမည်ဖြစ်ကြောင်း၊ မိမိတို့နိုင်ငံ၏စွမ်းအားသည် နိုင်ငံ၏အတွင်းမှာသာရှိသည့်အတွက် နိုင်ငံတစ်ဝှမ်းတွင် ရှိသည့်တိုင်းရင်းသားညီအစ်ကိုများ ချစ်ကြည်ရင်းနှီး၊ စည်းလုံးညီညွတ်စွာရပ်တည်ပြီး နိုင်ငံ၏အချုပ်အခြာအာဏာနှင့် လုံခြုံရေးထိပါးလာမှုကို ကာကွယ်နိုင်ရန် အတွက် တပ်မတော်သည်ပြည်သူနှင့် တစ်သားတည်းဖြစ်ရန်လိုကြောင်း၊ ထို့ကြောင့် မိမိတို့တာဝန်ကျရာ တပ်ရင်း/တပ်ဖွဲ့အသီးသီးသို့ ရောက်ရှိတာဝန်ထမ်းဆောင်ချိန် ပြည်သူလူထုနှင့်ဆက်ဆံရာတွင် စစ်သည်တော်ကျင့်ဝတ် အပါး(၆၀) ပါအချက်အလက်များကို အလေးထားလိုက်နာကြရန်လိုကြောင်း၊ ပြည်သူလူထု၏ အားပေးထောက်ခံမှုသည် နိုင်ငံတော်ကာကွယ်ရေး လုပ်ငန်းများအတွက် အရေးကြီးသည့် အခြေခံအချက်များ ဖြစ်သည့်အတွက် မိမိတို့အနေဖြင့် ပြည်သူ့အကျိုးပြုလုပ်ငန်းများ ဆောင်ရွက်ရာတွင် အောင်မြင်အောင် ဦးဆောင်ဦးရွက်ပြုကြရန်လိုကြောင်း မှာကြားသည်။

ယင်းနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်သည် ဗိုလ်လောင်းတပ်ရင်းများ၏ အလေးပြုခြင်းကိုခံယူပြီးနောက် စစ်ရေးပြအခမ်းအနားမှ ပြန်လည်ထွက်ခွာသည်။

စစ်ရေးပြအခမ်းအနားအပြီးတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်သည် တပ်မတော်နည်းပညာတက္ကသိုလ် ကျောင်းဌာနချုပ်ဧည့်ခန်းမ၌ ထူးချွန်ဆုရရှိကြသည့် ဗိုလ်လောင်း(၃)ဦးနှင့် ၎င်းတို့၏ မိဘများအားတွေ့ဆုံ၍ ဂုဏ်ပြုအမှာစကားပြောကြားသည်။

ထိုသို့တွေ့ဆုံပြောကြားရာတွင် မိမိတို့အနေဖြင့် ၆ နှစ်တာကာလအတွင်း စဉ်ဆက်မပြတ် ကြိုးစားအားထုတ်ခဲ့မှုများကြောင့် ယခုကဲ့သို့ ထူးချွန်ဆုများရရှိခဲ့ခြင်းဖြစ်ပြီး ဆက်လက်ထိန်းသိမ်း ဆောင်ရွက်သွားကြရန် လိုကြောင်း၊ မိဘများကမိမိတို့ မွေးသည့်အချိန်မှစ၍ ယနေ့ တပ်မတော်နည်းပညာတက္ကသိုလ်သို့ ရောက်သည်အထိ ပညာသင်ကြားပေး၍ ကျွေးမွေးပြုစုသွန်သင်ဆုံးမပေးခဲ့ကြပြီး တပ်မတော်နည်းပညာ တက္ကသိုလ် တက်ရောက်ချိန်မှစ၍ ယခုသင်တန်းပြီးဆုံးချိန် အရာရှိငယ်များဖြစ်သည် အထိတပ်မတော်မှ မွေးထုတ်ပေးလိုက်ကြောင်း၊ မိမိကိုယ်ကို အလိုမလိုက်ပဲ ထိန်းသိမ်းလုပ်ဆောင်ခြင်းဖြင့် နိုင်ငံတော်အပေါ်၊ မိဘများအပေါ် အကျိုးပြုနိုင်သည့် အရာရှိများဖြစ်အောင် ထိန်းသိမ်းလုပ်ဆောင်သွားကြရန် လိုကြောင်းဖြင့် မှာကြားခဲ့သည်။